Mpin u Mbaôron Takerada Ne

Er Nan Mbashiada Mba Yehova Ve Civir Aôndo A Terankon Ga?

Mbashiada mba Yehova na jighjigh taveraa ér ku u Yesu Kristu bugh gbenda u hanma or u nan ne un jighjigh yô, nana zua a uma u tsôron. (Mateu 20:28; Yohane 3:16) Nahan kpa ve lumun ér Yesu yange kpe sha terankon er i tesen ken ufoto kpishi nahan ga. Ve na jighjigh ér Yesu yange kpe sha kon u nôôn u i tera ma kon ugen sha mi ga yô.

Ior i Mesopotamia mba ngise ngise, mba ve lu uma anyom dubu uhar cii man shighe u Kristu la yaren tom a terankon. Akaa a ior i Scandinavia kperan sha awen uderimbaanyomov imôngo cii man shighe u i mar Yesu la kpa lu a ikyav i terankon sha mi. Or u ken tar u Denmark, orvesen Sven Tito Achen, u a timen sha akaa a mbayiase shi a fe kwagh u akav a kperan tsema tsema yô, nger ken takerada u i yer ér Symbols Around Us la ér, ior mba ve lu Mbakristu ga mban yange ve yaren tom a terankon sha u “eren ahir . . . shi lu kuraiyol man kwagh u doon ikyôr kpaa.” Takerada ugen u pasen asemberakaa u i yer ér New Catholic Encyclopedia la kpa kaa ér: “I zua a terankon sha ayange a tsuaa cii man shighe u Mbakristu la, shi ior mba ve lu Mbakristu ga la kpa yaren tom a terankon, gadia u lu ve ikyav i akaa a sha kwavaôndo.” Tsô er nan ve ucôôci ve tsough terankon u lu ve icighan ikyav i hemban ciilii?

Orcivirigh ugen ken tar u Ingila u fan takerada, mba yer un ér W. E. Vine, a ôr mkaanem man ér: “Derianyom u sha utar la yange gbe atô yô . . . ucôôci hii u lumun ér mbafanaôndo ga ve kohol a ve imôngo . . . shi i de ve ér ve za hemen u yaren tom a akaa a yange lu ve ikyav la.” Nahan ucôôci maa ve ngohol ikyav i terankon la hingir i ve.—Vine’s Expository Dictionary of Old and New Testament Words.

Vine shi kaa ér ishemberti i “terankon” man ishember i pasen ieren i manden or sha terankon la cii ngi ôron kwagh u “kon u nôôn . . . ka terankon u ucôôci ve kaan ér i er sha abamber a ikyon ahar la ga.” Bibilo i Yunivasiti i Oxford, i i yer ér Companion Bible la kpa lumun a kwagh u vine a er ne, i kaa ér: “Ikyav tese wang . . . ér yange i wua Ter sha kon u nôôn, ka sha abamber a ikyon ahar a i tee môm i mande a peregh sha ugen ga.” Sha mimi yô, ieren i ucôôci ve lumun a mi ne zua sha kwagh u Bibilo i tese ga.

Or u timen sha akaa a mbayiase, Achen, u se vande ôron kwagh na la kaa ér: “Ka inja er hii shighe u Yesu kpe la zan zan uderimbaanyomov uhar cii, ma shighe môm kpa Mbakristu yar tom a ikyav i terankon ga nahan.” Shi a kaa ér “a shi nan kpa terankon lu Mbakristu mba tsuaa mbara ikyav i kuugh man i ifer, vough er kov u hegen ne kpa ikyekye i gberen ior ityough a mi i i yer ér guillotine shin ikyônough ki usugh ki wuan ior sha mi ki i yer ér electric chair la kpa ki lu ve ikyav i kuugh nahan.”

Bee kera yô, yange a wua Yesu sha nyi kwagh je kpa, doo u Mbakristu vea gema ikyav i kwagh shon una hingir ve kwagh u civir ga. I wa se kwagh ken Bibilo ér “yevese nen akombo a civir.” (1 Mbakorinte 10:14) Yesu iyolna yange tese kwagh u a fa Mbakristu sha mi yô. A kaa ér: “Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.”—Yohane 13:35.

Ka a va sha kwagh u mcivir yô, Mbashiada mba Yehova ve dondo ikyav i Mbakristu mba sha derianyom u hiihii la, ka ve er kwagh u Bibilo i tese yô, i lu aeren a ior ga. (Mbaromanu 3:4; Mbakolose 2:8) Sha nahan yô, mba civir Aôndo a terankon ga.

[Picture on page 30]

Ieev mbu tor Ashiria u fan aôndo ga, ken inyom i 800 C.S.Y. gayô ikyua a inyom la; a zer terankon sha mon

[Credit Line]

Photograph taken by courtesy of the British Museum