Mpin u Mbaôron Takerada Ne

Er Nan Ve Aôndo A De Ér Ior Ve Ya Icana?

Ka Aôndo a ne ve uumace ve lu yan ican ga. Bibilo kaa ér, “Aôndo Una er iferkwagh mayange ga.” (Yobu 34:10) Nahan yô, ka an jighilii nan ve a ican i yana?

Yesu yange yila Satan ér “tor u tar ne.” (Yohane 14:30) Mimi yô, ka Yehova a lu Tor u Hemban sha Won cii ye. Mayange una de ér orgen nana kar a lu Tor u Hemban cii ga. Nahan kpa, Aôndo hira na Satan ian ér a hemen uumace kpishi.—1 Yohane 5:19.

Hemen u Satan ngu nena? Hii shighe u kwagh hii zuan Satan a uumace la je zan zan nyian Satan ngu or u wuan or man oraie kpaa. Ngu eren uumace ican sha igbenda i vesen je. Yesu na un ibo sha mkaanem man: “Un yô lu orwuanor sha hiihii je, man a tile sha mimi ga sha ci u mimi ngu ker a na ga. Ka una eren aie yô, i lu sha mlu na je a lu ôron kwagh ye; gadia ka or u aie shi ka ter u aie kpaa.” (Yohane 8:44) Shi Yesu ôr kwagh u ior mba ve lu keren un a ku la ér mba ônov mba orwuanor u hiihii la. Yange ve hingir ônov nav ayol a ve gadia ve lu eren akaa er un nahan. Sha mimi yô, ônov mba eren kwagh er uter vev nahan.

Zan zan hegen kpa, Satan ngu mgbeghan ior ér ve lu a isharen i wuan ior. U tesen ikyav yô, profesôr ugen ken Yunivasiti i Hawaii, ken tar u Amerika u a mem tom yô, mba yer un ér R. J. Rummel, á ker ahaba ér hii ken inyom i 1900 zan zan inyom i 1987 la, ugomoti kposo kposo wua ior hemba miliôn 169 sha shighe u ayôôso a patii man num u wuan akuraior agen; shi ve wua ior dang dang a ityôkyaa shio. Dugh iyenge ior i i ter sha heen ne sha yô, ior mbagenev kpa i wua ve umiliôn umliôn ken utya hii ken inyom i 1900 la zan zan inyom i 1987 la.

Aluer ka Aôndo a ve a ican i yan ga yô, er nan ve a de ér uumace ve ya icanaa? Ka sha ci u ikyaa i í bende a akaauma sha won jimin cii man ikyaa i kwagh u a lu u dedoo man u a lu bo i yange i hii ngise ngise la ngi a kure ga. De se nenge sha ikyaa ne i môm.

Sha shighe u i gba Adam man Ifa la, ve ta ikyaa a Satan. Ve venda hemen u Aôndo ér vea hemen ayol a ve, kpa sha mimi yô ve hingir u lun a lu sha ikyev i Diabolo.—Genese 3:1-6; Mpase 12:9.

Er Yehova a lu Aôndo u eren kwagh sha mimi yô, a nenge wener doo u una gba kuren ikyaa ne gaegh ga, kpa una de shighe a kar, hanma or nana nenge kwagh u a lu u mimi la. Nahan kanyi se nenge i lu zan hemen je i lu ashe tugh ga? Hemen u uumace u sha ikyev i Satan la ngu van a ican i yan tseegh. Kpa sha mimi yô, mde u Aôndo a de wener uumace ve ya ican ne, ken masejime yô una gema a va uumace a kwagh u dedoo. Nena yô? Hanma or u nan hen sha akaa a a lu zan hemen ne, u nan ne jighjigh ér hemen u Aôndo hemba doon cii yô, nan ngu a ian i tesen ér nan soo u lun sha ikyev i hemen u Aôndo. Mba i tese ve atindiakaa a Aôndo, nahan ve lu dondon a la cii mba a ishimaverenkeghen i lun uma gbem sha won.—Yohane 17:3; 1 Yohane 2:17.

Hegen ne yô, ka Satan a lu hemen tar ne, nzughul a u ye. Kpa una za hemen nahan shighe naleghaa ga. Ica a gba ga tsô Yehova una yar tom a Wan na “sha u vihin aeren a diabolo kera.” (1 Yohane 3:8) Sha tahav mbu Aôndo yô, Yesu una bee a mbamzeyol mba ken asema a ior shi una sôr akaa a vihin a a nzughul a ior la kpaa. Una nder ior ubiliôn ubiliôn mba ve kpe ken ican ken uderimbaanyomov mba ve kar imôngo ne, vea hide a lu uma shin tar.—Yohane 11:25.

Mnder u yange i nder Yesu shin ku la ka ikyav i môm i tesen er Aôndo a hembe aeren a Diabolo yô—man kwagh ne gema tese kwagh u a lu van sha ci u uumace mba ve tsough hemen u Aôndo la. (Aerenakaa 17:31) Bibilo wase se u fan er shighe u ken hemen la una lu yô, i̱ ôr se mkaanem ma kundunyol man ér: “Aôndo iyol Na Una lu a [ior]. Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”—Mpase 21:3, 4.