Washika u Kwase Mishen Ugen ken Tar u Dominican Republic

“Or Ngu a Vande Tesen Mo Dooshima Nahan Ga”

NIURKA na kwaghôron na u ken Bibilo u hiihii ken tiônnongo wase ken kasua ne. Yange wa iyol sha kwaghôron na ne tsembelee; a nger kwagh u una ôr la ken kwaghngeren u mbaapirashe u i yer ér Braille la, been yô a ôr gbem a kôr ken ityou. M lu vea na sha tsembe u nan kwaghôron la, m tile sha ityough ki or u nan soo u fan mimi u ken Bibilo yô. Niurka zer anar sha ato u wasen un u ungwan tsembelee, nahan mea lam ken maikrofon yô anar la a wase un u ungwan. Se mba been yô, doo ior kpishi, ve kure ave taver je Niurka ungwa. Nahan saan un iyol tsung je a se. Mo kpa saan mo iyol je zua ga. Tom u mishen ngu ve a iermber kpen kpen!

M umbur kwa u m hii nengen a Niurka anyom ahar a karen ken ijime la. M nyôr mato u yemen ken angar ugen; ihyundu lu sha gbenda kpishi. Se mba ze ka kom miniti ikyundugber yô, se nyôr her, lu kwa wam u hiin nengen a na je la. Yange tema sha varenda hen ya ve u i maa sha ikyon man akam a semetu yô; too iyough ve ta nduran kpishi. Se lu ungwan amo man ihuma i ivo man mbaalôm kua iwa kpaa. Niurka tema suwa ityough inya sha inja or u i huan nan kpishi shi nan lu zungwen kpaa yô. Lu anyom 34 kpa bee iyol hemba anyom a na ken inya.

M shir teghelee m bende un uwegh sha vande, maa a gema a kenger se shin er pir ashe anyom kar 11 nahan kpaa. Tsô m ngor m ôr un iti yam man i anmgbian u m due kwaghaôndo u pasen vea na la. Se va mase kaven ser Niurka ngu a angev mbu i yer ér Marfan syndrome la; angev mbun na un ican kpishi. Niurka shi lu a angev mbu shogaa mbu bov kpen kpen, nahan lu u a karen un hanma shighe sha er a faan mlu u angev mbu shonov yô.

Yange m ver un Bibilo sha uwe, tsô a fa er i lu Bibilo yô, maa a kaa a mo ér yange un ôron Bibilo kpoghuloo shighe u un lu a pir ashe ga la. Tsô m gba henen er me tese ican kwase u sha kwarkyaa ga, u mtswenem kôr un kpishi ne mimi u kundun iyol u ken Mkaanem ma Aôndo yô. Er fa u ôron abaacaa yô, m hii u pendan un asangaabaacaa a i dugh a dugh yô sha ave. Ica i gba ga je maa a hii u fan hanma ishangebaacaa i mea penda un sha uwe yô. Se mba been heela yô, m hii u tesen un iliam i sha ave, nahan mea lamen sha ave yô, a ver ave na sha a am a henen asangaabaacaa a iliam i sha ave i Mbaamerika i i yer ér American Sign Language la. Ica i gba ga je maa a hii u fan u lamen sha ave kure kure. Er mo kpa m lu henen a hen iliam i sha ave ne yô, hanma kwa u a gba u me hen kwagh a na yô, m wa iyol ahwa imôngo cii ve se mase teman kwaghhenen la ye. Kpa er gba se ishima tsung u fan iliam i sha ave ne yô, mo man Niurka se ngôôr fan ga.

Kwagh ugen u wase Niurka za hemen kpishi yô, lu anar u wasen or u ungwan tsembelee u  mzough ugen u wasen ior yange na un la. Anar ne lu iwavaren i ainge ga, nahan kpa wase un kpishi. Er Niurka pir ashe shi ungwan taveraa je hemba anyom pue yô, kera biishi a ior ga. Kpa jijingi u Yehova nder mhen na man ishima na, iv un a mfe man ishimaverenkeghen kua dooshima. Ica gba ga maa Niurka hii u zenden a aga hen uwe hen ningir na pasen mbagenev mimi u ken Bibilo.

Niurka ngu henen Bibilo a anmgbian u ngô na man wan u anmgbian u ngô na la kua kwase u anmgbian na ugen. Ngu a vande wan iyol tsembelee, nahan a kôr kwagh u i gbe u una hen a ve la ken ityou. Mba a henen Bibilo a ve la ka ve ôr ijiir i ve lu henen la un di a pine ve mpin ken takerada na u kwaghngeren u mbaapirashe la. Or u nan dugh kwaghpasen vea Niurka la nan ôr un mlumun u ve ne la sha u lamen un ken to genger genger, gayô nan ver ave sha a na maa nan lam sha iliam i sha ave la.

Mba ken tiônnongo jimin cii mba wasen Niurka shi mba taver un ishima kpaa. Anmgbianev mba ken Kristu kpishi ka ve wase un ve za mbamkombo a na kua mbamkohol kpaa. Mbagenev di ve due kwaghpasen vea na. Semberee ne Niurka kaa a mo ér: “Or ngu a vande tesen mo dooshima nahan ga.” Ngu veren ishima u eren batisema ken mkohol wase u vesen u a lu van ne.

Iyange igen la er se goom se ver ishigh shin ya u Niurka yô, se nenge a na tema sha varenda ken oo, ver ishigh sha kwavaôndo, lu sen mugh mugh. M pin un ityôkyaa i a lu sen yô, a kaa a mo ér: “M ngu henen kwagh u mlu u ken hemen shighe u tar cii ua lu paradiso la. Kam er m ngu ker kpaa nahan.”

[Picture on page 25]

Niurka tile sha ishigh ki Iyou i Tartor vea ior mbagenev ken tiônnongo wase

[Picture on page 25]

Niurka ngu pasen mbagenev kwagh u a lu henen la