Kporom hen Aôndo

Orkuranilev u Kwagh Wou a Gbe Un Ishima Yô

Mateu 18:12-14

‘KWAGH wam gba Aôndo ishima je kpa?’ Aluer u vande pinen iyol you imba mpin ne yô, fa wer ka we tswen u hii pinen ga. Se kpishi se tagher a atsan a taver tsung, man alaghga ashighe agen se hen ser kwagh gba Aôndo u a gbe sha man tar u u kehe kpishi ne sha atsan a ase ga. Kwagh gba Yehova Aôndo sha kwagh wase asange asange je kpa? Doo u se zua a mlumun sha mpin ne. Shighe u Yesu u a fe kwagh u Yehova i ker inya la lu shin tar la, a ôr injakwagh igen i i ne mlumun u doon tsung sha mpin ne yô.

Yesu tôô ikyo i Yehova a we ior nav la kar sha gbenda u orkuranilev nan nengen sha iyôngo i nan la, a kaa ér: “Aluer or nana lu a iyôngo akunduataan man u môm ken i ia tsume yô, nana kera undu i akunduanyiingber kar itiankarinyiin la sha iwo, nana yem nana za ker i i tsum la gaa? Man aluer nana zua a i yô, mimi je M ngu kaan ne, m-ember u nana ember sha i la, una hemba u sha i akunduanyiingber kar itiankarinyiin i i tsum ga la. Kape i lu ishima i Ter wen u A lu Sha la, u mbakiriki mban, mô ve nana̱ saa ga la.” (Mateu 18:12-14) De se time sha gbenda u Yesu pase ikyo i Yehova a we hanma or u civir Un la.

Orkuranilev u ken injakwagh la nenge ér ka tom na u kuran hanma iyôngo na. Aluer iyôngo i môm tsume yô, una fa i i tsum la jighilii. A fa iti i a ne hanma iyôngo yô. (Yohane 10:3) Orkuranilev u a we iyôngo na ikyo tsung ne una mem ga, saa una kar zuan a iyôngo i i tsum la una hide a i hen igen i í tsum ga la. Aluer a yem u keren iyôngo i i tsum la kpa, kwagh a er i 99 i a undu her la ga. Ashighe kpishi mbakuranilev yange ve lu ijiir i môm sha er iyôngo ve ia lu imôngo yô. * Nahan orkuranilev nana̱ yem keren iyôngo i i tsum la kpa, mbakuranilev mbagenev ve nengen sha iyôngo i nan undu her la. Aluer nan za zua a iyôngo i i saa la man kwagh er i ga yô, nana ember tsung. Nana penda iyôngo i mciem ma ker i kpishi la sha avande nana hide a i hen ikyumiyôngo, ape kwagh a kera za i iyol ga la.—Luka 15:5, 6.

Yesu ngur pasen injakwagh ne yô, a kaa ér Aôndo soo ér mô ken “mbakiriki mban, . . . nana̱ saa ga.” Yesu yange vande tan mbahenen nav icin ér ve de ne ‘mbakiriki mba ve ne un jighjigh’ la gbev mbu nôngon ga. (Mateu 18:6) Injakwagh i Yesu ne tese se nyi sha kwagh u Yehova? I tese se ér Yehova ngu Orkuranilev u a we hanma iyôngo na ikyo yô, kua “mbakiriki” mba tar u nengen ve ér ve gba kwagh ga la kpaa. Sha ashe a Yehova yô, hanma or u nan civir un cii nan ngu un kwagh u injaa.

Aluer sar u u fan er u lu kwagh u injaa sha ishigh ki Aôndo yô, seer henen kwagh u Yehova Aôndo, Orkuranilev u Hemban la, shi kporom hen a na kpaa. Aluer u er nahan yô, u lu a vangertiôr vough er apostoli Peteru u ungwa injakwagh i Yesu ôr sha kwagh u iyôngo i i tsum la nahan. Peteru nger ér: “Gema nen ishima i nyian yen la cii, haa nen sha a Na, gadia ka Un A lu koson ne ye.”—1 Peteru 5:7.

[Footnote]