Kwagh U Se Hen Hen Yesu

Sha Kwagh u Aôndo u Mimi La

Ngu a iti je he?

Yesu tese se ér Aôndo ngu a iti. A kaa ér: “Eren nen msen nahan, ner: Ter wase u Sha, i̱ tsegha iti You.” (Mateu 6:9) Bibilo tese ér iti i Aôndo ér Yehova. (Ekesodu 6:3) Yesu yange ôr kwagh u mbahenen nav ken msen ér: “M pase ve iti You.”—Yohane 17:26.

Ka an nan lu Yehova?

Yesu yila Yehova ér “Aôndo u mimi tswen,” sha ci u ka Yehova a gbe akaa cii ye. (Yohane 17:3) Yesu kaa ér: “Ne mba a ôr kwagh u i nger la gaa, er Un u A er ve sha hiihii la je, A er ve nomsoor kua kwase.” (Mateu 19:4) Shi Yesu kaa ér: “Aôndo ka jijingi.” (Yohane 4:24) Nahan se fatyô u nengen a Aôndo ga.—Ekesodu 33:17-20.

 Kanyi Aôndo a soo hen a vese?

Zum u orgen pine Yesu tindi u a lu u tamen yô, a kaa a na ér: “U hiihii yô, er: Ver ato Iserael, Ter Aôndo wase ka Ter tswen je, man shi Ter Aôndo wou A̱ doo u ishima sha ishima you cii, man sha uma wou cii, man sha mfe wou cii kua sha agee ou cii. U sha uhar yô, er: Or u nan we ndor a we yô, nana̱ doo u ishima er we iyol you nahan.”—Marku 12:28-31.

Se tese ser Aôndo doo se ishima nena?

Yesu kaa ér: ‘Ter doom ishima.’ Yange tese ér Ter doo un ishima nena? A kaa ér: “M eren er Ter A wem kwagh yô.” (Yohane 14:31) Shi a kaa ér: “M eren akaa a doon Un gbem.” (Yohane 8:29) Se kpa se fatyô u eren akaa a doon Aôndo sha u henen kwagh na. Shighe u Yesu lu eren msen sha ci u mbahenen nav yô, a kaa ér: “Man uma u tsôron yô, ka u ve̱ fa U, We Aôndo u mimi tswen.”—Yohane 17:3; 1 Timoteu 2:4.

Se hen kwagh u Aôndo nena?

Gbenda môm u henen kwagh u Aôndo yô, ka u nengen akaa a a gbe la. U tesen ikyav yô, Yesu kaa ér: “Nenge nen inyon i sha, ngi lee ga, ngi sondo kpaa ga, ngi ombon sha iuna kpaa ga; nahan kpaa Ter wen u Sha la koson i. Ne ne hemba i inja tsung je gaa?” Lu nyi Yesu soo ér se hen sha u kenger inyon i sha? Yange soo ér se de lumun ser ishimanyian i sha akaa a iyolough a yange se u civir Aôndo ga.—Mateu 6:26-33.

Gbenda u hemban doon u se fa kwagh u Yehova yô, ka u henen Bibilo i i lu Mkaanem nam la. Yesu yila Ruamabera ér “kwaghôron u Aôndo.” (Luka 8:21) Yesu ôr a Aôndo ér: “Ka kwaghôron Wou je a lu mimi ye.”—Yohane 17:17; 2 Peteru 1:20, 21.

Yesu yange tese ior mimi sha kwagh u Yehova. Orhenen u Yesu ugen yange ôr kwagh u Yesu wener: “Asema lu yeghen se a yegh zum u A lu ôron kwagh a vese sha gbenda, pasen se icighanruamabera la gaa?” (Luka 24:32) Saa se hide a iyol ijime shi se lumun ser i tese se ve se kôr cio u henen kwagh u Aôndo ye. Yesu kaa ér: “Saa né gema né hingir er mbayev mba kiriki nahan, gayô, mayange né nyôr tartor u Sha ga.”—Mateu 18:3.

Er nan ve mfe u fan Aôndo la a ne msaanyolo?

Gba u se fa uma u a hembe lun a inja yô, man Aôndo wasen se u fan imba uma la. Yesu kaa ér: “Saan mba ve lu mbaibanave ken jijingi la iyol.” (Mateu 5:3) Yehova tesen se gbenda u uma u hemban doon cii. Yesu kaa er: “Saan mba ve ongo kwaghôron u Aôndo man ve eren sha mi kpaa la, iyol.”—Luka 11:28; Yesaia 11:9.

Aluer u soo u seer fan kwagh u Aôndo yô, ôr ityough ki hiihii ki takerada u Bibilo Tese Ér Nyi Jimi? la. *

[Footnote]

[Picture on page 6]

“M pase ve iti You.”—Yohane 17:26

[Pictures on pages 6, 7]

Se fatyô u henen kwagh u Yehova sha akaa a a gbe la man ken Bibilo