U Fa Kpa?

Zegetasa u mnger u ken tempel u Solomon la yange kehe nena?

I ôr ken 1 Utor 7:26 ér mngerem ma shin zegetasa u upristi ôôn iyol man ave kua angahar a mi la ivin “ubav dubu uhar,” kpa i gema i ôr ken 2 Kroniku 4:5 ér ivin “ubav dubu utar.” Kwagh ne na yô, mbagenev kaa ér ka mba yange ve nger takerada u Kroniku la ve nzughul kwagh ye.

Nahan kpa, avur a ahar ne nga ôron kwagh môm tsô. Ngeren u Bibilo u hiihii u ken zwa Heberu la wase se u fan ér 2 Kroniku 4:5 ngu ôron kwagh u ubav mba mngerev mba a fatyô u haan shin zegetasa u ken tempel la ve una iv zev zev yô, kpa 1 Utor 7:26 ngu ôron kwagh u ubav mba mngerev mba i haan shin zegetasa la ayange ayange yô. Inja yô, i haan mngerem shin zegetasa ne ivin poo ga. Ka inja er lu ubav mba mngerev udubu uhar tseegh i haan shin zegetasa ne ayange ayange nahan.

Er nan ve Yesu man Peteru yange ve ta kpandegh ku tempel sha shekel môm tseeghle?

Sha ayange a Yesu la hanma nomsoor u Mbayuda u nan hembe anyom 20 cii yô, yange nan taan kpandegh ku tempel hanma inyom sha sule uhar shin sha gbenger sule u i yilan ér didrachma la. Inyaregh kin lu kwagh môm a inyaregh ki i kimbin or sha tom u ayange ahar yô. Zum u i pine mpin sha kwagh u kpandegh kun yô, Yesu kaa a Peteru ér: “Za shin kpe u zegemnger, za kende tsuwe, tôô ishu i wea vande kôron la; ú bughun i zwa yô, ú zua a shekel môm; tôô, za na ve sha ci Wam vea we.”—Mateu 17:24-27.

Mbafantakerada kpishi na jighjigh ér shekel u i er kwagh na heen ne lu gbenger sule u sha ayange a tsuaa u i yilan ér tetradrachma la. Sule ne môm tseegh yange kuma shekel unyiin, shin kuma u iorov uhar vea ta kpandegh ku tempel a mi yô. Tetradrachma ne yange hemba ngeen shi ior hemban eren kwagh a mi a u yilan ér didrachma, u kuma shekel uhar tseegh la. Takerada ugen u i yer ér The New Bible Dictionary la kaa ér: “Ka inja er Mbayuda yange ve hemban tan kpandegh ku Tempel kun iorov uhar uhar nahan.”

Yange or nana soo u musan inyaregh sha er nana ta kpandegh sha ci u or môm tseegh yô, i gba u nana kimbi injar. Yange nan dugh kwagh ken inyaregh ki nan musan la nan kimbi injar ne a mi. Kpa, yange iorov uhar vea kohol vea ta kpandegh kun yô, i kera gba u vea kimbi injar ga. Nahan sha ankwagh u cuku ne kpa, kwagh u Mateu a nger ne zua sha kwagh u ior mba sha ayange a Yesu eren ayange ayange yô.

[Picture on page 27]

Foto u vesen u tetradrachma