U a Nderen Mbakpenev La
Kporom hen Aôndo
U a Nderen Mbakpenev La
I LU nahan or u doon we ishima saa ku vee? Aluer ka nahan yô, kwagh er u u vihin kpishi. Orgban se fa ijungwen you la. Heela tseegh ga, una fatyô u been a ican i ku u ve a mi la kpaa. A ôr se akaa a ior mba i vande nderen ve shin ku la ken Bibilo sha u tesen se ér un ne uma tseegh ga, kpa una fatyô u hiden a uma u ior mba ve kpe la kpaa. De se time sha kwagh u orgen u Yehova yange na Wan na, Yesu Kristu tahav nder un shin ku yô. I ôr kwagh u ivande ne ken Luka 7:11-15.
Lu ken inyom i 31 la kwagh ne er ye. Yesu lu yemen ken gar ugen ken Galilia u i yilan ér Nain la. (Ivur 11) A shi nan kpa za ar ken akôngo a gar la aikighe daalaa nahan. Bibilo kaa ér: “Za mgbôghom hen hundagar yô, i tôô orkpen i lu duen a mi, lu wan u ngô na môm; wen kwase la kpaa lu kwasecôghol. Ikpelaior kpishi i ken gar la kpaa lu a na.” (Ivur 12) U hen wer kwasecôghol la yange una zungwe kpishi ga he? Lu kwa u sha uhar u or kpe un je ne, man ve mban cii lu mba ve nengen sha a na yô.
Ishima i Yesu cii lu sha ngô u lu zungwen ku u wan na, u adooga lu zenden ikyua a gambe u i tôô ikyom i wan na sha mi la. Takerada u Luka kaa ér: “Er Ter nenge a Na yô, mhôônom kôr Un a na, A kaa a na er: De vaan ga.” (Ivur 13) Kunya yange u kôr Yesu a kwasecôghol la kpishi. Alaghga Yesu lu henen er ica a gba ga tsô ngô na kpa una vaa ku na yô; a shi nan kpa ngô na lu icôghor hen shighe ne.
Yesu kporom ikyua, kpa lu sha u una kohol ve a vaa ku ga. A za uwegh a “bende gambe la” maa ikpelaior la cii tile. Tsô a kende a ôr kwagh sha inja i or u i ne nan tahav sha ku yô, ér: “Wanye kwaor, M ngu kaan a we Mer; Mough sha! Orkpen la mough, tema sha, gba ôron kwagh. A gema un A na ngô na.” (Ivur 14, 15) Shighe u wanyekwaor la kpe la kera lu u ngô na ga. Nahan Yesu yange gem un ne ngô na yô, ve hide shi ve lu tsombor môm. Se fa keng ser ijungwen i ken ishima i kwasecôghol la yange ia gema a hingir iember i vesen.
Sar u u zuan a imba iember, i hiden nengen a or wou u nan saa ku laa? Fa tsô wer mhôônom ma kôr Aôndo a we. Mhôônom ma yange ma kôr Yesu a kwasecôghol u lu zungwen ku u wan na la tese er mhôônom ma ker Aôndo yô, gadia Yesu eren kwagh er Ter na nahan vough. (Yohane 14:9) Bibilo kaa a vese ér sar Aôndo tsung u hiden nderen mbakpenev mba a we ishima u nderen ve la cii. (Yobu 14:14, 15) Bibilo i i lu mkaanem nam la na se ishimaverenkeghen i kpilighyol; ishimaverenkeghen shon yô, ka u lun uma ken paradiso shin tar shi nengen er a nder ior asev mba doon se ishima mba ve saa ku la yô. (Luka 23:43; Yohane 5:28, 29) Yô, seer henen kwagh u or u a lu a tahav mbu nderen mbakpenev ne man kwagh u ú er ve we kpa u lu a ishimaverenkeghen ne yô.
[Picture on page 17]
“Orkpen la mough, tema sha, gba ôron kwagh. A gema un A na ngô na”