Kporom Hen Aôndo

Aôndo u a Kegh Iyol u Den Kwaghbo La Yohane 21:15-17

“WE, TERE, U doo, U kegh iyol u den kwaghbo.” (Pasalmi 86:5) Mkaanem ma kôron ken ishima ma ken Bibilo man taver se ishima ér Yehova Aôndo den kwaghbo wuee. Kwagh ugen yange er apostoli Peteru u a tese ér Yehova den kwaghbo “wuee” yô.—Yesaia 55:7.

Peteru lu môm ken azende a Yesu a yange doo un ishima yô. Nahan kpa hen tugh mbu Yesu mase lun uma shin tar la Peteru cia ior, nahan er isholibo i vesen kpishi. Peteru yange tile ken igbar hen tembe ya u i lu ôron Yesu ijir her la nyiman kwa tar ér un fa Yesu ga. Peteru nyiman Yesu sha kwa u sha utar la yô, Yesu “gema ishigh kenger Peteru.” (Luka 22:55-61) U fa er yange a lu Peteru ken ishima shighe u a zua ashe a Yesu la kpa? Peteru fa er un er isholibo i vesen yô, nahan a gber kwelegh “a gba vaan.” (Marku 14:72) Er Peteru nyiman Yesu kwa tar yô, er gema ishima nahan kpa, alaghga yange una lu henen ér Aôndo una de un isholibo na la je-o.

Yange mba nderen Yesu shin ku yô, a lam a Peteru sha gbenda u tesen ér a de un kwaghbo na la. Yesu yange ôr kwagh a na sha ishimavihin ga shi puu un kpaa ga. Kpa a pine Peteru ér: ‘M doo u ishima?’ Peteru kaa ér: “Een, Tere, U fa er U doom yô.” Yesu gema kaa a na ér: “Koson Mo aniyôngov Av.” Yesu shi pine un mpin ne sha kwa har, Peteru shi na mlumun u vande nan la, alaghga kwa ne hemba kenden a ikyenge na sha cii. Yesu kaa a na ér: “Kuran iyôngo Yam.” Yesu shi pine Peteru mpin shon môm môm sha kwa u sha utar ér: ‘M doo u ishima?’ Pin kwa ne yô “ishima vihi Peteru” nahan a kaa a Yesu ér: “Tere, U fa akaa cii, U fa er U doom yô.” Yesu gema kaa a na ér: “Koson iyôngo yam.”—Yohane 21:15-17.

Er nan ve Yesu pine Peteru mbampin mba vande fan mlumun cii nee? Yesu lu a tahav mbu fan kwagh u ken ishima i or, nahan yange fa er un doo Peteru ishima yô. (Marku 2:8) Mbampin mba Yesu pine Peteru la na un ian i pasen kwa tar ér Yesu doo un ishima. Shi mlumun u Yesu na un ér: “Koson Mo aniyôngov Av. . . . Kuran iyôngo Yam. . . . Koson iyôngo yam” la seer taver apostoli u gema ishima ne ishima ér Yesu na un jighjigh her. Gadia Yesu lu nan Peteru tom u nengen sha akaa a na a injaa a hemban cii, ka mba dondon Yesu mba ve lu inja er ka iyôngo na je la. (Yohane 10:14, 15) Er Peteru fa ér Yesu ngu a vangertiôr ken a na her yô, ishima yange ia gba un shimi je a zua ga!

Sha kpôô yô, Yesu yange de apostoli u gema ishima ne kwaghbo na la. Er Yesu a dondon aeren a ter na vough yô, se fatyô u kaan vangertiôr ser Yehova kpa yange de Peteru kwaghbo la. (Yohane 5:19) Yehova vende u den kwaghbo ga, ngu Aôndo u zungwen mhôônom u a “kegh iyol u den” mbaasorabo mba ve gem asema la “kwaghbo” yô. Kwagh ne ka kwagh u surun se asema ga he?