Mpin u Mbaôron Takerada Ne

Er Nan Ve Mbashiada Mba Yehova Ve Nenge Ityav Ga?

Hanma ijiir i Mbashiada mba Yehova ve lu cii i fa ve ér mba we ave ken ityav mbi akuraior a nenge shin ayôôso a hen atô u ipaventar môm a igen ga. Takerada ugen u i yer ér Australian Encyclopædia la kaa ér, “Mbashiada mba Yehova mba we ave ken ityav mbi ityav mbi nôngon ga.” U ôr kwagh ne ka anyom 50 je ne.

Ityôkyaa i vesen i Mbashiada mba Yehova ve nenge ityav ga yô, ka sha ci u aluer ve nôngo ityav yô, vea vihi imoshima ve i Mbakristu la. Atindi a Ter Yesu Kristu man ikyav i yange ver la tsaase imoshima ve. Yange kaa a mbadondon un ér mbawanndor a ve ve doo ve ishima. Shi wa ve tindi ér: “Doo nen a mbaihyomov enev, eren nen a mba ve ker ne ihyom la dedoo.” (Luka 6:27; Mateu 22:39) Sha shighe ugen la orhenen u Yesu ugen tsua sanker ér una nôngo kwagh sha ci u Yesu, kpa Yesu kaa a na ér: “Wa sanker wou ken vaa, gadia mba ve tee sanker cii á wua di ve sha sanker.” (Mateu 26:52) Nahan Yesu yange tese mbadondon un sha mkaan man sha ieren ér gba u vea tôô ikyav mbi utyaav ga.

Ityôkyaa igen i Mbashiada mba Yehova ve nenge ityav ga yô, ka sha ci u mba ken nongo u kwaghaôndo u ú lu sha tar jimin cii yô. Nahan aluer ve nôngo ityav yô, vea nôngo a anmgbianev vev mba sha ajiir agen, nahan vea hingir u peren tindi u Yesu yange wa ér ve ‘doo ayol a ve’ la.—Yohane 13:35.

Mbashiada mba Yehova mba ôron a ôr kwagh u dooshima u i ter sha heen ne tseegh ga, mba eren sha mi kpaa. U tesen ikyev yô, nenge ase kwagh u yange ve er zum u i lu nôngon Ityav mbi Tar Cii mbi sha Uhar ken inyom i 1939 zan zan 1945 la. Yange i kôr Mbashiada mba Yehova mba ken tar u Amerika 4,300 i wuhe ken purusu sha ci u ve venda u nôngon ityav yum. Ken tar u Ingila i wuhe ve iorov 1,500, kasev kpa lu sha mi hemba 300 sha ci u ve venda u nôngon ityav. Gomoti u Mbanazi ken tar u Jamani yange na zwa i wua Mbashiada 270 sha ci u ve venda u tôôn ikyav mbi tswamev nôngon ityav. Gomoti u Mbanazi ne yange kôr Mbashiada 10,000 wuhe ken purusu shin afo a mbakwarev. Mbashiada mba ken tar u Japan kpa yange ve ya ican kpishi. Mba yange i wua ior vev ken Ityav mbi Tar Cii mbi sha Uhar man ityav mbigenev kpaa la ve̱ fa ér Orshiada u Yehova môm ngu uwegh sha mi ga.

Mkaanem ma Orshiada ugen, iti na ér Wolfgang Kusserow, yange mase ôron ve i wua un la pase mnenge u Mbashiada mba Yehova sha kwagh u ityav mbi nôngon vough. Ken inyom i 1942 la Mbanazi wua gumor u ken tar u Jamani u lu anyom 20 ne sha ci u a venda u nôngon ityav. (Yesaia 2:4) Yange ôr sha ishigh ki ushoja mba ve lu ôron un ijiir la ér: “I marem, i tesem ér m lu Orshiada u Yehova, vough er mkaanem ma Aôndo ma ken Icighan Ruamabera ma tese nahan. Icighan tindi u hemban cii u Aôndo a ne uumace yô, ér: ‘Ter Aôndo wou a hemba doon we ishima a hanma kwagh ugen cii shi or u nan we ndor a we nana doo u ishima er we iyol you nahan.’ Tindi ugen yô ér: ‘De woo or ga.’ Orgban se yange kaa ér i nger atindi ne cii sha ci u ikyonoo?”—Marku 12:29-31; Ekesodu 20:13.

Mbashiada mba Yehova na jighjigh ér ka Yehova, Aôndo u hembanagee la tseegh una fatyô u van a bem sha tar gbem sha won ye. Nahan mba veren ashe a na ér a kure ityendezwa i a er ér una er ‘ityav mbia bee zan zan a ar hen ikighir i tar’ la.—Pasalmi 46:9.