Er U Wa Ishima a Ijungwen Yô

“Ônov nav [mba Yakob] mba nomso kua mba kasev cii ve mough sha u surun un ishima, kpa ishima pever un ga; a kaa er: Mo me sen shin Sheol a mzungu, me za kohol wan wam. Ter na vaa un.”—GENESE 37:35.

TERTAMEN Yakob yange zungwe ku u wan na tsung. Yange hen wener una zungwe u zan zan ku na. Alaghga kape we kpa u hen wer mnyoon u ku u or wou la una fatyô u been ga je la. Aluer or zungwe ku u or u nan kpishi nahan yô, kwagh la tese ér nan na Aôndo jighjigh ga shinii? Mayange ga!

Bibilo kaa ér Yakob yange lu orjighjigh. I wuese Yakob man ter na Isaka kua tertamen na Aberaham sha jighjigh ve u taver la. (Mbaheberu 11:8, 9, 13) Sha shighe ugen la, Yakob nôngo wav a ortyom tugh kaka ér saa a ver un doo doo! (Genese 32:24-30) Sha kpôô yô, Yakob ya ikyar vea Yehova kangenaa. Nahan yô, ijungwen i Yakob la tese se nyi? I tese se ér or u nan ne Aôndo jighjigh taveraa je kpa, nana fatyô u zungwen ku u or u nan kpishi. Ijungwen ka kwagh u sha gbaaôndo u ka se er zum u or kpe se yô.

Kanyi i lu Ijungwene?

Ijungwen ngi benden a vese sha igbenda kposo kposo, kpa mbagenev yô, ka i na ve mnyoon ken ishima tsung. Nenge ase ikyav sha kwagh u yange er Leonardo ne. Lu anyom 14 zum u ter na kpe angev mbu ishimaa yô. Mayange Leonardo una hungur iyange i anmgbian  u ngô na u kwase ôr un ku u ter na la ga. Hiihii la, na jighjigh ga. Er nenge a ikyom i ter na shin akwati sha iyange i i lu iin un la nahan kpa, lu un er ka mimi ga nahan. Iwer kar ataratar nahan kpa, Leonardo fatyô u vaan ga. Ashighe kpishi a tema a keghen shighe u ter na una kur tom yô. Inyom jimin kar cii ve mase lumun ér ter na kpe mimi ye. Nahan mtswenem kôr un kpishi. A lu ankwagh u cuku kpa a umbur un er ter na a kera lu ga yô, er shighe u una za mape una ngure hiden hen ya ve una umbur ér or ngu hen ya ga nahan. Maa a gber kwelegh a gba vaan. Yange sar un u nengen a ter na kpen kpen!

Kwagh u yange er Leonardo ne tese ér ashighe agen ijungwen ka i va a mnyoon kpishi. Kpa kwagh u doon yô, ijungwen la ia fatyô u been, kpa alaghga a lu fele ga. Or u nan doo se ishima ka nana kpe yô, ijungwen la i bee fele ga, er zege ivav a been fele ga nahan. Alaghga se zungwe iwer imôngo shin anyom kpuaa shin a hemba nahan je kpaa. Kpa shighe ka una karen yô, mnyoon u ken ishima u ka se lu a mi hen shighe u kwagh shon a er hiihii la a gba panden, nahan se hide se gba saan sha ishi shi uma kpa a kera due se ishima ga.

Nahan kpa, hen shighe u or lu vaan ku u or u nan la, ijungwen kpa ngi i wase nan u wan ishima a kwagh u vihin u a er nan la. Or wase ka nana kpe yô, nan kera lu ga, nahan i gba u se hen u lun uma a nan shio. Ijungwen ia fatyô u wasen we, ia na ishima a pever we. Nahan kpa ior mba zungu sha igbenda kposo kposo. Kpa kwagh ugen gema ngu, u a lu mimi yô: Aluer or kighir iyol i nan ér nana zungwe ga yô, nan ngu bulan iyol i nan. Tsô se zungwe nan ve a lu voughloo? Bibilo ngi a akaawan a injaa a wasen se. *

Er U Wa Ishima a Ijungwen Yô

Mba ve lu zungwen ku u or ve yô, kaa ér ka vea lam a or nahan, ishima i pever ve kpishi je. Nenge ase mkaanem ma Yobu, u i er kwagh na ken Bibilo la yange ôr ne; ônov yange ve kpe Yobu pue shi wa ishima a atsan agen kpaa. A kaa ér: “M vôr a uma wam cii; me pase kwagh u a tserem yô, me yer ga; me ôr kwagh sha ishimavihin yam i tsung la.” (Yobu 1:2, 18, 19; 10:1) Yobu yange kaa ér una “pase” kwagh u a tser un yô. Una pase nena? A kaa ér, “Me ôr” kwagh sha ishimavihin yam.

Orgen u ngô na saa ku yô, mba yer un ér Paulo, a kaa wener: “Kwagh ugen u wasem yô, lu u ôron kwagh u ngôm.” Nahan aluer u ôr ijende you i u ne i jighjigh er ishima i lu u ker yô, ishima ia wa pever we. (Anzaakaa 17:17) Zum u ngô u Yone kpe yô, Yone kaa a anmgbianev nav mba ken Kristu ér ve sôron un fele fele, i hemba er ve vanden sôron un  la. A kaa ér, “Er m lu lamen a ior yô, kwagh ne pande mnyoon u ken ishima yam la.” We kpa aluer u ôr or er ishima i lu u ker yô, kwagh la una wase u u wa ishima a ijungwen you.

Kwaghngeren kpa una fatyô u wasen we. Alaghga mbagenev mba ka i taver ve u ôron er ishima i lu ve ker la vea fatyô u pasen ishima ve ken kwaghngeren. Zum u Saulu man Yonatan kpe yô, Davidi nger icam i kôron ken ishima tsung, pase ijungwen na. I nger kwelegh na ne ken takerada u Samuel u sha Uhar la.—2 Samuel 1:17-27.

Mliam kpa ma a na ishima ia gba u shimi. Bibilo kaa ér: “Hanma kwagh ngu a ayange na . . . shighe u mlia ngu.” (Orpasenkwagh 3:1, 4) Sha mimi yô, shighe u or wase u doon se ishima nan kpe la, ka “shighe u mlia.” Kunya u de ker se u zungwen shi vaan ga. Bibilo ôr kwagh u nomso man kasev mbajighjigh mba yange ve vaa ken igbar sha u tesen ijungwen ve yô. (Genese 23:2; 2 Samuel 1:11, 12) Zum u Kristu mgbôghom a uwar u i ii ijende na Lasaru u sember kpen la yô, a “vaa.”—Yohane 11:33, 35.

Gba u se lu a ishimawan zum u se lu zungwen ku u or wase yô, gadia ishima i tem se shimi hen shighe la ga. Umbur wer ityôkyaa ngi i kunya a kôr u u vaan ga. Mbajighjigh kpishi nenge ér mliam ma vaan ka gbenda u vough man u hange hange u wasen or u hungur kwagh u a er nan la.

Kporom hen Aôndo

Bibilo kaa a vese ér: “Kporom nen hen Aôndo, Un kpaa, Una kporom her a ven.” (Yakobu 4:8) Gbenda môm u vesen u kporom hen Aôndo yô, ka msen u eren. De nengen msen u eren wer ka kwagh ga ze. Bibilo er ityendezwa ér: “TER ngu ikyua a mba asema a vihin ve la, yem mba ve lu a ishima i zamber yô.”  (Pasalmi 34:18) Shi i̱ kaa a vese ér: “Haa akaa a zan we iyol cii sha TER, tsô Una taver we.” (Pasalmi 55:22) Hen ase sha kwagh ne. Er se vande ôron nahan, ior kpishi nenge ér ka vea pase ma ijende ve i ve ne nan jighjigh er ishima i lu ve ker yô, ishima i pever ve. Nahan u nenge wer aluer u pase Aôndo u a tende zwa ér una sur se asema la er ishima i lu u ker nahan, a hemba wasen we ga he?—2 Mbatesalonika 2:16, 17.

Paulo u se vande ôron kwagh na la kaa ér: “Yange a lum inja er me kera fatyô u wan ishima a mnyoon la ga yô, m ngure inya m er msen hen Aôndo. M zamber a na mer a wasem.” Paulo ngu a vangertiôr ér mbamsen nav mbara yange ve wase un. Aluer we kpa u gba uwer u eren msen ga yô, “Aôndo u a lu a ishimasurun cii” la una taver we ishima shi una na u agee a wan ishima kpaa.—2 Mbakorinte 1:3, 4; Mbaromanu 12:12.

Ishimaverenkeghen i Mnder u shin Ku

Yesu kaa ér: “Mo M ngu mnder man uma kpaa; or u nana nam jighjigh yô, shin nana kpe kpaa, nana lu uma.” (Yohane 11:25)  Bibilo tese ér mba ve kpe la vea hide a lu uma. * Shighe u Yesu lu shin tar la, a tese ér un ngu a tahav mbu nderen mbakpenev. Sha shighe ugen la a nder wanye kwase u lun anyom 12. Tsô mbamaren mba wankwase shon er nena? “Saan ve iyol je zua ga.” (Marku 5:42, NW ) Zum u Tartor u Tor Yesu Kristu, u a lu hemen sha la ua va la, una nder ior kpishi vea hide a lu uma shin tar, kpa a lu ken mlu u bem man u perapera. (Aerenakaa 24:15; 2 Peteru 3:13) Nenge ase er a lu nderen mbakpenev akum akum, vea lu kohol ior vev ve, a lu kwagh u saan iyol sha wono!

Claudete var foto u wan nan Ronato, u yange kpe aikyôr u igirgi i purugh la sha friiji ken iyou na. Nahan hanma shighe yô, ka a kenger foto shon a kaa a iyol na ér, “Se va zua shighe u mnder u shin ku la.” Leonardo di ka a shi nengen a ter na ken ishima er a lu hiden ken tar u he u Aôndo a tende zwa la yô. Sha kpôô yô, ishimaverenkeghen i mnder u shin ku la sur ve asema kua ior mbagenev kpishi mba ior vev ve saa ku la. We kpa ia fatyô u surun we ishima!

[Footnotes]

[Box/Picture on page 7]

“Aôndo u A lu a Ishimasurun Cii” La

“I̱ wuese Aôndo Ter u Ter wase Yesu Kristu, ka Ter u A lu a mhôônom ma zungwen man ka Aôndo u A lu a ishimasurun cii.”—2 Mbakorinte 1:3.

Ivur Bibilo ne tese ér Aôndo una fatyô u wasen mbacivir un mbajighjigh u wan ishima a mbamzeyol man mbamtaver mba ve tagher a mi la. Gbenda môm u Yehova una sur se ishima yô, a lu sha ikyev i ma ijende yase shin or wase u se civir Aôndo imôngo yô.

Leonardo u ter na yange saa ku la umbur kwagh ugen u yange taver un ishima shi sur un ishima kpishi yô. Iyange igen za hide hen ya, maa umbur er or lu her ga yô, tsô gber kwelegh gba vaan. A due a yem hen ijiir i memen igen za tema lu vaan her. Er lu vaan nahan kpa, sôn Aôndo ér a wase un. Ica i gba ga maa mato ugen va tile ikyua a na, Leonardo fa deraba u mato shon, lu anmgbian na u ken Kristu. Anmgbian ne yange lu zenden nan mbakasuav nav ikyav mbi ve yam hen a na yô, nahan tsume za due gbenda ugen u wa ishima u karen ga yô. Leonardo nenge a nenge a na tseegh kpa ishima pever un.

Sha shighe ugen la mtswenem kôr orgen u kwase na kpe yô, nahan ure kpishi. Or ne fatyô u wan ishima ga tsô a gba vaan, sha ci u lu un inja er kwagh u wasen un môm ngu ga nahan. A sôn Aôndo ér a wase un. Er lu eren msen zan a mi ave la je, or gba yila un sha telefon na. Lu wan u wan na u kwase. A kaa ér: “Iliam i se lam kpuaa tseegh la seer taver mo ishima. Nahan m tôô mer myer u a yilam la lu gbenda u Aôndo ungwa msen wam yô.”

 [Box on page 9]

Sur Mbagenev Asema

“[Aôndo] surun se asema sha atsan a ase cii, sha er se kpaa sé fatyô u surun mba ve lu ken hanma ican la ishima sha ishimasurun i se ayol a ase kpaa Aôndo A sur se asema a mi la.”—2 Mbakorinte 1:4.

Mkaanem man kure sha Mbakristu mba mimi kpishi. Er i sur ve asema shi i wase ve u wan ishima a ku u or ve yô, ve kpa ve hemba fan u taver mbagenev asema shi surun ve asema kpaa.

De se tese ikyav sha Claudete, u hanma shighe yô ka a shi za sôron ior mbagenev, pasen ve jighjigh na u nan u a har sha Bibilo la. Cii man wan na kpe yô, vanden sôron kwase ugen u angev mbu sha akuhe wua wan na yô. Yange una za sôr kwase la yô, i doo un kpishi, kpa i lu un inja er mayange Claudete una fatyô u fan mnyoon u ken ishima na ga nahan. Wan u Claudete va kpen yô, kwase shon mough za sôr un shi kaa a na ér hegen u wan na a kpe ne un va ér una va nenge aluer a na Aôndo na jighjigh her yô. Er kwase ne nenge jighjigh u taver u Claudete lu a mi la yô, kwagh ne na un hii u henen Bibilo vea Claudete hanma shighe shi ngu zuan a msurshima ken Mkaanem ma Aôndo kpaa.

Ter u Leonardo yange kpen yô, a hen iliam i sha ave sha er una pasen mbaakondoato loho u ken Bibilo u surun ior ishima la yô. Iniôngon na i wasen mbaakondoato la wase un kpishi. A kaa ér: “Kwagh ugen u wasem u wan ishima a ijungwen yam yô, ka isharen yam i wasen mbaakondoato ve fa kwagh u Aôndo la. M na shighe wam kpishi sha u wasen ve shi m ngu wasen ve sha agee am cii. Zum u m nenge or u hiihii u m hen Bibilo a na er batisema yô, ijungwen yam gema hingir iember! Jighilii yô, er baba wam yange saa ku je, lu kwa u hiihii u saan mo iyol kpishi je ne.”—Aerenakaa 20:35.

[Picture on page 5]

Aluer u ôr mbagenev er ishima i lu u ker yô, ishima ia pever we

[Picture on page 6]

Kwaghngeren kpa una fatyô u wasen we u pasen ijungwen you

[Picture on page 6]

U ôron akaa a ior mba ngise i nder ve shin ku la una sur u ishima

[Picture on page 8]

Yesu tôndo zwa ér una va nder mba ve ne un jighjigh la shin ku