Ngu “Ica a Hanmô Wase Ga”
Kporom Hen Aôndo
Ngu “Ica a Hanmô Wase Ga”
ALUER i tôô sha man tar i kar sha uumace yô, uumace gba kwagh cuku cuku ga. Alaghga we kpa u vande henen sha mpin ne, ‘Uumace mba ve gbe kwagh ga ne vea fatyô u yan ikyar kangenaa vea Aôndo Uhembanagee la kpa?’ Aluer Aôndo u iti na i lu Yehova la soo ér se lu ikyua a na yô, kwagh a fatyô u lun nahan. Aôndo soo ér se lu ikyua a naa? Se zua a mlumun sha mpin ne ken mkaanem ma doon tsung ma apostoli Paulu ôr a ior mba fan takerada mba ken Atene la. Ma ken Aerenakaa 17:24-27. Paulu ôr akaa anyiin ken avur ne sha kwagh u Yehova.
Hiihii yô, Paulu kaa ér Aôndo “er tar man akaa a a lu kimi cii.” (Ivur 24) Akaa a doon a nan se iember, a a lu atô kposo kposo ne tese kwaghfan man dooshima u Orgban se. (Mbaromanu 1:20) Aluer se hen ser imba Aôndo ne soo u lun ica a ior mba ve doo un ishima ne yô, a lu shami je he?
Kwagh u sha uhar yô, Yehova “ne uumace cii uma man iôôn kua akaa cii.” (Ivur 25) Yehova kor uuma asev. (Pasalmi 36:9) Ahumbe man mngerem man kwaghyan u a lu hange hange sha ci u uma ne cii ka iyua i Orgban se a ne se yô. (Yakobu 1:17) Nahan a lu shami u kaan ér Aôndo u nan nagh wuee ne ngu ica a vese ga. Gadia se ôr nahan yô, se mba kaan ser a nyume se iyua i fan un shi kporom hen a na la.
Sha utar yô, “Ka sha u môm je man [Aôndo] A er akuraior cii ye.” (Ivur 26) Yehova sangen a sange ior ga, shi ker ior ihyom sha ma gbenda môm ga. (Aerenakaa 10:34) A er nan man una er kwagh nahana? Gadia a er ‘or môm’ u akuraior cii a dugh ken a na yô. “Sar [Aôndo] u ior cii ve war.” (1 Timoteu 2:4) Nahan ian i kporom hen Aôndo la ngi sha ci wase cii, sea lu ior ii shin buter shin sea due ken ityar kposo kposo shin sea lamen zwa môm ga kpaa.
U masen yô, Paulu pase mimi ugen u hemban doon cii, ér: Yehova, ngu “ica a hanma wase ga.” (Ivur 27) Er Yehova a hembe sha won cii nahan kpa, mba ve soo u kporom hen a na sha mimi yô, vea fatyô u zan hen a na hanma shighe cii. Mkaanem nam taver se ishima ér ngu ica ga, kpa “ngu ikyua ikyua a mba ve yer Un cii.”—Pasalmi 145:18.
Mkaanem ma Paulu man tese wang ér Aôndo soo ér se kporom hen a na. Nahan kpa, Paulu pase ér ka mba ve we iyol u ‘keren Aôndo’ shi ‘peven Un’ la tseegh a ne ve ian i kporom hen a na ye. (Ivur 27) Ngeren ugen u mbageman Bibilo kaa ér “asember a ahar ne nga ôron kwagh u keren kwagh u se fe ser se zua a mi yô . . . shin u tômon kwagh u se fe ser se zua a mi yô.” U tesen ikyav yô: Tôô wer u nyôr ken iyou i i we ime kpishi, i ú vande fan i yô. U ngu peven ave keren pe imenger i lu yô, u fa ken ishima you wer er u lu keren i nahan u zua a i keng. Aluer se mba keren Aôndo sha mimi shi peven un yô, se mba a vangertiôr ser iniôngon yase ia saa gbilin ga. Paulu kaa a vese ér se “zua a Na.”—Ivur 27.
Sar u u lun ikyua a Aôndo? Aluer u hii u ‘keren’ un shi ‘peven Un’ sha jighjigh yô, u va ahenge ga cii. Yehova taver u zuan a na ga, gadia ngu “ica a hanmô wase ga.”