Tese Ônov Ou

Yange Sar Un u Wasen

U FA or u nan gbe angev kpoghuloo yôô?—Sar ú u ma u er kwagh u wasen nana?— Aluer or shon ka or u ken tar ugen kposo shi nan eren kwaghaôndo môm a we ga kpa u soo u wasen nana? U soo u wasen nan sha er angev mbu nan la mbu a bee kpa?— Ka kwagh u wanyekwase u kiriki ugen yange er je ne. Wankwase ne lu ken tar u Iserael anyom kar hegen wa kuman 3,000. De se time sha kwagh u yange za hemen yô.

Tar u Iserael u wankwase ne lu ker la yange u shi nôngon ityav vea tar u Shiria u u wa ndor a u la. (1 Utor 22:1) Iyange igen yô, Mbashiria va kôr wankwase u kiriki ne yem a na uikyangen. Ve yem a na ken tar ve, za lu kpan u kwase u Naaman, kurutya u Mbashiria. Naaman lu a bouange u i yer ér imande la. Angev mbun ka mbu vihi or kwavyolough.

Wankwase u kiriki ne yange kaa a kwase u Naaman ér un fa kwagh u una bee nom na angev mbun yô. A kaa ér: ‘Naaman una lu ken Samaria yô, profeti u Yehova, Elisha ma a bee un imande.’ Gbenda u wankwase ne ôr kwagh u Elisha la na yô Naaman na jighjigh ér alaghga tsô una fatyô u been un angev mimi. Tsô Benhada, tor u Shiria na un ian ér a za. Nahan Naaman mough vea mbatomov mbagenev ve gba yemen gôgô zende u kuman mai deri môm la ér vea za nenge a Elisha.

Ve hii zan hen Yehoram, tor u Iserael. Ve za tese un washika u Tor Benhada nger ér i wase Naaman la. Kpa Yehoram na Yehova jighjigh ga, shin profeti na, Elisha kpaa ga. Yehoram hen wener Benhada ngu keren gbenda u nôngon ityav a na. Elisha ongo nahan yô, a kaa a Tor Yehoram ér: “De, a̱ va her a mo.” Elisha soo u tesen er Aôndo a lu a tahav mbu been Naaman angev yô.—2 Utor 5:1-8.

Naaman za nyer hen ya u Elisha a anyinya na kua akeke na yô, Elisha tindi wanakiriki na ér a za kaa un wener: ‘Za, za ôô iyol shin Yordan kwa taankaruhar, tsô angev mbua bee u.’ Ishima maa vihi Naaman. A hen ér Elisha una due una va tiligh uwegh sha imande na la maa ia bee. Kpa a gema a tindi a tindi wanakiriki na! Tsô Naaman goom sha ishimavihin gba yemen ken tar na.—2 Utor 5:9-12.

 Yange wea lu môm ken mbatomov mba Naaman nahan ma u er nena?— Mbatomov mbara kaa a na ér: ‘Aluer una kaa er u̱ er ma zegekwagh je yô, ma u er ga shinii? Nahan er nan u er ankwagh u cuku u a kaa ér ôô iyol, tsô ú hingir wang ne ga?’ Naaman ungwa kwagh u ve ôr un la. Tsô a hungwa “a mire kwa taankaruhar shin Yordan, . . . nahan iyol na hide her, hingir er iyol i wanikyundan nahan.”

Naaman hide hen Elisha va kaa ér: “Nenge, hegen m fa Aôndo ugen ngu sha won ga saa ken Iserael.” Shi a tôndo zwa ér mayange una kera “naan mbaaôndo mbagenev nagh ku nanden shin ku sôngon ga, saa TER tsô.”—2 Utor 5:13-17.

We kpa u soo u wasen or nana fa kwagh u Yehova man ityom na, er wankwase u kiriki ne nahanaa?— Shighe u Yesu lu shin tar la, orimande ugen na un jighjigh nahan kaa a na ér: “Wea rumun yô, U fatyô u wanger mo.” U fa kwagh u Yesu ôr a na kpa?— A kaa ér “m rumun.” Yesu bee un angev vough er Yehova kpa bee Naaman angev nahan.—Mateu 8:2, 3.

U fa kwagh u tar u he u Aôndo una va a mi, u ior mba vea lu ker vea lu uma gbem shawon, or môm nana gba angev ga la kpa?— (2 Peteru 3:13; Mpase 21:3, 4) Sha kpôô yô, a doo ú u ôron mbagenev kwagh u tar u doon ne!

Mbampin

○ Wankwase u kiriki ugen yange wase Naaman u ior nav kôr un yem a na uikyangen la nena?

○ Er nan ve sha hiihii la Naaman soo u eren kwagh u Elisha kaa ér a er la ga, man lu nyi i na ve gema ishima?

○ Aluer u soo u dondon ikyav i wankwase u kiriki la yô, kanyi i gbe kpee u ú eree?

○ Yesu yange er nyi, man uma una doo ken tar u he u Aôndo la sha ci u nyi?