I LU nahan, u nenge or eren kwaghbo vee?— * Samuel yange nenge. Yange lu hen ijiir i ú hen wer, ior ma ve eren asorabo her ga yô. Ijiir shon yô lu tabernakel u Aôndo shin ijiir i civir Aôndo; tabernakel ne lu ken gar u Shilo. De se nenge ase er tabernakel yange hingir u lun ya u Samuel yô; kwagh ne er hemba anyom 3,000 hegen.

Hana, ngô u Samuel yange lu tômon wan kpishi; shighe la lu a mar Samuel ga. Nahan zum u Hana za ken tabernakel yô, a er msen hen Aôndo sha kwagh ne. Yange er msen ne tsung je yô, zwa na kar lu tenger. Nahan pristi u tamen, Eli, hen ér ngu hunden. Kpa fe ér ka ihyundugh ga, ka mvihi u i vihi un ken ishima la man a eren msen nahan yô, a ver un doo doo, a kaa a na ér: “Aôndo u Iserael A̱ na u kwagh u u sen Un yô.”—1 Samuel 1:17.

Shighe kar yô, Hana mar Samuel, nahan saan un iyol kpishi tsô a kaa a nom na Elkana ér: ‘Samuel una deen atumba yô, me za a na hen tabernakel a̱ za lu her a civir Aôndo.’ Man lu kwagh u yange er kpaa je la! Hen shighe la, alaghga Samuel lu anyom anyiin shin ataan nahan.

Eli yange beeyol hen shighe ne, shi ônov nav, Hofeni man Pinehashi lu civir Yehova sha mimi ga. Kwagh u vihin je yô, ve lu yaven a kasev mba ve vaan ken tabernakel la kpaa! U hen wer ter ve yange ma er a ve nena?— Een, yange ma tsaha ve, ma lumun ér ve za hemen u eren akaabo ga.

Samuel u lu iyev la, lu vesen hen tabernakel la, man a shi nan kpa, yange fa kwagh u dang u ônov mba Eli lu eren la. Samuel dondo ikyav ve i bo laa?— Ei, á za hemen u eren kwagh u dedoo, er mbamaren nav tese un u eren nahan. Ka nahan ve, ishima vihi Yehova a Eli kpishi ye. Nahan Yehova tindi  profeti ugen ér a̱ kaa Eli yô, una tsaha tsombor na, hemban je yô ônov nav mba wan dang mbara.—1 Samuel 2:22-36.

Samuel lu wanakiriki u Eli, lu shiren un tom ken tabernakel. Iyange igen yô, Samuel lu yaven, maa imo yila un. Tsô Samuel va ayem hen Eli, kpa Eli kaa a na ér, m yila u ga. Imo la shi yila un sha kwa uhar. Kpa, ngi yer un acin atar yô, Eli kaa a Samuel ér shi ia yila u yô kaa wer: “TERE, gba ôron kwagh tsô, gadia wanakiriki Wou ngu ungwan.” Samuel er nahan yô, maa Yehova lam a na. U fa kwagh u Yehova ôr a Samuel kpa?—

Tsô Aôndo ôr Samuel awashima na u yange vande ôron ér una tsaha ya u Eli la. Sev mbu aven yô, Samuel cia u ôron Eli kwagh u Yehova ôr un la. Kpa Eli zamber a Samuel wener: “De yeren mo un ze.” Tsô Samuel pase Eli hanma kwagh u Yehova kaa ér Una er cii, vough er profeti u Yehova ugen vande ôron Eli nahan. Eli gema kaa a na ér: “[Yehova] A̱ er kwagh u a doo Un yô.” Shighe kar yô, i wua Hofeni man Pinehashi, Eli kpa saa ku.—1 Samuel 3:1-18.

Kpa Samuel yô, lu ‘vesen, TER lu a na.’ Hen shighe ne, alaghga Samuel lu anyom pue kar, man er se fe nahan, shighe ne ka shighe u injaa ken uma u agumaior. U hen wer er mbagenev lu eren akaa a dedoo ga yô, yange a taver Samuel u eren kwagh u dedoo ga he?— Er taver Samuel nahan kpa, a za hemen u civir Yehova sha mimi sha ayange a uma na cii.—1 Samuel 3:19-21.

We yô, u soo wer u lu nena? U soo u lun er Samuel nahan, zum u ú vese kpa? U za hemen u eren kwagh u dedoo kpa? U za hemen u dondon atesen a Bibilo shi eren kwagh u mbamaren ou ve tesen we la kpa? Aluer u er nahan yô, a saan Yehova kua mbamaren ou iyol kpishi.