Kporom hen Aôndo

“Aôndo u A Lu a Ishimasurun Cii” La

2 Mbakorinte 1:3, 4

AKAA nga kpishi a nga a na ior ve ule shin shawon je kpa a due ve ishima yô, er ican i yan man lanshima kua mtswenem nahan. Shighe u imba kwagh ne i er u yô, alaghga u hen a ishima you wer, ‘Ka han jim me shi zua a iwasene?’ Mkaanem ma Paulu ma i nger ken 2 Mbakorinte 1:3, 4 la pase or u nan surun se asema hanma shighe yô, ka Yehova Aôndo je la.

Ivur u sha 3 la yila Aôndo ér “Ter u A lu a mhôônom ma zungwen” yô. Inja i ishemberkwaghôron ne ér nyi? Ishember i ken zwa Grika i í gem ér “mhôônom ma zungwen” la, ka u kunya kôron or a mba ve lu yan ican la. * Takerada ugen u pasen Bibilo kaa ér a fatyô u geman ishember ne ér “kunya u kôron” shin “u wan or ikyo kpishi.” “Mhôônom ma zungwen” ma Aôndo ka ma mgbegha un a er kwagh sha ci wase. Er se fe ser Aôndo ka u zungwen mhôônom yô, se soo u kporom ikyua a na, shin ka nahan ga?

Paulu shi kaa ér Yehova ka “Aôndo u A lu a ishimasurun cii” yô. I kaa ér ishember i Paulu a er heen ne i wa u “kumbur or u kwagh a ze nan iyol shin u nan lu zungwen man u wasen nan shin taver nan ishima.” Bibilo i í yer ér The Interpreter’s Bible la kaa ér: “Ka se sur or u kwaghvihin a er nan la ishima zum u se lam a nan kundu kundu sha er nana taver ishima her yô.”

Alaghga u pine wer, ‘Aôndo surun se asema shi ne se agee a se taver ishima her nena?’ Surun se asema ken Bibilo, i í lu Mkaanem nam la kua ian i a ne se i eren msen hen a na la. Paulu kaa ér Aôndo tese se dooshima sha u nan se Mkaanem nam sha er “se̱ lu a ishimaverenkeghen sha . . . ishimasurun i ken icighanruamabera la.” Heela tseegh ga, ka sea er msen hen a na sha gbashima yô, se zua a “bem u Aôndo u a gande hanma mfe wase cii” la.—Mbaromanu 15:4; Mbafilipi 4:7.

Yehova surun ior nav asema nan je? Paulu kaa ér Aôndo ‘surun se asema sha atsan a ase cii.’ (2 Mbakorinte 1:4) Sea tagher a nyityô mzeyol shin ishimanyian shin ican kpaa, Aôndo una na se ishimataver man agee a se taver ishima her yô. Sha mimi yô, ishima gba u shimi ga he?

Ishimasurun i Aôndo la saa sha or u a sur nan ishima la tseegh ga. Paulu za hemen wener Aôndo surun se asema sha er se kpa “sé fatyô u surun mba ve lu ken hanma ican la ishima sha ishimasurun i se ayol a ase kpaa Aôndo A sur se asema a mi la.” Aôndo ka una sur se asema yô, kwagh ne a na se kpa kunya u kôr se a mbagenev, nahan ishima i mgbegha se u wasen ve.

Er Yehova a lu “Aôndo u A lu a ishimasurun cii” nahan kpa, u ngu wer been a bee a mbamzeyol shin mnyoon wase kera jimin cii ga. Kpa, se fa dedoo ser: Aluer se gema hen a na ser a̱ sur se asema yô, a lu nyityô mzungu shin mzeyol je kpa una na se agee a wan ishima a mi. Sha kpôô yô, doo u se civir Aôndo u a zungu mhôônom ne shi se wuese un kpaa.

[Footnote]