Ka An Nan Tsenge Ôron Kwagh u ken Hemenee?

“Mo M ngu Aôndo . . . , u M pasen hii sha mhii zan zan mkur, man hii sha ayange a tsuaa la je, akaa a a lu a vande eren ga la.”—Yesaia 46:9, 10.

KEN ayange a ase a tar u lu kpegher kpe kpegher ne, mbatôvon kwagh u patii man kwagh u inyar man u mlu u ior, tôv akaa a yange er ngise ngise la man akaa a á lu eren ainge ne sha er vea tsenga fan kwagh u una va er ken hemen yô. Mbagenev yô, sar ve tsung u fan er uma ve una lu ken hemen yô, nahan ve tume ityough ken akombo a civir man ishor i kpehen. Ashighe kpishi ambaaior la nga a zua a kwagh u ve soo la ga. Nahan mayange je gbenda ngu u se fa kwagh u una va er tar ne man tsombor wase shin se ayol a ase ga shinii? Jighilii yô, or ngu u nana fatyô u tsengan fan kwagh u ken hemen je kpa?

Yehova Aôndo u hemban agee la yange pase profeti Yesaia ken mkaanem ma i nger sha heen ne ér un ngu a tahav mbu tsengan fan kwagh u ken hemen. Aôndo tsengaôron sha zwa u Yesaia ér Mbababilon mba ve kôr Mbaiserael ve yem a ve uikyangen ken tar ve la vea pase ve, vea hide a va maa Yerusalem shi vea maa tempel kpaa. Kwaghôron u profeti ne yange kure sha mi vough nena? Yesaia yange yila Shirushi sha iti ér ka un una tim Babilon ye, man a ôr kwagh ne anyom 200 ken ijime. Heela tseegh ga, Yesaia shi pase vough er Shirushi una er kwagh ne yô; a kaa ér una goom a Ifi u Uferati u yangen mbaihyomov u tan num sha gar u Babilon la. Yesaia shi tsenga pasen ér a ver ihindagar la ivegher, nahan Shirushi una nyôr a akum a na una ngohol gar la fese.—Yesaia 44:24–45:7.

Orumace ngu a tahav mbu tsengan fan kwagh u ken hemen ga, ka Aôndo a lu a imba utaha la ye. Tor u fan kwagh, Solomon yange nger wener: “De sugh kwagh iyol you sha ci u kper ga, gadia u fa kwagh u iyange ia va a mi ga.” (Anzaakaa 27:1) Mkaanem nam man ka ma mimi, hii shighe u i nger ma la je zan zan nyian. Orumace môm nana fatyô u tsengan fan kwagh u una er nan tsô kpaa ga. Er nan ve Aôndo yô a tsengan fan kwagh u ken hemenee? Aôndo fa hanma kwagh u a gbe la vighe vighe; a fa mlu u orumace man er ishima i nan i lu la kpaa. Nahan ka a gba un u tsengan fan kwagh u ior asange asange shin ikyurior ia er yô, a tôv a fa. Heela tseegh ga, ngu a tahav mbu kôôm kwagh sha er una za a kure er a soo la vough; man tahav nav mbun mbu a ikighir ga. Yange una tsengaôron kwagh sha zwa u profeti na yô, ‘a taver kwaghôron u wanakiriki Na la, shi a kure kwagh sha imo i ortom Na vough.’ (Yesaia 44:26) Ka Yehova Aôndo tseegh una fatyô u ôron mkaanem ma i nger ken ivur ne vough ye.

Yesaia yange lu uma anyom kar hemba 700 cii man shighe u Yesu, u lu Mesiya la ye. Nahan cii kpa, Yesaia tsengaôron kwagh u mve u Mesiya la. Kpa hii ken derianyom u sha 18 la zan zan hegen, mbapuun Bibilo kaa ér takerada u Yesaia la ka u mimi ga. Ve senge ér akaaôron a profeti a Yesaia la cica cii i tsenga ôron á ga, kpa ka er Mesiya yange va hide yem nahan cii ve orgen nan nger akaa a Mesiya yange er la ken takerada ne ye. Ka nahan mimii? Ken inyom i 1947 la, i zua a ngeren u takerada u Yesaia kua uihyurenmbaruamabera mbagenev ken bar ugen ikyua a Zegemnger u Kuugh. Mbatôvonakaa kaa ér yange i gber ngeren u takerada u Yesaia ne hemba  anyom deri môm cii ve i va mase maren Mesiya shin Kristu er yange i tsengaôron nahan la ye. Mimi yô, Bibilo yange i tsengaôron kwagh u ken hemen!

Yesaia man mbangeren Bibilo mbagenev yange ma ve fatyô u tsenganôron kwagh u ken hemen sha mfe ve tseegh ga. Kpa “Icighan Jijingi mgbegha [ve] man ve ôr kwagh u Aôndo ye.” (2 Peteru 1:21) Se ôr akaa agen a Yesaia yange tsengaôron sha kwagh u uma u Yesu ken kwaghngeren u a dondo ne, man u ken hemen la. Shi se ôr akaa a Yesu man mbahenen nav tsengaôron ér aa er sha shighe wase ne man ken hemen yô.