M Kav Er Uma A Lu Kwagh U Injaa Kpishi Yô

KWAGH ugen yange er pepe sha iyange i Aipor 16, 2007, u yange shi umbur mo er i gbe u me wuese Aôndo hanma iyange i a kuram m lu uma cii yô. Sha iyange la, m yer ken afishi agen sha kpoyou u sha utar u iyou i Norris Hall ken makeranta u vesen u i yer ér Virginia Tech la.

Pepe la, m lu ken afishi am, m lu nôngon me due me za tôô uwashika av shin kpoyou u sha uhar la. Hen shighe la profesôr ugen va sôôn, a kaa a mo ér m za wase un u sôron kwagh ken kômputa na. Se mba ngur yemen se za nyôr ken afishi a na yô, se ungwa imo gbuuka acin imôngo shin kpoyou u sha uhar la. Er se fa kwagh u lu zan hemen jighilii ga yô, se yevese se nyôr ken afishi a na, se wuhe hunda, se lu henen kwagh u una er se yô. M ker ijiir ken hua m za yer, tsô m gba eren msen hen Yehova mer aluer ka nyi je kpa a̱ wasem.

Shighe u se yer ken afishi, se lu tamber ser se fa kwagh u a lu zan hemen la, m umbur kwagh ugen u yange erem anyom 15 ken ijime yô. Yange m lu ormekanik u sôron mato. M lu eren tom iyange igen, maa ishegh i mkure i ormekanik ugen u se eren tom imôngo kôr sha uwe yô kôr usu bur. Maa a gema i fele a kende kera, kpa kwagh ka a er yô, a kende i sha ishigh yagh jighjigh! Nombor usu la hiam, hii sha ishigh due shin vanger. Nahan i tôôm shin igirgi i purugh, i yem a mo hen iyouci i eren twer-usu. I kôrom gande, m lu ken iyouci la kuma iwer itiar man tiôn; m lu nôngo a uma wam. I erem twer kpoghuloo, shi i verem hen ijiir i me hide sha iyol yam yô, iwer ngi kar itian yô, m mase hiden hen ya a iwuese shin ishima er m lu uma her yô. Kwagh u yange erem ne wasem u nengen hanma iyange i uma wam me ka kwagh u injaa kpishi. Man er m lu Orshiada u Yehova yô, hii shighe la je m seer kangen ishima mer me za hemen u civir un a nem uma la, ka Yehova Aôndo je la.—Pasalmi 90:12; Yesaia 43:10.

Er lu u me kera fatyô u eren tom u sôron mato ga sha ci u aikyôr ne yô, m hen kômputa u sôron, nahan i tôôm tom hen makeranta u Virginia Tech la. Ka nahan ve, m lu ken Norris Hall pepe la ye.

Fan tsô mo vea profesôr la yange se fa er mtswen-or ugen tôô gbuuka lu tan ior wuan shin kpoyou u sha uhar la nahan ga; mayange or lu a vande wuan ior sha gbuuka ken tar u Amerika imba ne ga. Mtswen-or ne yange wua iorov 32, maa mase wuan iyol na. Or ne yange hii u wuan ior miniti mba kar 20 nahan yô, maa se ungwa imo i udasenda sha ihia i karen. Se ta ikyenge se yila ve, tsô ve nyôr kimi ve kua a vese ve due a vese ken won.

Kwagh u vihin tsung u yange er ne wasem u fan er uma a ngôôr ga man er uma a iv a mbamzeyol yô. (Yakobu 4:14) Nahan hemba doon u se suur sha Yehova Aôndo, un u a ne se uma la, shi se nengen hanma iyange ser ka iyua i injaa ia ne se yô.—Pasalmi 23:4; 91:2.

[Picture Credit Line on page 31]

AP Photo/The Roanoke Times, Alan Kim