Mliam ma ken Ishegh

GUMOR ugen yange hingir or u azende-azende. Er tume un iyol a ican na, shi mliam iv un ashe yô, a zamber a Yehova, Aôndo na u erdoo man u zungwen mhôônom la, wener: “Haa mliam am ken ishegh You.” (Pasalmi 56:8) Gumor ne lu Davidi; kwagh ne er zum u lu keghen shighe u una tema tor sha Iserael la. Kpa kanyi i lu ishegh i a er kwagh u i nee, man Aôndo una haa mliam asem ken ishegh nena?

Davidi yange lan ishegh ga. Ishegh lu ikyagh ki i haan mngerem ker shin mkurem shin wain shin ahôm a bua je kpaa yô. Zan zan hegen kpa ijô igen i ken deserti u Sahara, i í hembe zenden a zende, inja er zwa u Tuareg la nahan, ngi hee mngerem ken ishegh i í er i sha ikyôvor ki ivo jimin cii shin ki iyôngo yô. Ishegh i sha akôv a inyam ne, ka a lu inyam i vesen yô, ishegh shon i lu a ian i haan mngerem ker kpishi. Shi ior fa er i ndôhôr mngerem kpishi yô, ka a lu ken deserti sha shighe u iyange i te kpishi je kpa i ndôhôr mngerem her. Sha ayange a ngise la, a̱ haa mngerem ken ishegh ne yô i penda i sha jaki shin rakumi. Ayange ne yô, u fatyô u nengen a imba ishegh ne shin mato ugen u taver iyol u i hembe zenden a mi ken taaikyôngo la!

Se kpa mkaanem ma Davidi ma kôron ken ishima ma yange ôr sha kwagh u ishegh i sha akôv a inyam ne ma a fatyô u wasen se. Ma a wase se nena? Bibilo kaa ér Satan ngu hemen tar ne, shi i kaa ér “ishima vihi un tsung” sha shighe wase ne. Sha nahan yô, tar iv a mbamzeyol kpishi. (Mpase 12:12) Sha ci u ityôkyaa ne yô, ior kpishi mba yan ican, ishima vihi ve ker tsung, ve ure kpaa er Davidi nahan, hemban je yô mba ve lu nôngon ér vea er ishima i Aôndo la. We kpa kape kwagh wou a lu laa? Mbajighjigh mban mba nôngon sha ishimataver a “mliam ashe” je kpaa ér vea za hemen u civir Aôndo. (Pasalmi 126:6) Amba la a̱ fa ér Ter wase u sha fa ameen a ve lu tagher a mi la man mnyoon u ken ishima u ameen ne á ne ve la kpaa. Sha mimi yô, Aôndo fa mnyoon u mbacivir un man mhôônom kôr un a ve, ngu umbur mliam vem man ican ve, nahan ka inja er a koso mliam vem ken ishegh na nahan.