Tom u Maria Er sha u Kuren Awashima u Aôndo Yô

ZUM u Yesu lu zenden pasen ior kwaghaôndo shi been ve angev la, kwase ugen ken ikpelaior genger imo kaa ér: “Saan iyav mbu mbu mar U la iyol, man atumba a U me a la!” Luun er Yesu yange una soo ér ior ve civir ngô na yô, kwaghôron u kwase ne lu ian i dedoo i Yesu ma kaa ér ior ve gema civir ngô na yô. Kpa Yesu gema kaa a kwase ne ér: “Kpa jim yô, i saan mba ve ongo kwaghôron u Aôndo man ve eren sha mi kpaa la, iyol.”—Luka 11:27, 28.

Yesu yange gema ngô na hingir un kwase u una civir ga; shi ma shighe môm tsô kaa a mbahenen nav ér ve civir un ga. Aluer ka nahan yô, kwagh u mbananjighjigh kpishi ve civir Maria la di ye? Se nenge ase nen kwagh u Bibilo i er sha atesen a sha kwagh u ngô u Yesu a ior kpishi ve lumun a la.

“We u i Rumun We sha Mhôôn Tsung ne,” “I̱ Wuese We ken Ukase Cii”

Ortyom Gaberiel yange ôr Maria tom u una er sha u kuren awashima u Aôndo yô. Yange va sôôn hen Maria yô, á sugh un á kaa ér: “Mba sughun we, we u i rumun we sha mhôôn tsung ne, Ter ngu a we.” (Luka 1:28) Bibilo igen gema ishughun ne nahan ér: “Mba sughun we, u iv a gratia, Ter ngu a we.” Ayange nga kaa yô, Elisabetu kpa sugh Maria wener: “I̱ wuese we ken ukase cii, Wan u ú va mar Un la kpaa i̱ wuese Un.” (Luka 1:42) Asember a yange i sugh Maria a mi ne cii tese ér doo u a civir un gaa?

Jighilii yô, doo u a er nahan ga. Asember a yange i sugh Maria a mi ne nga ken msen u Mbafada ve eren hen Maria yô, nahan kpa, Bibilo iyol i í yô, i̱ pase ma ityôkyaa i  môm i í doo u se eren msen hen Maria ga. Gaberiel man Elisabetu yange ve sugh un sha asember ne sha u tesen ér ve kav ian i icivirigh i Maria lu a mi la, gadia gba u una mar Mesiya. Nahan kpa, ma ijiir i môm tsô Bibilo kaa ér se eren msen hen a na ga. Zum u mbahenen mba Yesu kaa a na ér a̱ tese ve u eren msen yô, er Yesu ma tese ve ér ve eren msen hen Maria yô, á pase ve ér ve eren msen hen Ter na. Nenge ase yô, msen u Yesu tese ve, u ior ve fe un wuee la hii sha asember ne: ‘Ter wase u Sha.’—Mateu 6:9.

Ngu Môm ken Mba Ve Lu Utor La

Ityesen igen i ior kpishi ve lumun a mi sha kwagh u Maria yô kaa ér ngu “Torkwase u sha” hegen. Mayange je Bibilo yila un ma ijiir i môm ér Torkwase u sha ga. Nahan kpa, i̱ tese ér Aôndo na un tom u injaa ken mtemtor na u sha la. Kanyi tom laa?

Yesu yange pase wener mbahenen nav mbajighjigh mbagenev vea tema tor a na ken Tartor na. (Luka 22:28-30) Yesu una na mba i tsough ve la tahav mbu lun “upristi sha ci u Aôndo wase, vea tema tor sha tar.” (Mpase 5:10) Bibilo ôr akaa a a wase se u kaan ser Maria kpa ngu môm ken mba i ne ve ian i vesen ne yô. Er nan ve se er nahana?

A lu ú umbur yô, shighe u Yesu kpe kera la, Maria “zua ishima i môm sha msen u eren” vea mbahenen mba Yesu man anngôôv nav. Nomso man “kasev mbagenev” er 120 nahan yange ve kohol imôngo sha ci u ityôkyaa ne. (Aerenakaa 1:12-15) Bibilo kaa ér, “iyange i Pentekosti kom yô, ve cii ve kohol ijiir i môm” zum u i haa ve icighan jijingi u Aôndo la, nahan ve gba ôron kwagh ken ijô igen.—Aerenakaa 2:1-4.

Maria lu môm ken mba ve iv a icighan jijingi sha iyange ne yô, kwagh ne tese ér ngu ken mba i tsough ve ér ve za tema tor a Yesu imôngo sha Tartor na u sha la. Nahan kwagh ne ka ikyav i tesen ér Maria tema vea Yesu sha iengem i sha la hegen. (Mbaromanu 8:14-17) Hen ase sha tom u injaa u un vea mbagenev mba vea tema tor a Yesu imôngo vea er sha u kuren awashima u Aôndo la.

Vea Va a Averen a Dedoo

Takerada u Mpase kaa ér á nder iorov 144,000 shin ku á na ve iengem i sha, vea lu upristi man mbaajiriv man utor a Yesu imôngo. (Mpase 14:1, 4; 20:4, 6) Er vea lu upristi yô, vea yar tom a injar i nagh ku Yesu la sha u wasen uumace mba ungwan imo i Aôndo jimin cii sha er vea hingir vough sha gbenda u ve civir Aôndo man sha aeren a ve man sha iyol kpa yô. (Mpase 21:1-4) Mbacivir Yehova sha mimi cii vea ember sha shighe u injaa ne kpishi! *

Maria yange er tom u injaa, man zan zan hegen kpa ngu eren tom u injaa u kuren awashima u Yehova. Er yange hide a iyol ijime shi lu ngô u civir Aôndo kpoghuloo shi wa ishima shin er tagher a ameen nahan kpaa yô, a kuma u se kav un. Yange mar Mesiya shi una wase u eren tom u van a injar i nagh ku Yesu la hen uumace, sha nahan yô, á kuma u se na un icivir tsung.

Nahan cii kpa, kwagh u hemban doon u se fatyô u henen hen Maria yô ka mcivir u yange civir ma aôndo ugen ga, saa Yehova tseegh, vea mbajighjigh mbagenev la. Maria genger imo vea mbagenev mba vea tema tor a Kristu sha la, ngu kaan nahan ér: “Un u A tem sha ikyônough ki torough la man Waniyôngo kpaa, ve̱ lu a iwuese man icivir man iengem man tahav gbem sha won.”—Mpase 5:13; 19:10.

[Ngeren u shin kpe]

[Mkaanem ma sha peeji 10]

Doo u se kav Maria sha ieren na i hiden a iyol ijime man jighjigh na la shi se ungwan imo i Aôndo er un nahan