Saa a Mar or Hegh ve Nana Zua a Myom Yee?

AUER or pine u ér, “I mar u hegh vee?” nahan, u na mlumun wer nyi? Mbakristu umiliôn imôngo sha tar cii vea na mlumun sha mpin ne a ishima i môm ér “Een!” Ve na jighjigh ér saa hanma Orkristu u mimi yô, a mar nan hegh, shi ka cii gbenda u or nana zua a myom je la. Mbakristu mban lumun a mnenge u mbahemenev mba kwaghaôndo ve lu a mi sha kwagh u mar or hegh la, er mnenge u ortimen sha akaa a kwaghaôndo ugen u i yer un ér Robert C. Sproul la nahan. Yange nger ér: “Aluer i mar or hegh ga yô, . . . nan ngu Orkristu ga.”

We kpa u na jighjigh wer saa a mar or hegh ve nana zua a myom yee? Aluer ka nahan yô, se fa tsô ser u soo u wasen anmgbianev ou man ahuraior a ou wer ve kpa i mar ve hegh. Kpa cii man i mar ve hegh yô, gba u vea fa mkposo u or u i mar nan hegh man u i mar nan ga la. Nahan u pase ve inja i u maren or hegh la nena?

Ior kpishi na jighjigh ér ishember i “mar or hegh” la ngi ôron kwagh u or u nan er iceghzwa ér nana civir Aôndo man Kristu yô, sha nahan yô nan kera ngu paleghaa a Aôndo ga, kpa nan ngu a na kangenaa.

Ú soo u fan kwagh u Mkaanem ma Aôndo ma tese jim jim sha kwagh u mar or hegh laa? Aluer u time sha itinekwagh ne vighe vighe yô, u zua a mtsera. Sha ci u nyi? Aluer u fa kwagh u a lu u maren or hegh la wanger we yô, mfe ne una bende a uma wou man ishimaverenkeghen you kpaa.

Bibilo Tese Ér Nyi?

Ishember i “mar or hegh” la ngi ken Yohane 3:​1-12. Avur ne ôr kwagh u iliam i doon tsung, i Yesu vea orhemen kwaghaôndo ugen ken Yerusalem. I nger avur ne jimin cii shin heen. Se mba taver we ishima ser ôr avur ne vighe vighe.

Ken avur ne, Yesu ôr kwagh u ishember i “mar or hegh” la sha igbenda kposo kposo. Sha kpôô yô, iliam i Yesu la wase se u zuan a mlumun sha mbampin mba hange hange utaan. Ka mbampin mba shon je ne:

◼ M-mar u he la ngu a inja nena?

◼ Ka se ayol a ase se tsua u lun mba i mar ve hegh yee?

◼ Er nan ve i gbe u a mar ior heghe?

◼ A mar or hegh nena?

◼ Kwagh ne ka a gema mlu u or vea Aôndo nena?

De se time sha mbampin mban sha adondo adondo.

 [Ngeren u kiriki/Foto peeji 4 la]

“Ka u Á Mar Ne Hegh Keng”

“Orgen lu ken Mbafarishi, iti na er Nikodemu, lu orvesen u Mbayuda. Un va her a Na tugh, va kaa a na er: Rabi, se fa U ngu ortesen, ka sha Aôndo U ve ye, gadia ma or nana fatyô u gban eren uivande mba U eren ne ga, saa Aôndo Una lu a nan. Yesu gema kaa a na er: Mimi mimi je, M kaan we ne, saa á mar or hegh, gayô, nana fatyô u nengen tartor u Aôndo ga. Nikodemu kaa a Na er: Á er nan man á mar or zum u nan vande been iyol kera? Nana fatyô u shi nyôron ngô u nan ken uya, á shi á mar nana? Yesu gema kaa er: Mimi mimi je, M kaan we ne, saa á mar or sha mnger kua Jijingi, gayô, nana fatyô u nyôron tartor u Aôndo ga. Kwagh u a dugh ken iyol yô, ka iyol je; man kwagh u a dugh ken Jijingi ka di jijingi je. I̱ de kpiligh we iyol er M kaa a we Mer: ka u á mar ne hegh keng la ga. Ahumbe ka a karen sha ishima i a, u ungwa ihuran i a je, kpa u fa ape a dugh man henpe a ze kpaa ga. Kape hanma or u i mar nan ken Jijingi nan lu la. Nikodemu gema kaa a Na er: Ka sha hanma gbenda man akaa ne aa fatyô u erene? Yesu gema kaa a Na er: We, u ngu ortesen u Iserael, man er nan u kav akaa ne ga? Mimi mimi je, M kaan we ne, se mba er kwagh u se fe, man shi se mba pasen kwagh u se nenge yô, kpa ne mba lumun mpase wase la ga. Aluer Me ôr ne akaa a taregh man ne na jighjigh ga yô, á er nan man Me ôr ne akaa a Sha, ve né na jighjighi?”​—⁠Yohane 3:​1-12.