Kporom hen Aôndo

Ter u Ancôgholov

Ekesodu 22:​22-24

“AÔNDO ka ter u ancôgholov . . . ken icighanyou na.” (Pasalmi 68:5) Mkaanem ma ma dugh hen Aôndo man pase se ieren i Yehova Aôndo, i ka i na se kporom hen a na yô, inja na yô, un nengen sha mba ve lu a or ijime ga la. Atindi a yange na Mbaiserael la tese er mhôônom ma ker un a mbayev mba mbamaren vev ve sar ku la yô. De se time nen sha kwagh u Bibilo i hii ôron sha kwagh u “ancôgholov” yô, i nger kwagh ne ken Ekesodu 22:22-24.

Aôndo wa tindi ér: ‘De eren ancôghol ican ga.’ (Ivur 22) Mkaanem man yange lu ma zamber a ior ér ve wasen ancôgholov tseegh tsô ga; kpa lu tindi u Aôndo wa kpôô kpôô yô. Wanye u ter u nan a kpe kera yô, nan kera ngu a or u kuran nan shi kuren mbamgbe mba nan ga, sha nahan yô hanmaor cii nana fatyô u nzughul a nan. Or môm kpa yange gba u nana er imba wanye la ican ga. I gema ishember i “ican” la ken Bibilo mbagenev ér “u nzughul” a or shin “u nyighen” or. Yange or a nzughul a ancôghol yô, i lu kwagh u vihin kpen kpen sha ishigh ki Aôndo. Kwagh ne lu kwagh u vihin nan je?

Tindi la za hemen ér: “Aluer ú er [nan] ma ican man [nan] gema [nan] vaa a Mo yô, Me ungwa mliam [ma nan] kpee je.” (Ivur 23) Aluer u ôr ijiir ne ken ngeren u Bibilo u hiihii u ken zwa Heberu la yô, ivur i sha 22 la kaa ér, “de eren nen ma kwasecôghol ican ga, shin ancôghol kpaa ga,” kpa ivur i sha 23 la gema kaa ér, “aluer ú er ve ican” yô. Nahan kwagh ne tese ér, yange gba u ior mba ken tar u Iserael asange asange kua ikyurior i Iserael jimin cii ia kura tindi u Aôndo ne. Yehova lu nengen hanma kwagh cii; yange kegh ato a ancôgholov shi wa iyol kegh a kegh u wasen ve shighe u ve vaa ve yer un yô.—Pasalmi 10:14; Anzaakaa 23:10, 11.

Yange or nana nzughul a ancôghol man una vaa una yila Aôndo nahan nyi i ere? Yehova kaa ér: “Ishima i vihin Yam ia yegh a yegh, Me wua ne sha sanker.” (Ivur 24) Ngeren u pasen Bibilo ugen kaa ér inja i ishember i “ishima i vihin Yam ia yegh a yegh” la “jighilii yô, ka ‘ahenga aa yughur mo,’ man ishember ne ka kwaghôron u sha injakwagh u a tese ishima vihin kpishi yô.” A lu u nenge yô, Yehova yange kaa a mbaajiriv mba ken Iserael ér ve ôron mba ve per tindi ne ijir ga. Kpa gema lu Aôndo iyol na ôron ijir shighe u or nzughul a ma wanye u nan lu a or ijime ga la ye.—Duteronomi 10:17, 18.

Yehova gema ga. (Malaki 3:6) Mhôônom ma ker un a mbayev mba ormaren ve shin mbamaren vev ve kpe cii la. (Yakobu 1:27) Doo u se fa ser, ishima ngi i vihi Aôndo, un u a lu Ter u ancôgholov la ker kpishi shighe u or nzughul a ancôgholov sha ishô ve yô. Hanma or u nan nzughul a wanye u nan lu a or ijime ga la cii nana war “iyugh i TER i tsung la” mayange ga. (Sefania 2:2) Mbaaferev mbara vea kav er “u gban sha ikyev i Aôndo u uma [i lu ] . . . kwagh u cier iyol je” yô.—Mbaheberu 10:31.