YANGE i sember wuan Tor Ahashia ken Yerusalem, gar u tempel u Aôndo lu ker la. Mbamzeyol ngee ken gar la hen shighe la kpishi. Mba woo un cii yô, ngô na Atalia mough er kwagh u kpilighyol kpen kpen. Yange na zwa i wua ônov mba wan na, Ahashia! U fa ityôkyaa i yange na ve er kwagh nahan kpa?​— * Yange er nahan sha er una hingir tor iyol na, i de lu ma wan u wan na ga yô.

Nahan kpa, yange i yer Yoashi u lu môm ken ônov mba Ahashia la ngô na u vesen fa ga, nahan war ku. U soo u fan er yange i er kwagh ne kpa?​— Anmgbian u ter u Yoashi u kwase, iti na ér Yehoshabeati yange za yer un ken tempel u Aôndo. Yange er kwagh ne sha ci u nom na Yehoyada lu Pristi u Tamen. Nahan ve yer Yoashi, i wua un ga.

I yer un ken tempel anyom ataratar. Shighe u lu ken tempel la i tese un kwagh u Yehova Aôndo man atindi a na. Yoashi va kum anyom ataankarahar yô, Yehoyada maa due a na sha er a na un tor yô. U soo u fan er yange Yehoyada er kwagh ne man kwagh u yange er Atalia, ngô u Yoashi u vesen u lu Tor kwase u ifer la kpa?​—

Yehoyada yange tindi loho ken myer i lôhô adugwer a utor mba ken Yerusalem lu a mi sha ayange la. Nahan ôr ve er un man kwase na ve yer wan u Tor Ahashia yô. Been yô, tese adugwer la Yoashi, nahan ve mase kaven er i lu un i gbe u una lu tor jim jim yô. Nahan ve hen sha kwagh u vea er yô.

Yehoyada due a Yoashi va na un tor. Been yô, ior gba kuren “ave, ve kaa er: Tor a̱ tsa sha won!” Adugwer kase Yoashi sha u kuran un. Zum u Atatlia ungwa ayôôso a mbakuran kua a ior yô, a yevese a due ken won a gba kaan ér i dughum myer! I dughum myer! Kpa pristi Yehoyada na zwa nahan i wua Atalia.​—2 Utor 11:​1-16.

U hen wer Yoashi yange za hemen u ungwan imo i Yehoyada shi eren kwagh u injaa?​— Yange za hemen u ungwan un sha ayange a Yehoyada lu  uma la cii. Yoashi shi yange kaa a ior ér ve na inyaregh sha er a hide a sôr tempel u Aôndo u ter na Ahashia man ter na u vesen Yehoram yange ve ver ishima sha mi ga la. Kpa de se nenge ase kwagh u yange za hemen shighe u Pristi u Tamen Yehoyada kpe kera la yô.—2 Utor 12:1-16.

Hen shighe ne Yoashi kuma anyom 40 nahan. Kera za hemen u lun vea ior mba ve civir Yehova la ga, hide hingir u kôron ijende vea ior mba ve civir mbaaôndo mba aiegh yô. Sekaria, wan u Yehoyada lu pristi u Yehova hen shighe la. U hen wer kanyi yange Sekaria er shighe u fa akaabo a Yoashi lu eren laa?—

Sekaria kaa a Yoashi ér: “Er ne undu TER yô, Un kpaa A undu ne ve.” Mkaanem mara vihi Yoashi kpishi je yô, na zwa ér i ta Sekaria awen i wua. Nenge imba kwagh la sha wono—Yoashi u i yer un war ku ne hingir u wuan or hegen.—2 Kroniku 24:1-3, 15-22.

Kwagh ngu u se fatyô u henen ken kwagh ne kpa?— Mayange se soo u lun inja er Atalia u kôr ior ihyom shi wa tswam la ga. Kpa se gema se soo mba ve civir Yehova a vese imôngo la, mbaihyomov asev kpa se eren a ve doo doo vough er Yesu a tese se u eren nahan. (Mateu 5:44; Yohane 13:​34, 35) Shi umbur, aluer se hii u eren akaa a dedoo er Yoashi yange er nahan yô, doo u se za hemen u lun ijende vea ior mba Yehova a doo ve ishima, mba ve taver se ishima ér se civir un la.