Er Ú Ôr Bibilo Ú Kav Yô

1. Sôn Aôndo a wase u

Kwase ugen ken tar u Italia, iti na ér Ninfa, kaa ér: “Shighe ugen ngu u yange mea nyôr u yaven yô, m vande ôron Bibilo cii ve m mase yaven ye. M lu eren nahan sha ci u m fa mer Bibilo ka Mkaanem ma Aôndo, nahan er takerada u ôron doom ga nahan kpa, m soo u fan kwagh u Aôndo a nger ken Bibilo la. Yange m wa ishima u ôron i̱ cica cii been. Sha hiihii la, taver mo u kaven kwagh u m lu ôron la ga, kpa m ze deghôô yô, m tagher a ajiir a taver mo, maa m de u ôron i̱ je.”

WE KPA, imba kwagh u yange er Ninfa ne er u wee? Ior kpishi kwagh vande eren ve nahan. Kpa, er ngeren u hiihii la a tese nahan, Yehova Aôndo u a ne i nger Bibilo la soo ér we u ôr Mkaanem nam shi u kav ma kpaa. Nahan kpa, u er nan ve u zua a imba mkav nee? Kwagh u hiihii u ú er yô, doo u ú pine iwasen hen Or u a ne i nger Bibilo la.

Ior yange ve nengen mbaapostoli mba Yesu ér ka “mba fan takerada yum . . . ga” shi ka ior “mba lun sha kwarkyaa [kpaa] ga,” sha ci u ve za imakeranta i kwaghaôndo ve za ngohol ityesen sha ikyev i mbatesen ga yum. (Aerenakaa 4:13) Nahan kpa, Yesu yange tôndo zwa a ve ér vea fatyô u ôron Mkaanem ma Aôndo shi kaven ma kpaa. Vea kav ma nena? Yesu pase wener: “Orsurunshima, ka Icighan Jijingi je la, u Ter Una tindi ken iti Yam yô, ka Un je, Una tese ne akaa cii . . . ye.” (Yohane 14:26) Aôndo yange gba tar man hanma kwagh u uma u a lu shin u cii sha icighan jijingi na shin tahav mbu tomov nav. (Genese 1:⁠2) Shi ka icighan jijingi ne Aôndo yar tom a mi, mgbegha iorov 40, nahan ve nger mbamhen nav ken Bibilo ye. (2 Peteru 1:​20, 21) Ka icighan jijingi shon môm Aôndo a yaren tom a mi sha u wasen mba ve soo u kaven Bibilo la ye.

U er nan ve Aôndo una na u icighan jijingi naa? Gba u ú sôn un jijingi na sha jighjigh u nan. Sha mimi yô, doo u ú gba  uwer u sônon un jijingi shon ga. Yesu kaa ér: “Sôn nen, á na ne . . . Aluer . . . ne fa u nan ônov enev uiyua mba dedoo yô, man hire Ter wen u A lu Sha Una kera na mba ve sen Un la Icighan Jijingi ga yee?” (Luka 11:​9, 13) Yehova keghen a kegh iyol u nan mba ve sen un a ishima i môm la icighan jijingi na. Tahav mbu tomov mbun mbua wase u u kaven mkaanem ma Aôndo yange na i nger ken Bibilo ngise ngise la. Shi icighan jijingi u Aôndo una wase u u eren kwagh u Bibilo i kaa ér u er la.​—⁠Mbaheberu 4:12; Yakobu 1:​5, 6.

Nahan yô, hanma shighe u ú soo u ôron Bibilo cii, sôn Aôndo a na u icighan jijingi na sha er u kav Mkaanem nam yô.