Er Ú Ôr Bibilo Ú Kav Yô

2. Ôr Bibilo a Ishima i Gbar Gbar

I lu nahan ma ijende you ôr u akaa a vihin sha iyol i or u ú lu a vande nengen a nan ga vee? Yange u va mase nengen a or shon nahan, u de wer akaa a vihin a ijende you ôr u sha iyol na la a yange u u nengen a kwaghfan u nan kua aeren a dedoo a nanaa? Bibilo kpa, ashighe agen kwagh ngu a er i nahan.

APOSTOLI Paulu pase kwagh u aluer se ôr Bibilo a ishima i gbar gbar ga ve, una er se yô. Paulu ôr kwagh u Mbayuda mbagenev sha ayange na la, ér: “M ngu eren ve shiada mer, mba a ishima i tseen sha kwagh u Aôndo kpa ka sha gbenda u kwaghfan ga.”​—⁠Mbaromanu 10:⁠2.

Mbayuda mbagenev mba sha derianyom u hiihii la yange ve venda ér Yesu ngu Mesiya ga, shin er Ruamabera u ken Zwa Heberu la pase kwagh na wang nahan kpaa. Hanma kwagh u Ruamabera u ken Zwa Heberu tese ér una kure sha Mesiya yô, yange kure sha Yesu u Nasareti  la vough, shi yange er hanma kwagh u uprofeti kaa ér Mesiya una er la cii. Nahan kpa, Mbayuda kpishi de ér mhen ve u kpeghee, u ve vande lun a mi sha kwagh u Mesiya la a̱ yange ve u kaven kwagh u Mkaanem ma Aôndo ôr la.

Kwagh u yange er Mbayuda ne tese se nyi? Doo u se ôron Bibilo a ishima i gbar gbar. Aluer or ban a ikyo i wan shi nan ngu a mbamhen mba kpeghee ken ishima i nan shighe u nan lu timen sha kwagh yô, kwagh la una yange nan u kaven mimi u Bibilo la.

Ikyav i tesen yô, profesôr u timen sha akaa a kwaghaôndo ugen u ken yunivasiti i North Carolina, ken tar u Amerika kaa ér, “Bibilo ka takerada u uumace ve nger yô, shi akaa a í ôr ker la kpa ka mbamhen mba uumace. Akaa kpishi a Bibilo i ôr la kaha kposo a akaa a i̱ ôr ajiir agen yô, shi ia fatyô u tesen se kwagh u dedoo ken uma ga.” Aluer or nenge ér Bibilo “ka takerada u uumace,” ka Aôndo a ne i nger i̱ ga yô, kape nana venda u dondon atesen shin akaawan a i̱ a nan lumun a mi ga je la.

Nahan kpa, Bibilo taver se ishima ér se ôron i̱ sha gbashima. Ruamabera ôr kwagh u ior i Berea mba sha ayange Paulu la, ér: “Ve lumun kwaghôron la sha gbashima shi ve lu timen ken icighanruamabera ayange ayange sha u vea nenge shin akaa la aa lu nahan yô.” (Aerenakaa 17:11) Doo u ú ôr Bibilo a ishima i gbar gbar di vough er ior i Berea nahan. Ôron Mkaanem ma Aôndo a ishima i gbar gbar, i maa u iyol u fan loho u injaa u Aôndo.