Ka a̱ Hemba Se Iyol Kpa Á Fa

Levitiku 5:​2-11

KWASE ugen ôr kwagh u iniôngon i á nôngon ér una er ishima i Aôndo yô, ér, “yange m shi nôngon sha afatyô wam cii mer me er ishima na, kpa m nenge mer iniôngon yam la kuma ga.” Mbacivir Yehova Aôndo ka vea nôngon kpoghuloo ér vea er ishima na nahan á lumun ve kpa? A fa er tahav vev man er mlu ve la una fatyô u panden kwagh u ve soo u eren sha u civir un kpa? De se time nen sha kwagh u iniav mbigen mbi i er kwagh u mbi ken Tindi u Mose, ken Levitiku 5:​2-11 la tsô se zua a mlumun sha mbampin mban.

Aôndo yange kaa ken Tindi u Mose la ér, ior ve naan iniav kposo kposo sha ci u asorabo a ve. Levitiku 5:​1-11 ôr kwagh u or u nan er isholibo sha apera ga shin u nan er isholibo gaegh yô. (Ivur 2-4) Nahan aluer nan va hingir u kaven kwagh u nan er la yô, á gba u nana pase isholibo i nan la shi nana na nagh ku isholibo sha “tuleiyôngo shin tuleivo.” (Ivur 5, 6) Kpa aluer nan ngu icanor, nahan hemba nan u yamen iyôngo shin ivo ye? Tindi la kaa ér nana za gba injô nana yam zendenya la, nahan nana lu a injô iyol shinii? Shin nana za er tom kpoghuloo nana zua a inyaregh ki nana yam zendenya la, nahan nana gema a timbir u nan nagh ku sha ci u asorabo a nan laa?

Tindi u Mose la yange ôr kwagh u a tese ér, Yehova we se ikyo yô, ér: “Kpa aluer inyaregh ki nan kia kuma iyôngo shin ivo ga yô, nana̱ va na TER nagh sha ci u isholibo i nan er la sha mbaatii uhar shin utulembamkunguv uhar.” (Ivur 7) Aluer Oriserael u nan er isholibo la nan ngu a kwagh ave ga je, ka u nana fatyô u yamen iyôngo ga yô, Aôndo una lumun kwagh ugen u nana fatyô u nan nagh a mi yô, inja na yô, nana fatyô u nan nagh sha mbaatii uhar shin utulembamkunguv uhar.

Aluer nan ngu a inyaregh kuma u nana yam mbaatii uhar ga ye? Tindi la kaa ér: “Nana va na nagh sha ci u isholibo i nan er la, sha mwem ma kengese ma ma kom môm-ken-upue u efa [upanpan mba cuku anigheni shin utaankarunyiin], sha ci u nagh ku isholibo.” (Ivur 11) Yehova yange na ian ér mba ican i ker ve kpishi mbara yô, ve̱ na un nagh ku isholibo a awambe shio. * Or môm ken Iserael tsô lu kwagh u ibanave ia yange nan u zuan a iember i nan iwom shin ian i eren kwagh u nana lu ken bem vea Aôndo ga.

Tindi u sha kwagh u nagh ku isholibo ne tese se nyi sha kwagh u Yehova? Tindi ne wase se u fan ser Yehova ka Aôndo u zungwen mhôônom u a fe kwagh u mbacivir un vea fatyô u eren man kwagh u a hembe ve u eren kpaa yô. (Pasalmi 103:14) A soo ér se lu ikyua a na, se ya ikyar a na kangenaa, aluer tahav yina se iyol sha ci u iyolbeen shin angev shin mbamzeyol mba hen tsombor shin mbamtaver mbagenev je kpaa. Aluer se fa er ka sea er kwagh u se fetyô cii sha u civir Yehova Aôndo nahan i doo un a vese yô, a saan se iyol kpishi.

[Ngeren u shin kpe]