Kporom hen Aôndo

“Mo Ter, Aôndo Wen, M Ngu Icighan Je”

Levitiku Ityough 19

“ICIGHAN, Icighan, Icighan, Ter Aôndo.” (Mpase 4:⁠8) Bibilo pase ken mkaanem mara ér Yehova ka icighan, man kwagh la tese ér Yehova ngu wang shi ngu vough sha gbenda u hemban cii. Aôndo ngu kposo a isholibo; isholibo ia fatyô u hôngor un sha ma gbenda môm tsô kpaa ga. Kwagh ne tese ér a taver u uumace mba ve yen ne ve kporom ikyua a Aôndo u a hembe lun icighan cii ne shinii? Mayange ga cii! De se time ase sha mkaanem ma nan se ishimaverenkeghen, ma ma lu ken Levitiku ityough 19 ne.

Yehova yange kaa a Mose ér: “Ôr kwagh a mkohol u Mbaiserael cii.” Kwaghôron u yange dondo la lu sha ci u hanma or ken tar la. Kanyi yange gba u Mose una ôr ve? Aôndo kaa ér: “Kaa a ve wer: Lu nen uicighanmbaiorov, gadia Mo TER, Aôndo wen, M ngu icighan je.” (Levitiku 19:⁠2) Yange gba u hanma or Iserael yô nana tese ér nan ngu a ieren i vough. Mkaanem ma ma kaa ér “lu nen” la yange ma lu kwaghwan ga, kpa ma lu tindi jighilii. Aôndo yange lu keren kwagh hen ior mbara u vea fatyô u eren ga yôô?

Fa wer Yehova vande teren mlu na u icighanegh la, kpa ka sha u se lu vough er un nahan ga, ka u tesen ityôkyaa i i ne ve a we tindi la yô. Kwagh ne tese ér, Yehova yange lu kaan a mbacivir un mba ken Iserael mba yinan mbara ér ve lu uicighanmbaiorov vough er un kpa un lu icighan nahan ga. Sha ci u vea fatyô u lun uicighanmbaiorov vough er Yehova nahan ga. Yehova “u A lu Icighan” la hemba ngu icighan a hanma or cii. (Anzaakaa 30:⁠3) Kpa er Yehova a lu icighan yô, a soo ér mbacivir un kpa ve lu uicighanmbaiorov, inja na yô, ka er uumace mba ve yen vea fatyô u lun uicighanmbaiorov kighir la. Tsô ka sha igbenda i nyi nahan vea tese ér ve mba uicighanmbaiorovo?

Yehova yange we tindi sha ikyev i Mose ér Mbaiserael ve lu uicighanmbaiorov been cii yô, a tese akaa a a bende a mlu u uuma vev jimin cii yô. Yange gba u hanma Oriserael yô nana eren uma u nan er i tese shin heen nahan: nana waan mbamaren man mbaganden ikyo (ivur 3, 32); nana zungwen mbaakondoato man mbaapirashe kua mbaatsanev mbagenev mhôônom (ivur 9, 10, 14); nana eren kwagh a mbagenev sha mimi shi nana ôron ijir kpa sha mimi (ivur 11-13, 15, 35, 36); shi or u nan we ndor a nan nana doo nan ishima er iyol i nan nahan. (ivur 18) Mbaiserael cii yange ma ve “hingir uicighanmbaiorov mba Aôndo [ve],” luun er yange vea kor tindi ne kua akaawan agen yô.​—⁠Numeri 15:⁠40.

Tindi u sha kwagh u lun icighan la na se mkav u injaa sha igbenda i Yehova Aôndo man mbamhen nav cii. Se hen ser, aluer se soo u yan ikyar i dedoo vea na yô, gba u se nôngo sha afatyô wase cii se lu a aeren a wang a a zough sha atindi a na a wang la. (1 Peteru 1:​15, 16) Aluer se mba eren sha atindi ne yô, se ember uma u hemban doon cii.​—⁠Yesaia 48:⁠17.

Yehova shi tese vangertiôr u un lu a mi ken mbacivir un la sha tindi u a we ér ve lu uicighanmbaiorov la. Yehova keren kwagh hen a vese ka hembe er se kôr cio u eren la ga. (Pasalmi 103:​13, 14) A fa ér se uumace mba un er se sha ibeen na ne se fatyô u lun uicighanmbaiorov, vough er i doo u se lu la. (Genese 1:26) U soo u seer henen er u fatyô u kporon hen icighan Aôndo, Yehova kpa?

[Foto u sha peeji 9]

Se fatyô u lun uicighanmbaiorov