Kwagh U Se Hen Hen Yesu

Sha Kwagh u “Mkur” Yô

Á lu mkur u nyi?

Mbahenen mba Yesu yange ve pine un ér: “Ka hanma shighe man akaa ne aa ere? Man ka nyi ia lu ikyav i sha mve Wou la man i mkurtara?” (Mateu 24:⁠3) Zum u Yesu lu nan ve mlumun sha mpin ne la, a kaa a ve ér ka tar u se tem shin u ne ua kure ga. Kpa Yesu yange vande ôron kwagh u ‘tar’ ken kwaghôron na, shi yar tom a ishember ne sha u pasen hanma kwagh u uumace ve eren sha tar, sha hemen u Satan cii. (Mat. 13:​22, 40, 49) Nahan lu tar u Yesu lu ôron kwagh u u ér, ‘mkur u ú una va’ je la.​—⁠Mateu 24:⁠14.

Yesu pase kwagh u mkur nena?

Kwagh u Yesu ôr ér tar u bo ne ua kure la ka “Loho u Dedoo.” A kaa ér: ‘Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.’ Yesu pase kwagh u mkur u tar u ainge ne ér: “Zegecan una er, imbacan i hii er i gba tar la je zan zan ainge ne i lu a er mayange ga yô, man mayange kpaa ia kera shi er nahan kpaa ga. Man ka er i pande ayange la kera yô, gayô, ma i yom ma or ga.”​—⁠Mateu 24:​14, 21, 22.

Ka unô a tim ve?

Ka mba ve civir Yehova ga shi kwagh na kua Yesu a doo ve ishima ga la tseegh a tim ve ye. Amba a ior la nga ongo imo i Aôndo ga. Yesu kaa ér: “Er lu sha ayange a Noa nahan, kape mve u Wan u or kpaa una lu la. Gadia er sha ayange a mngerem ma deemee lu a va ga la, . . . ve fa ga zan zan mngerem ma deemee va, va kuwa a ve cii.” (Mateu 24:​36-39) Yesu kaa ér ior mba zan sha gbenda u mtim la mba kpishi. Nahan kpa, a kaa a vese ér gbenda u “imbishi”  gema ngu, “u u ze sha uma” yô.​—⁠Mateu 7:​13, 14.

Ka hanma shighe tar ne ua kuree?

Shighe u i pine Yesu kwagh u una lu ikyav i sha mve na ‘man i mkurtar’ la yô, a kaa ér: “Ikyurior igen ia mough ityav a ikyurior igen; tartor ugen kpaa ua mough ityav a tartor ugen; ijen ia gba man ityartenger ia lu . . . Man sha ci u mvende u vendan atindi una seer a seer nahan dooshima u mbagenev kpishi una ndôhôr.” (Mateu 24:​3-12) Sha nahan yô, akaa a vihin a se lu ungwan nyian ne gema nga kwagh u taver se a taver ishima, gadia se fa ser, ica a kera gba ga tsô gomoti u Tartor u Aôndo una va a bem sha tar sha ci u uumace mba ve ongo imo i Aôndo la. Yesu kaa ér: “Shighe u né nenge akaa ne aa eren yô, fa nen ner, tartor u Aôndo mgbôghom ve.”​—⁠Luka 21:⁠31.

Gba u ú er nyi?

Yesu kaa ér Aôndo “na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.” (Yohane 3:16) Kpa saa ú fa Aôndo man Wan na dedoo ve, u na ve jighjigh ye. Sha nahan yô, Yesu kaa ér: “Uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.”​—⁠Yohane 17:⁠3.

Mayange de ne ian wer, ishimanyian man mbamzeyol ve yange u henen kwagh u ú er ve, Aôndo una doo u ishima ga. Yesu kaa ér: “Ver nen ishima sha ayol a en, asema a en a̱ de yoho . . . sha akaa a nyian ishima a uma ne ga, iyange la i̱ de va bulun ne er kwaghhônon nahan ga; gadia kape ia va bul a bul mba ve tem sha won cii la.” Aluer u wa ikyo sha icintan i Yesu ne yô, u “kuma u waren akaa a á va er la cii.”​—⁠Luka 21:​34-36.

Wea soo u seer fan yô, ôr ityough ki sha 9 ki takerada u Bibilo Tese Ér Nyi Jimi?* la sha itinekwagh i i kaa ér, Se Mba ken “Ayange a Masejime”? la

[Ngeren u shin kpe]

* Ka Mbashiada mba Yehova ve gber u ye.