Shighe u Yehova Pase Iyol Na hen Mose La

Ekesodu 34:6, 7

U PASE injaor i Aôndo a lu nena? U pase aeren a na man igbenda na nena? Tôô ase wer, u zua a ian i pinen Aôndo kwagh na iyol na shi keghen ato ungwan er una pase u aeren a na kpaa yô. Profeti Mose yange zua a imba ian la. Kwagh er doo yô, Mose nger hanma kwagh u yange za hemen cii.

Mose yange zamber a Yehova sha Uwo u Senai ér: “Ma U tesem iengem You.” (Ekesodu 33:18) Nahan kpernan maa Aôndo tese profeti ne iengem na kpuaa tsô. * Mose pase kwagh u yange nenge a mi ken mpase u sha mnenge u kpilighyol la vighe vighe ga. Kpa a gema a nger kwagh ugen u hemban doon cii​—⁠ka kwagh u Aôndo yange ôr yô. Se time nen sha kwagh u Yehova ôr sha u pasen mlu na yô. I nger kwagh ne ken Ekesodu 34:​6, 7.

Kwagh u hiihii u Yehova ôr sha u pasen mlu na yô ér, un ngu “Aôndo u mgboughon a mhôônom ma zungwen.” (Ivur 6) Or u tôvon sha akaa a ken Bibilo ugen kaa ér, ishember i ken zwa Heberu i í gem ér “mhôônom ma zungwen” la ngi ôron kwagh u “mhôônom ma ma ker [Aôndo], er mhôônom ka ma kôr Ter a ônov mba nan nahan.” Ishember i “mrumun u sha mhôôn” la di i zua sha ishember igen i pasen ieren, i i er “kwagh u or u ishima i nan i mgbegh nan u wasen or u kwagh a tser nan yô.” Sha kpôô yô, Yehova soo ér se fa er un nengen sha mbacivir un er mbamaren ve nengen sha ônov vev, ve tesen ve dooshima shi ve we ve ikyo sha u kuren mbamgbe vev nahan.​—⁠Pasalmi 103:​8, 13.

Yehova shi kaa ér un ngu Aôndo “u wan ishima.” (ivur 6) Vihin ishima fele a uumace mba ve civir un nahan ga. Kpa gem we ishima a mbamyen vev, shi ne ve shighe sha er vea de asorabo a ve yô.​—⁠2 Peteru 3:⁠9.

Aôndo shi kaa ér un ngu Aôndo “u lun a erdoo man mimi wuee je.” (ivur 6) Erdoo ka ieren i injaa i ka i wase u nyôôso mlu u Yehova vea ior nav, je i lu kwagh u ma kwagh môm je kpa una fatyô u vihin mlu shon ga la. (Duteronomi 7:⁠9) Shi ka Yehova kpa a lu imbor i mimi ye. Tsughun ior ga shi or môm kpa nana fatyô u tsughun un ga. Er a lu “Aôndo u mimi” yô, se fatyô u lumun a hanma kwagh u a kaa cii, kua akaa a á tende zwa ér una er ken hemen la kpaa.​—⁠Pasalmi 31:⁠5.

Kwagh u mimi ugen u Yehova a soo ér se fa sha kwagh na yô, ka mde u a den “ifer man tindi u peren man isholibo” kpaa la. (ivur 8) A “kegh iyol u den” mbaasorabo mba ve gema asema la “kwaghbo” ve. (Pasalmi 86:⁠5) Nahan cii kpa, Yehova ongo ato sha asorabo a ior ve eren la ga. A kaa ér, “u tsahan yô [un] den ga.” (ivur 7) Icighan Aôndo u a eren kwagh u vough la una tsaha mba ve eren asorabo sha apera la kpee je. Iyange igen vea sunda injar i aeren a ve a bo la kpee je.

Mpase u Yehova yange pase iyol na ne tese wang ér á soo ér se fa un, se fa aeren a na man igbenda na kpaa. Ka u ape seer fan aeren a na a dedoo ne ga he?

[Ngeren u shin kpe]