Aôndo Soo Ér U Lu Ornyaraa?

‘Aôndo soo ér u lu ornyar, u lu a umato kpishi, shi u lu a kpenga u vesen. Na un di jighjigh tseegh, bugh ikpa you, na un inyaregh ki u fetyô cii.’

PIPAABAVER igen ken tar u Brazil kaa ér ka imba loho i iniongo igen i ukwaghaôndo ken tar la i ôron tseegh je ne. Ka loho u mbakpishiv ve numbu sha u ga yô. Pipaabaver i Time la ôr kwagh u kwaghtôvon u i tôv ior mba ve senge ér ve mba Mbakristu ken tar u Amerika la ér: “Iorov akunduatar kar môm sha ityough ki deri na jighjigh ér Aôndo soo ér ve lu yôugh yôugh. Man iorov ikyundugber kar môm sha ityough ki deri . . . lumun ér aluer or na Aôndo inyaregh ki nan yô, Aôndo una seer nan inyaregh ki gen sha mi ngôgh.”

Mbamhen mba ior ve henen ér hanma or u civir Aôndo cii nana gba ican ga mban nahan, mba samber wuee, hemban je yô ken ityar i hen ikyasen i Amerika, er tar u Brazil nahan. Ior ka ve tsehe kpugh ve yem ken ucôôci mba ve tesen ér Aôndo veren ior doo doo sha u nan ve inyaregh kpishi la. Kpa mimi je, Aôndo ne mbacivir un shagbaa? Ka mbacivir Aôndo mba tsuaa mbara cii yange ve lu mbanyarev yee?

Ruamabera u ken Zwa Heberu la ngu a avur kpishi aa a ôr kwagh u mba Aôndo yange ver ve dedoo mba ve lu mbanyarev yô. U tesen ikyav yô, i nger ken Duteronomi 8:18 ér: “Kpa umbur TER, Aôndo wou, ka Un A ne u tahav mbu zuan a inyaregh ye.” Kwagh ne lu ibumun hen Mbaiserael ér aluer ve ungwa imo i Aôndo yô, una na ve vea hingir ikyurior i lun yôugh yôugh.

Mbacivir Aôndo asange asange di ye? Orjighjigh Yobu yange lu a inyaregh kpishi, shi zum u Satan er a na hingir icanor la, Yehova hide un a inyaregh nagh her er tsuaa la nahan, “kuma kwa har.” (Yobu 1:3; 42:10) Aberaham kpa lu ornyar. Genese 13:2 kaa ér “Aberam lu ornyar, a ngee a uzendenya man azurfa kua zenaria.” Zum u ator anyiin a sha Ityoughkitaregh va kôr Loti, wan u idyondon u Aberaham yô, Aberaham ‘mough a ior nav mba fan ityav, mba i mar ve hen ya na yô, ior deri utar man pue kar anigheni, gba tôvon ve hwange.’ (Genese 14:14) Ya u Aberaham ngee a ior kpen kpen, ka nahan ve lu a iorov 318 “mba fan ityav” hen ya na ye. Er koson ve shi nengen sha a ve yô, tese je ér lu shagbaor, u ngeen a uzendenya akum akum.

Sha kpôô yô, ior mba civir Aôndo sha jighjigh mba sha ayange a tsuaa la kpishi, er Aberaham man Isaka man Yakob man Davidi man Solomon kua mbagenev nahan lu mbanyarev. Kwagh ne tese ér Aôndo una na hanmaor u civir un cii inyaregh kpishi? Man aluer or ngu icanor yô, maa tese ér nan ngu a iveren i Aôndo ga, shin a lumun nan gaa? Ngeren u a dondo ne una na mlumun sha mbampin mban.