Washika u ken Tar u Bolivia

Kwase u A Lu ken Ibanave, Kpa A Lu Saan Saan Yô

M NGU eren tom mishen ken tar u atsanaior a ngee ker kpishi yô, kpa mayange hoghor mo u nengen a mbaatsanev man mba tar u tumbur a ve ve hingir tengemeen la ga. Kam er myôhôryol ma va sha hanmaor ave ave kera kpaa nahan. M fa er i lu tartor u Aôndo tseegh ua sôr uzayol mban yô. Kpa, m nenge ior mba ve lu dondon mkaanem ma Aôndo zua a msaanyol kimbir kimbir, shin er ve lu ken mtaver nahan kpaa. Sabina ngu môm ken a amba la.

Anyom kar hegen ngee, a yange Sabina kôr ônov nav mba kiriki mba kasev uhar sha ave, lu kenger zungwaa, er nom na nyôr tse bôôsu lu yemen tar ugen, sha u za keren tom u a hemba kimbin un inyaregh yô. A kegh mhir u nom na, iwer kar, anyom kpa kar kpishi, kpa orti tsa sha won hide ga. Er yange nom u Sabina yem je, hanma iyange yô, Sabina ka a er tom taveraa, a gbor ave kpaa, sha er una nenge sha iyolna kua ônov nav mba kasev mba uhar, Milena man Ghelian yô.

Yange m hii zuan a Sabina iyange igen atetan, hen ijiir i teen kwagh i anmgbian na u kwase u vesen, lu teen mbakasuav mba ve cinge hen kenti u anmgbian na la akaa sha ishimawan. M nenge vôr ashe tsô m fa je mer, a ndera eren tom la pepe je. M kaa a na mer me va henen Bibilo a na man ônov nav mba kasev mbara. Kpa a kaa ér, “ma i doom, kpa m lun a ian ga. Nahan kpa, ônov av mba kasev yô, vea hen kpa a doom.” Mo kpa maa m lumun. Kwaghhenen u ônov nav ze naleghaa yô, m hingir u fan kwagh u Sabina dedoo, shi m kav mtaver u lu ker la kpaa.

Sabina ngu a mough sha ahwa anyiin sha use a hii tom u eren. Zum u ônov nav ve lu mnya ken an-you ve u tsan la, Sabina ka a keer usu a gba yôron iwer shin zege jogobi u ve yôron a mi kpur kpur la. Ngu a jiidi inyam, a er kyeeke i lun a inyam ker, a za tee a zua a inyaregh ki nengen sha tsombor na. Ka a vande hôron mwem ma kaan kyeeke ne a mi tugh cii ve a va jiidi inyam sha use ye.

Sabina ka a za sôn wiibalo, a wa ikyav mbi una er kasua a mi sha iyange la shimi vough vough, ikyav anza er, inima i cirin man setov u jiidi kwagh, man ikpe kenanjii, man tebul man ukujila man atsua man mkurem man inyam man mwem kua ugber mba kwaghman u hen ijiir la nahan.

Ahwa ataratar nga a eren yô, Sabina man ônov nav mba kasev mbara wa iyol i yemen ve. Ka ve gesa hunda sha gbôulô ve yem. Kwagh a̱ vihi ve shin una doo ve kpa, mshim vem ma tese ga, shi mô ve nan se shin nan lam a ugen ga. Mba eren tom ve ne sha agee a ve cii. Ashighe kpishi, ka a lu pepe nahan m tile sha windou hen yaagh yasegh ki mba eren tom mishen, m kenger ior er ve lu yaren tom er Sabina nahan la. Sabina ngu a ngu di môm ken kpila ukase mba ve dugh sha use sha u za teen kwaghyan man kwaghman sha ugodobi mba ken tar u Bolivia la tsô.

 Ahwa ataratar man tiôn nga a eren, iyange ia duen yô, Sabina man ônov nav ar hen ijiir ve i teen kwagh sha godobi la kera kpaa. Ka ve dugh ikyav shin wiibalo ving ving maa ve er kicin i yôron her tsong. Kyeeke i hiihii ka ia gbaan shin mkure nahan i gba toghor. Ihuma i dedoo i kpurum sha ahumbe a pepe, nahan mba ijen i ker ve yô ve gba va yamen mian-mi-mian yan.

Or ka nana va u yamen kyeeke yô, Sabina a pine nan ér, “M na u ume?” Or u yuhwan ashe ikyôr nan dugh ahôaveegh ahar a u moughon ityough sha shio, maa Sabina a na nan ukyeeke mba tseen wese wese uhar, a ngohol annyar na. Ngu a tee ior ukyeeke nahan kwa imôngo imôngo zan zan a kar koughon. Ka vea teen kyeeke i masetyô yô, ve kange ikyav ve kôr gbenda ave u hiden hen ya. Shin er angahar ka a ngeregh un ker sha ci u kasua na u pepe ne nahan kpa, shi ka a yem hen ijiir kasua na i sha uhar i anmgbian na u kwase u vesen la kpaa.

Kwa hiihii u m za hen kenti u anmgbian u Sabina u kwase u vesen mer me za hen Bibilo a ônov nav mba kasev mba uhar la, ve ver akaateman ahar hen kwana, ve lu keghen mo a kegh. Hiihii la, Milena u lu anyom a 9 man Ghelian u lu anyom a 7 la, ve waan iyol ve keghen mo a kegh, shi i saan ve iyol u henen Bibilo kpaa. Kure kure tsô, mbayevkasev mba cian ashe mban kera yeren mo kwagh ve ga, shi m hingir ijende ve kpaa. Sabina una nenge kwagh ne nahan i doo un ken ishima kpishi. Ica gba ga je tsô, un kpa lumun ér una hen Bibilo vea mo shin er ian taver un u zuan a mi nahan kpaa.

Er Sabina lu fan Bibilo seer la, kape Yehova Aôndo kpa lu doon un ishima seer je la. Lu zuan a kwagh u he ken uma na, kwagh la lu msaanyol! Ancan-kwase u eren kpenga sha godobi, u hanma shighe yange a lu sha ishi tsum-tsum la, hii u saan sha ishi. Kwase ne de ashe a cian, gema tilen jighilii, kera waan ityough inya ga, shi ashe na kpa wanger ikyôr. Anmgbian na u kwase nengen a mkposo ne yô, a kaa ér, “Sabina hingir saan saan ayange ne, man yange saan nahan ga.” Mbagenev kpa nenge a mkposo ken uma u Sabina man ônov nav mba kasev mbara kpishi. Sabina hii u fan mimi u yange gba un ishima sha kwagh u Aôndo man mbaawashima nav ica i gba la.

Kwagh u Sabina lu henen ken Bibilo la doo un kpishi, kpa er luun a ian cuku kpaa ga yô, fatyô u zan mbamkombo ga. Ken masejime yô, lumun u zan mkombo ken Iyou i Tartor. Hii shighe la je, kera de mbamkombo mba van ga. Er Sabina lu ken nongo u Kristu la, zua a azende a mimi. Shi mase kaven ér mimi je Yehova nengen sha mba ve ne ayol a ve sha u civir un yô.​—⁠Luka 12:​22-24; 1 Timoteu 6:⁠8.

Kwagh u Sabina lu henen la doo un, shi soo u pasen mbagenev kpaa ér ve fa. Kpa yange kaa ér, “Ka mea hen er me za pasen kwagh ken igbar nahan ikyarkyase i kundem iyol gbir gbir.” Shi hen ér, ‘A er nan sha won ve mo ancan-kwase u cian ashe, u takerada kpa m fe ga ne nahan, me za tese orgene?’ Er hen ken ishima nahan kpa, erdoo u i er a na man mkposo u a nenge a mi kpishi ken uma na la mgbegha un u eren kwagh u hange hange ne. Shi kav er mbayev nav mba kasev lu nengen ikyav ken a na yô. Nahan hii u pasen mbagenev loho u dedoo. Mbayev nav kpa maa cinge pasen kwagh a na ityô sha gbashima.

Nyian ne, Sabina kera ngu di ancan-kwase u eren tom sha ican kpii a iember shio ga. Shi inyaregh kpa a seer zuan a mi yum ga. Kpa kwagh u a gem ken a na yô, ka gbenda u a nengen uma na la. Hegen, er a lu Kwasekristu u i er un batisema yô, ngu pasen mbagenev loho u dedoo u tartor u Aôndo, u í lu u tseegh ua kar a ibanave man lanshima sha tar kera gbem sha won la.

Nyian pepe, ahwa ataan kpa, Sabina shi wa iyol u duen hen an-you na u tsan ker la. Kpa pepe ne yô, ngu yemen sha u za teen kyeeke ga. Ngu za kohol anmgbianev nav mba ken Kristu, mba kasev man mba nomso, sha u pasen kwagh sha godobi. Er a ne shighe na hanma sati sha u wasen mbagenev yô, kwagh ne seer van a iember ken uma na. Ka a gesa iyou na, a se mugh mugh maa a ver ishigh yemen sha godobi u i lu pasen kwagh her la. U ma a tuur wiibalo la yô, ka a har zege ikpa. Kwagh u a we ken ikpa la yô, ka Bibilo man ityakerada i pasen Bibilo, í una za na mbagenev sha u ve kpa ve ôr loho u nan ve ishimaverenkeghen yô. Kwagen la, Sabina se gbar gbar kaa ér, “yange m hen mer a tsa sha won nahan me fatyô u za pasen mbagenev Bibilo ga.” Shi a seer ér, “Tom ne doom ishima je gande!”