Kporom hen Aôndo

Orjir u A Er Ijir sha Mimi Yô

Numeri 20:​2-13

ASHIGHE agen mbaajiriv ka ve kure ijir sha mimi ga shin ve tsaha or i kar ikyaa inya. Kpa Yehova Aôndo yô ngu nahan ga, “gadia kwagh u mimi doon [un] ishima.” (Pasalmi 37:28) We ishima tsung, kpa gem haan iyol inya ga. Til sha kwagh u a lu u vough la hanma shighe cii. Nenge ase kwagh u Yehova yange er zum u Mbaiserael hingir ayongo a Mose shi hemba ato kpaa la. I nger kwagh ne ken Numeri ityough 20.

Shighe u mkur u zende u Mbaiserael ken taaikyôngo la, mngerem ban ve. * Tsô ior hingir ayongo a Mose man Aron, ve kaa ér: “Inja na nan man ne ve a ior i TER ken deserti ne, sha u sé va kpe ker, se a uzendenya asev cii?” (Ivur 4) Mbaiserael za Mose man Aron ivever iyol ér taaikyôngo ka “bojiir” u a lu a “tur, shin ikyon i wain, shin pomegraneti kpaa ga” yô, man lu atam a ikyon shon ne mbamkerev mba Iserael hide a mi zum u ve za gba mker ken Tar u Ityendezwa anyom a karen ken ijime la ye. Shi ior kaa ér, “mngerem ma man kpaa ma ga.” (Ivur 5; Numeri 13:23) Sha nahan yô, ve na Mose man Aron ibo sha ci u taaikyôngo la lu er ijiir i doon iyiagh i uter vev mba gban ahon mbara venda u teman ker sha ayange a karen ken ijime la nahan ga!

Yehova yange venda mba gban ahon mban ga. Kpa gema kaa a Mose ér a er akaa atar. Ka a je ne: a tôô gbough nagh, a kohol ior, shi a “ôr kwagh a vande sha ashe ve, tsô ua due a mngerem ma u.” (Ivur 8) Mose yange er akaa ahar a hiihii a Yehova kaa ér a er la, kpa kwagh u sha utar la yô, er er i kaa un la ga. Er yange ma lam a vande la sha u tesen jighjigh na u nan yô, gema zôhô a zôhô a ior mbara, kaa a ve ér: “Ungwa nen ase, ne mbahembanato mban; sé due a mngerem ken vande ne, sé na ne zee?” (Ivur 10; Pasalmi 106:​32, 33) Tsô Mose gbidye vande kwa har, nahan “mngerem due kpishi.”—Ivur 11.

Nahan Mose man Aron er isholibo i vesen. Tsô Aôndo kaa a ve ér, “ne [hemba] ato sha kwaghôron Wam.” (Numeri 20:24) Er Mose man Aron hemba ato sha kwaghôron u Aôndo hen shighe ne yô, ve hingir kwagh shon u ve kaa a ior ér mbá la, inja na yô ve hingir mbahembanato. Nahan Aôndo kure ijir sha kwagh ve wang, ér: Mose man Aron vea kera hemen Mbaiserael vea nyôr a ve ken Tar u Ityendezwa la ga. Aôndo yange tsaha ve ngee yumuu? Ei. Atôakyaa nga kpishi a i hii ve se ôr nahan yô.

Hiihii yô, Aôndo yange kaa a Mose ér a̱ kohol ior a lam a ve ga, shi kaa a na ér a̱ na ve ibo a̱ yila ve ér mbahembanato kpaa ga. Kwagh u sha uhar yô, Mose man Aron na Aôndo icivir sha ieren ve ne ga. Aôndo kaa a ve ér, ‘ne tsegham ga.’ (Ivur 12) Kwagh u Mose kaa ér, ‘sé due a mngerem ken vande ne’ la, lu inja er ka un man Aron ve er ivande ve ne ior mngerem ye, ka Aôndo ga nahan. Kwagh u sha utar yô, gbenda u Aôndo tsaha ve ne zua sha gbenda u vande tsahan mbagenev la. Aôndo vande yangen Mbaiserael mba hemban ato mba ken kov u hiihii la u nyôron ken tar u Kanaan, nahan Mose man Aron kpa a tsaha ve nahan. (Numeri 14:​22, 23) Kwagh u sha unyiin yô, Mose man Aron lu mbahemenev mba Iserael. Ior mba Aôndo a ne ve ityom kpishi yô, hembe pinen ve kwagh u ve er la cii.​—⁠Luka 12:⁠48.

Yehova til sha kwagh u a lu vough la hanma shighe cii. Tsahan ior sha ifer shin ka karen ikyaa inya ga, sha ci u kwagh u mimi doo un ishima. Sha kpôô yô, imba Orjir ne nahan kuma u se nan un jighjigh shi se na un icivir kpaa.

[Ngeren u shin kpe]