Kwagh U Se Hen Hen Yesu

Sha Kwagh u Mlu u Uumace u ken Hemen La

Yesu Yange Er Ityendezwa Ér Ior Vea Yem Shaa?

Een, yange er! Yesu iyolna kpa yange i nder un shin ku, kôndo yem za lu sha vea Ter na. Kpa cii man ku u Yesu kua mnder na yô, Yesu kaa a mbaapostoli nav mba 11 mbajighjigh mbara ér: “Ken ya u Terem ayou nga kpishi; . . . Me yem sha u Me za sôr ne ijiir” yô. (Yohane 14:⁠2) Nahan kpa, ka iorov kpuaa tseegh vea yem sha ye. Yesu yange ta iwanger sha kwagh ne zum u a kaa a mbahenen nav ér: “Ne anikyumuile u kpeghee ne, de cie nen ga! Gadia i doo Ter wen u nan ne tartor la.”​—⁠Luka 12:⁠32.

Kanyi “anikyumuile u kpeghee” la una za er sha?

Ter soo ér annongo u kpuaa ne a̱ za lu ken gomoti u sha la vea Yesu. Er nan se fe nahana? Zum u i nder Yesu shin ku la, Yesu pase apostoli Yohane ér mbajighjigh mbagenev “vea tema tor sha tar” ne. (Mpase 1:1; 5:​9, 10) Kwagh ne ka loho u dedoo. Kwagh u vesen ugen u i gbe u uumace vea lu a mi yô, ka gomoti u dedoo. Gomoti shon u Yesu una hemen ne una er nyi? Yesu kaa ér: ‘Ne mba ne dondo sha a Mo ne, sha mgbe u he, zum u Wan u or Una tema sha ikyônough Nagh ki torough ki engem la yô, ne kpaa, né tema sha mkônom ma torom pue kar m har.’ (Mateu 19:28) Mtemtor u Yesu man mbahenen nav la una va a “mgbe u he” shin mlu u he u vough, u nomsoor man kwase u hiihii la yange ve lu ker shin tar shighe u ve lu a er isholibo ga la.

 Nahan uumace mbagenev yô, ka ishimaverenkeghen i nyi Yesu yange kaa ér mba a mini?

Yange i gba uumace ér ve lu uma shin tar ne, kpa Yesu yô i gba un ér a lu uma sha. (Pasalmi 115:16) Ka nahan ve, Yesu kaa ér: “Ne, ka shin ne lu ye; Mo yô, ka Sha M dugh ye.” (Yohane 8:23) Yesu ôr kwagh u mlu u dedoo u uumace shin tar ne. Sha shighe ugen la Yesu kaa ér: “Saan mba ve lu a ishima i legh legh la iyol, gadia tar ua lu dyako ve je.” (Mateu 5:⁠5) Kwaghôron na ne zua sha kwagh u Aôndo yange na í nger ken pasalmi la, ér: “Kpa mbaasemaleghlegh yô, vea ya dyako u tar, á saan ve iyol sha mngee u bem. Mbaperapera vea ya dyako u tar, vea lu ken u gbem.”​—⁠Pasalmi 37:​11, 29.

Nahan a lu mba ve lu yemen sha, mba ve lu “anikyumuile u kpeghee” la tseegh vea zua a uma u tsôron ga. Yesu shi ôr kwagh u ishimaverenkeghen i í lu sha ci u ior umiliôn umiliôn shin tar la kpaa. A kaa ér: “Tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.”​—⁠Yohane 3:⁠16.

Aôndo una kar a ican i uumace ve lu yan la kera nena?

Yesu yange pase er uumace vea zua a mpeveryol sha akaa ahar, aa a ne ve ve lu yan ican la. Yange kaa ér: “Ka hegen je i lu u ôron tar ne ijir ye; ka hegen je á dugh tor u tar ne kera ye.” (Yohane 12:31) Hiihii yô, a va ôr aferaior aa a lu nzughul a ior la ijir, á tim a kera. Kwagh u sha uhar yô, á tim Satan kera, nahan una kera tsughun uumace ga.

Man gema ior mbagenev mba ve kpe, hii sha ayange a tsuaa la zan zan hegen, mba yange ve zua a ian i henen kwagh u Aôndo man u Kristu shi nan ve jighjigh ga la yô, kwagh ve ngu nena? Yesu yange kaa a iferor ugen u i wua un ikyua a na la, ér: “Ú lu a Mo imôngo ken Paradiso.” (Luka 23:43) Or shon, kua ior mbagenev umiliôn imôngo, vea zua a ian i henen kwagh u Aôndo zum u Yesu una nder ve shin ku ken paradiso shin tar la. Hen shighe la or la una zua a ian i lun môm ken mbaasemaleghlegh man mbaperapera mba vea lu uma gbem sha won shin tar la.​—⁠Aerenakaa 24:⁠15.

Wea soo u seer fan yô, ôr ityough ki sha 3 man ki sha 7 ki takerada u Bibilo Tese Ér Nyi Jimi? * la

[Ngeren u shin kpe]

[Foto u sha peeji 19]

“Mbaperapera vea ya dyako u tar, vea lu ken u gbem.”​—⁠Pasalmi 37:29