Ityesen I Aiegh 1: Uma Kpen ga

Ityesen i aiegh ne hii nena? Takerada u i yer ér The New Encyclopædia Britannica (1988), Tihi u sha 11 la, kaa sha peeji 25 ér, “Mbakristu mbafankwagh tsura mba sha ayange a ngise mbara lumun mhen u Mbagrika lu a mi ér uma kpen ga la, shi ve na jighjigh ér Aôndo ngu a gba uma u or, a gema un a wa ken iyol i nan shighe u i jile nan ken uya la.”

Bibilo kaa ér nyi? “Uma u a eren isholibo yô, ka un je una kpe ye.”—Esekiel 18:4, Bibilo i í yer ér King James Version la.

Bibilo ôr kwagh u oruma u hiihii u Aôndo gba la ér: ‘TER Aôndo maa or sha vuulevu u inyaagh, fehe nan iôôn i uma ken ahenga, or la maa hingir or u uma [zwa Heberu, neʹphesh].’—Genese 2:7.

Inja i ishember i ken zwa Heberu i neʹphesh, i í gem ér “uma” la yô, ka ‘kwagh u lun a iôôn.’ Zum u Aôndo gba Adam la, a wa uma u kpen ga ken na ga, kpa a na un tahav mbu umav mbu or ka nana ôôn ve nan lu uma la. Sha nahan yô, inja i ishember i “uma” la ken Bibilo yô, ka kwaghuma la jimin cii. Tahav mbu umav mbu Aôndo yange na akaauma la, ka mbua kera luun ga yô, uma la a kpe.—Genese 3:19; Esekiel 18:20.

Ityesen i uma kpen ga la gema va a mbampin kpishi: Or ka nana kpe yô, uma a yem hana? Kanyi ka i er uma u mbaafereve? Zum u ior mba yange ve senge ér ve mba Mbakristu mbara lumun ityesen i aiegh i uma kpen ga la yô, hingir u shi vea lumun ityesen i aiegh igen kpaa. Ka ityesen i igyamusu je la.

Ôr avur a Bibilo ne kpa nenge: Orpasenkwagh 3:19; Mateu 10:28; Aerenakaa 3:23

KA MIMI JE NE:

Or ka nana kpe yô, kwagh dugh ken nan za lu mape ga