Ityesen I Aiegh 4: Ter Man Wan Man Icighan Jijingi Ka Aôndo Môm

Ityesen i aiegh ne hii nena? Takerada u New Catholic Encyclopedia (1967), Tihi u sha 14 la, kaa sha peeji 299 ér: “I hen ér ityesen i Ter man wan man icighan jijingi ka Aôndo môm la va mase duen ken mbee u derianyom u sha unyiin la. A fatyô u kaan ér ka mimi . . . Cii man mbee u derianyom u sha unyiin la yô, ityesen i yange i due a mi sha kwagh u ‘iorov utar ken Aôndo môm’ la lu a wa amishe ga, shi mayange lu kwagh u i vande fan ken mcivir u Mbakristu shin ken jighjigh ve u nan kpaa ga.”

Takerada u Encyclopædia Britannica (1970), Tihi u sha 6 la, kaa sha peeji 386 ér: “Yange i tema mkohol u ken Nicaea la sha uwer u Mei 20, inyom i 325 la. Constantine iyol na lu ityough sha mkohol la, lu hemen iliam i í lu lamen her cii, shi lu un je va a mhen . . . u pasen mlu u Kristu vea Aôndo ér ‘un vea Ter mba môm tsô,’ la ye. Mkohol la maa gber ityesen ne. Er ubishôp cia orhemen tartor u Roma la yum yô, ve lumun u wan uwegh shin takerada ér ityesen la ka i mimi shin er ve mbagenev ve soo keng ga nahan kpaa; lu ubishôp uhar tseegh wa uwegh u suen ityesen ne ga ye.”

Bibilo kaa ér nyi? Mgem u Bibilo u i yer ér The New Jerusalem Bible la kaa ken Aerenakaa 7:55, 56 ér, “Sefanu iv a Icighan Jijingi, a kende ashe sha, a nenge a iengem i Aôndo man Yesu tile ken uwegh ku yanegh ku Aôndo. A kaa ér, ‘nenge! M nenge i bugh sha, man Wan u or tile ken uwegh ku yanegh ku Aôndo.’”

Mpase u sha mnenge ne pase nyi kwagha? Er Sefanu iv a tahav mbu tomov mbu Aôndo yô, a nenge a Yesu “tile ken uwegh ku yanegh ku Aôndo.” Nahan kwagh ne tese wanger wanger ér Yesu hide za hingir Aôndo zum u i nder un shin mbakpenev kôndo yem sha la ga, kpa lu or u ken jijingi u lun kposo a Aôndo. I ôr kwagh u or u sha utar u nan lu ikyua a Aôndo ken ivur ne ga. Shin er ior ve keren igbenda i zuan a avur a Bibilo a vea sue ityesen i Ter man wan man icighan jijingi ka Aôndo môm la nahan kpa, fada ugen ken tar u Dominican, iti na ér Marie Émile Boismard, a nger ken takerada na u i yer ér Á l’aube du christianisme—La naissance des dogmes (Mhii u Kwaghaôndo u Mbakristu—Mdugh u Atesen a Ior) la ér: “Kwaghôron u ior ve kaan ér Ter man wan man icighan jijingi ka Aôndo môm la . . . a fatyô u zuan a mi ijiir i môm ken Ityendezwa i He ga.”

Ityesen i ior i Constantine va mi la lu sha ci u been a ayôôso a a lu ken Côôci i sha derianyom u sha unyiin la. Nahan kpa, ityesen ne shi za kpoghor ikyaa igen va a mi, ikyaa shon yô ka i ne: Maria, kwase u mar Yesu la, lu “Ngô u Aôndoo”?

Ôr avur a Bibilo ne kpa nenge: Mateu 26:39; Yohane 14:28; 1 Mbakorinte 15:27, 28; Mbakolose 1:15, 16

KA MIMI JE NE:

Ityesen i ior ve due a mi sha kwagh u Ter man wan man icighan jijingi ka Aôndo môm la hii ken mkur u derianyom u sha unyiin la

[Ape i zough a foto ne yô u sha peeji 13 la]

Museo Bardini, Florence