Ityesen I Aiegh 5: Maria Ka Ngô U Aôndo

Ityesen i aiegh ne hii nena? Takerada u i yer ér The New Encyclopædia Britannica (1988), Tihi u sha 16 la, kaa sha peeji 326 ér: “Ieren i nan ngô u Aôndo icivir la yange i taver hen shighe u . . . mbafanaôndoga gba zan adua gudu gudu la. . . . Ve zua a perapera ve man mfe ve u sha kwagh u kwaghaôndo [mfe u mbafanaôndoga mba ve lu hingir Mbakristu la] ken mcivir u imegh u inmgbianaôndo u a lu ‘zege ngô’ la man ‘icighan iniunkwase’ la; ve zua a perapera man mfe ve ne ken atô u anyom udubu imôngo.”

Bibilo kaa ér nyi? ‘Nenge, ú wa iyav, ú mar wan u nomso, ú ii Un iti wer Yesu. Una lu Zegeor, á yilan Un er Wan u Uhembansha, . . . Ka nahan man Un u á mar Un la á yilan Un ér Icighanwan u Aôndo ye.’—Luka 1:31-35.

Avur a Bibilo ne tese wang ér Maria lu ngô u ‘wan u Aôndo,’ lu ngô u Aôndo iyol na ga. Yange ma fatyô u tôôn Un u ‘Sha man Sha u a hembe gban ca la je kpaa a fetyô u ngohol ga la’ ken iyav nav je kpa? (1 Utor 8:27) Maria iyol na kpa senge nahan ga. Ka ityesen i Ter man Wan man Icighan Jijingi Ka Aôndo Môm la i ve a anzughul sha kwagh u Maria ye. Er Mkohol u i nyôr ken Efese, ken inyom i 431 la yila un ér Theotokos (inja i iti i ken zwa Grika ne ér “U a mar Aôndo la”), shin “Ngô u Aôndo” yô, ve er kwagh u ior vea gema civir Maria yô. Gar u Efese, ape i nyôr mkohol u côôci ne, vande lun itine i civir akombo anyom uderi imôngo, henpe i eren iniongo i inmgbianaôndo u doon iyiav u i yilan ér Artemi la.

Nahan hingir u a nyôr a aeren a mcivir u eev mbu Artemi ‘mbu mbu gba sha aôndo la,’ inja er ieren i ior wan nongo suuluu yemen maape nahan la ken mcivir u Maria la. (Aerenakaa 19:35) Ieren igen i shi i nyôr ken ityesen i Mbakristu kure kure yô, lu ieren i civir Aôndo a eev mbu Maria man mbagenev la.

Ôr avur a Bibilo ne kpa nenge: Mateu 13:53-56; Marku 3:31-35; Luka 11:27, 28

KA MIMI JE NE:

Maria lu ngô u ‘wan u Aôndo,’ lu ngô u Aôndo iyol na ga. Ityesen i Ter man wan man icighan jijingi ka Aôndo môm la na yô ior hii u civir Maria ér ka Ngô u Aôndo