“Ka Nan Je M Yila?”

Kwase ugen u i yer un ér Jayne yô, yange vaa kaa ér: “M soo mer mnyoon ne ma a shi memem!” Yange lu a angev mbu kyansa, man i lu samber un iyol cica cii. Yange sar tsombor na man akar a na er ma ve lu a tahav mbu tôôn angev nav mbura kera kua mnyoon u lu ker la kpe kpe! Nahan ve er msen hen Aôndo ér a wase un. Aôndo una ungwa ve kpa? A wa un ikyo je he?

AÔNDO fa mlu u uumace ve lu ker la. Mkaanem nam, Bibilo kaa ér: “Akaa a i gbe a sha won cii la nga kinen imôngo nga toghor zan zan hegen.” (Mbaromanu 8:22) Aôndo fa er ior umiliôn umiliôn er Jayne nahan ve lun ken mnyoon hanma iyange yô, a lu mnyoon u sha iyol shin u ken ishima kpaa. Aôndo nengen a ior umiliôn 800 mba ve tse ijen hanma iyange la, man umiliôn mbagenev mba icombor ve i nzughul a ve la, man ikpela i mbamaren mba ishima i nyian ve sha mlu u mbayev vev u ken hemen man mkpeyol ve la. Mase zan u hen wer, Aôndo una er kwagh sha u been a uzayol mban sha won vee? Sha kpôô yô, er se soo u wasen mba doon se ishima yô, ka Aôndo ve una kera soo u wasen uumace, mba ve lu tomaveegh na la ga yee?

Wea vande pinen mbampin mban nahan yô, u ngu tswen ga. Er i lu ior kpishi ken ishima nyian nahan, kape anyom a karen ken ijime er 2,600 nahan la kpa lu orjighjigh, Habaku ken ishima je la, tsô a pine Aôndo ér: “TERE, ka nan je m yila, man We U kera ongom ga? M genger imo her a We mer: Ipila; kpa U rumun u yiman ga. Ka sha ci u nyi U erem m nengen a iferkwagh man m kenger icana? Gadia mtim man ipila mbam sha ishi; numsuwen ngu, man ahendan gema mough.” (Habaku 1:2, 3) Habaku, Orheberu u lu profeti la, yange nenge aeren a sha ipila a kundan un iyol man tswam u ior lu eren sha ayange a na la. Nyian kpa, se mba ongo abaver sha kwagh u aeren amba la nahan hanma iyange, man abaver ne nga ne ior mba lun a mhôônom ma zungwen ishimavihin.

Aôndo yange hure ishimanyian i Habaku la keraa? Ei. Yange kegh ato sha mbampin mba Habaku pine sha mimi la, nahan a lam a or u ican er un ken ishima kpishi ne kundu kundu shi a taver un ishima kpaa. Yehova Aôndo taver jighjigh u nan u Habaku, á tôndo zwa a na ér una va kar a ican i yan kera. Loho u Aôndo u nan ior ishimaverenkeghen ne ua taver we ishima er yange u taver Jayne man tsombor na nahan. Ngeren mba ve dondo ne vea na mbamlumun sha mbampin mba ve dondo shin heen ne: Se er nan ve se fa ser Aôndo we ikyo sha kwagh wase mimini? Kanyi Aôndo una er sha u been a ican i yana, man a lu hanma shighee?