Mimi Je, Aôndo We Se Ikyo Er I Hii Ve Se Fe Yô

IOR ndera pinen mpin u hange hange ne ka kwagh u nyian a mi ga, ka mpin u ior ve hen sha mi anyom udubu imôngo yô, ér: Aluer se doo Aôndo ishima yô, er nan ve ican i ngee yum nahana? Sha mimi yô, or ka nana doo u ishima yô, u soon wer nan ya ican ga, shi aluer nan nyôr ken zayol yô, ka keng u ker gbenda u wasen nan. Sha nahan yô, ior ka ve hen ér er ican i yan i ngee ken tar yum yô, kwagh la tese je ér Aôndo wa ikyo sha kwagh wase ga. Kpa hiihii yô, doo u se vande nengen ikyav i tseer tseer, i i tese ér se doo Aôndo ishima shi a wa se ikyo kpaa la.

Igbetar Er Shiada Ér Se Doo Aôndo Ishima

Ka Yehova a “er Sha man tar man zegemnger kua akaa a a lu ken ve cii kpaa ye.” (Aerenakaa 4:24) Aluer se time sha akaa a Yehova a gbe la yô, ka keng se kure ikyaa ser a wa ikyo sha kwagh wase. U tesen ikyav yô, hen ase sha akaa a ka a na u msaanyol ken ishima la. Kwaghyan u dedoo doon wee? Yehova yange ma fatyô u gban ityô kwaghyan i môm tseegh sha u se yaan sha er se lu uma yô. Nahan kpa, a gba atô a kwaghyan kposo kposo a nyohon ken zwa, a ngee gande ôron. Shi Yehova er ikyon man uimondon wue wue kua ugbulumaa mba doon ashe sha er uma wase una hôm yô.

Shi hen ase sha gbenda u i gbe se la kpaa. Kwagh ka a hôm se, ka sea ungwa ityogholough mbi doon yô, i kundu se iyol, shi akaa a doon ashe nga doon se u kenger; nahan kpa, uma wase har sha akaa ne keng ga. Ka akaa a Aôndo a ne se sha u nan se mkunduyol ken uma tsô. Shi nenge ase sha kwagh u ikyar i se ye vea mbagenev la. Ka an je, nan soon u lun imôngo vea ahuraior a dedoo ga, shin ka an je or u doon nan ishima ka nana̱ kuve nan ve i doo nan  ga? Sha kpôô yô, mdoo u mbagenev ve doo se ishima la kpa ka iyua i Aôndo u a lu a ikyo i wan la a ne yô! Er Aôndo a gbe uumace a tahav mbu lun a dooshima yô, a̱ shi nan kpa, ieren ne ngi i môm ken aeren a Aôndo kpa a lu a mi yô.

Bibilo Na Se Ibumun Ér Se Doo Aôndo Ishima

Bibilo kaa a vese ér Aôndo ka dooshima. (1 Yohane 4:8) A tese se dooshima na ken igbetar tseegh ga, shi a pase se un ken Mkaanem nam, Bibilo kpaa. U tesen ikyav yô, Bibilo pase se akaa a se er ve aa wase se u lun dedoo yô, i̱ wase se u eren kwagh akuma akuma sha akaa cii, shi i̱ ta se icin sha kwagh u ihundugh ki msôrough man hua u eren.—1 Mbakorinte 6:9, 10.

Bibilo shi wa se kwagh u doon tsung u tesen se er i doo u se luun a mbagenev yô. I̱ wa se kwagh ér mbagenev ve doo se ishima, se̱ naan ior icivir shi se̱ eren a ve dedoo kpaa. (Mateu 7:12) I̱ venda aeren man anza a van a ican la, er hua man angereke man iyuhe man idya kua iwoo-or nahan. Ior cii vea nôngon u eren sha kwaghwan u injaa u ken Ruamabera la yô, ka keng ican ma i pande ken tar ne kpishi je.

Ikyav i hemban cii i tesen er se doo Aôndo ishima yô, ka mne u yange na wan na, Yesu sha u a paa uumace la. Yohane 3:16 kaa ér: “Gadia tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.” Sha nahan yô, Yehova ker gbenda ver a ver sha er una kar a ku man hanma ican i yan cii kera gbindigh gbindigh yô.—1 Yohane 3:8.

Se doo Yehova ishima je ka u henen a hen ga. Nahan, mayange ka saan un iyol u nengen er se lu yan ican ga. Una er kwagh sha u karen a ican i yan kera kpee je. Ka u se ker a ker ahaba sha kwagh ne ga, Bibilo pase se jighilii er Aôndo una kar a ican i yan kera yô.

[Foto u sha peeji 4 la]

Mdoo u mbagenev ve doo se ishima la ka iyua i Aôndo u lun a dooshima a ne se yô