Akaa A Van A Msaanyol Hen Tsombor

Shighe u Nomou Shin Kwase Wou A Lu Dedoo Ga Yô

Er yange i zuam a angev mbu nan or vôron gbeda gbeda la je, lu nomom tseegh gema eren tom u uke ye. Kpa mayange lamen a mo sha kwagh u inyaregh ki se vihin ga. Er nan ve a bughun mo zwa sha kwagh u inyar ga kuaa nahana? Kwagh ne na yô m hen mer, alaghga tsô se mba a anzô iyol kpishi aa a hen ér me fa yô, a doom ga yô.—Nancy. *

IVAA ka i va a mtaver ashighe agen, kpa zum u nom shin kwase nan gbe icôron uange yô, kwagh la ka a hemba van a ican cii. * U ngu nengen sha nomou shin kwase wou u a lu kor kor yôô? Nahan, ashighe agen mbampin mba ve dondo ne ka ve va u ken ishimaa: ‘Aluer angev mbu kwase wam shin orya wam seer a seer yô, me er nena? Me za hemen u nengen sha a na shi yôron iwer, sôron ya lun tsembelee shi eren tom u uke a kuma shighe nena? Er nan ve ka i lum er ma i lu mo ma m gbe angev, ma i lu ikyarem ga?’

Nahan kpa, aluer ka we i vihi u iyol yô, alaghga u hen wer: ‘Me na iyol yam icivir shighe u m kanshio u eren ityom yam nena? Ishima ka i vihi ikyarem a mo sha ci u m ngu dedoo ga yumuu? Msaanyol u yange se lu a mi ken ivese yase la kera ngu gaa?’

Kwagh er vihi yô, ior mbagenev pav ivaa sha ci u icôron uange. Nahan kpa, u ngu wer gba u ivaa you kpa ia kure ken mpav keng ga.

Noov man kasev mbagenev kpishi za hemen u lun imôngo saan saan, shin er bouange a ker mô ken a ve nahan kpaa. U tesen ikyav yô, nenge ase kwagh u Yoshiaki man Kazuko. Yange Yoshiaki sombo igyôndo ijime, lu u una fatyô u tenger iyol cuku tsô kpaa ér una zende sha a iwasen i orgen shio ga. Kazuko kaa ér: “Ka i gba u a wase orya wam u eren hanma kwagh cii. U nengen sha a na nahan ne na yô, mon man akende man akaseaveegh gema ngeregh mo ker, nahan m ze iyouci i sôron iangev mbi sha uijuan man akuhe man igbila. Ashighe kpishi ka i lum er u nengen sha or ka tom u kpegh ga nahan.” Shin er mbamtaver ve lu nahan kpa, Kazuko kaa ér: “Mo vea orya wam se hemba mban kôôsôô cii.”

Nahan yô, kanyi ia na ve a saan nom man kwase iyol ken imba mlu nee? Noov man kasev mba ka vea lu ken imba mlu ne kpa ve lu a mkom her yô, ka ve tôô ér ka ikyar ve la tseegh nan gbe angev ga, kpa ka ve uhar cii ve gbe angev mbu shon ye. Kera ga je kpa, nom shin kwase ka nana̱ gba angev yô, kwagh la a bende a ve cii, ka  a lu sha igbenda kposo kposo kpaa. I pase mhar u nom man kwase ve haren sha ayol a ve ne ken Genese 2:24 ér: ‘Ka sha ci u nahan man or ka nan undu ter u nan kua ngô u nan, nan var ken kwase u nan, ve hingir iyôgh i môm ye.’ Sha nahan yô, zum u nom shin kwase nan gbe icôron uange u been fele ga yô, ka hange hange u ve cii vea er kwagh ken mzough sha u nôngon a mtaver la.

Heela tseegh ga, kwaghtôvon tese ér noov man kasev mba ve lu kangenaa shighe u mô ken a ve nan gbe icôron uange yô, ka ve lumun a mlu ve la shi ve ker igbenda i a hoghor ve a mi kpaa. Igbenda kpishi i ka ve ker u nôngon a angev mbura la zua sha kwaghwan u Bibilo u lun a inja hanma shighe la. Time ase sha mbamhen mba utar mba ve dondo ne.

Waan Nen Ayol a En Ikyo

I nger ken Orpasenkwagh 4:9 ér: “Guda uhar a u môm.” Sha ci u nyi? Ivur 10 pase ér, “gadia aluer vea gba kpaa, u môm nana kôr ugen nan mough a nan sha.” U ‘moughon a ikyar u sha’ sha u wuese un kpa?

Ne mba keren igbenda i wasen ayol a en kpa? Yong, u kwase na a kpe vegher môm yô, kaa ér: “Ka m nôngo u wan ishima a kwase wam hanma ihyongo cii. Imura ka ia kôrom yô, m tôô mer alaghga tsô un kpa imura kôr un. Ka a lum pe duen ken won za kenger akôngo a doon ashe yô, m pine un, una soo u dondon mo yô. Se mba nôngon a mnyoon la shi wan ishima imôngo.”

Sha gbaa ugen di yô, aluer ikyar u ngu nengen sha a we kpa, akaa agen nga a u fatyô u eren iyol you, a mzeyol shio yôô? Aluer nga a ú fatyô eren yô, kwagh ne una na yô, u hemba nengen wer u gba kwagh, shi alaghga ieren ne ia na nomou shin kwase wou una seer nengen sha a we doo doo.

De gbe tôôn tsô wer u fa gbenda u hemban doon u ú wa ikyar u ikyo ga. Er nan u pin un kwagh u una hemba doon un ishima ga? Nancy, u se vande teren un ken mhii u ngeren ne la yange va pase nom na er lu un ken ishima sha ci u un fe kwagh u inyaregh ki tsombor ve ga yô. Hegen nom na hembe pasen un inyaregh ki tsombor ve u vihin yô.

KAR KWAGH NE: Nger akaa a u hen wer ikyar u una er ve mlu wou una lu u guda yô, shi ôr ikyar u kpa a er nahan. Na ikyar u kwagh u ú nger la, un kpa a na u u̱ na la. Hanma wen yô, nana tsua kwagh môm shin akaa ahar ken akaa a ne nger la a nana fatyô u eren yô.

Sôr Nen Shighe Wen Ver Nen sha Inja

Tor u fan kwagh, Solomon, yange nger ér, “Hanma kwagh ngu a ayange [shin shighe] na.” (Orpasenkwagh 3:1) Nahan kpa, alaghga a taver ne u sôron shighe wen sha inja vough sha ci u ahô agen icôron uange ka i kende kpoo, i bunde kwagh u tsombor u we ishima u eren la. Kanyi ne fatyô u eren sha er a̱ gande kera kera kpa, ne wa yaren tom a shighe wen sha injaa?

Ne fatyô u tôôn shighe eren akaa agen imôngo. Ne fatyô u eren akaa a yange ne eren imôngo cii ve angev va kôr mô wen la kpa? Aluer ne kanshio yô, ka nyi akaa a he nahan ne fatyô u erene? Alaghga ne tsua u eren kwagh u ican ga, er u ôron takerada ayol a en nahan, shin a lu kwagh u taver, er u henen zwa u he nahan. Aluer ne mba eren akaa a angev mbu yange ne u eren ga la imôngo yô, kwagh ne una taver mlu wen u ne lu “iyôgh i môm” la, shi una seer msaanyol wen kpaa.

Kwagh ugen u una wase ne u eren kwagh a shighe wen sha inja yô, ka u lun vea mbagenev imôngo. Bibilo kaa ken Anzaakaa 18:1 ér: “Or u nan dugh iyol i nan kposo yô, ka isharen i nan iyol i nan, nan keren ye, nahan nan mough num a kwaghfan u mimi cii.” U nenge er ivur ne i kaa ér u lun tswen ka kwagh u a benden a mhen u or sha gbenda u bo kpa? Nahan kpa, aluer u ngu lun vea mbagenev sha ashighe ashighe yô, kwagh ne una va u a msaanyol shi u hemba henen kwagh sha gbir. U fatyô u lôhôn or imôngo hen ya wou.

Ashighe agen yô, ka i taver nom man kwase u nan lu nengen sha ugen la u eren kwagh akuma akuma. Mbagenev ka ve er tom i kar ikyaa inya, nahan tegh tegh tsô ve vôr, shi i hingir u ve kpa vea va gba a gba angev. Tom ve u eren yum ne ka u na yô, ve kera fatyô u nengen sha ikyar ve u doon ve ishima la ga. Nahan yô, wea lu nengen sha nomou shin kwase wou u a lu a icôron  uange je kpa, kwagh la a de yangen we u nengen sha iyol you ga. Ver shighe u memen tswen sha er u hide u zua a agee ou her yô. * Mbagenev nenge ér ka vea lam sha akaa a nan ve ishimanyian vea ijende ve i ve ne i jighjigh i̱ i̱ lu nomsoor er ve nahan shin kwase er ve nahan la yô, ve zua a mpeveryol.

KAR KWAGH NE: Nger mbamtaver mba u tagher a mi er u nengen sha orya wou shin kwase wou la shin takerada. Shi nger akaa a u fatyô u eren sha u hemban mbamtaver mban shin nôngon a ve tsembelee yô. De zeren henen sha mbamtaver mba shon ga, kpa pine iyol you wer, ‘Ka gbenda u nyi u hembe lun ican ga, shi u hembe lun wang u sôron mtaver ne?’

Nôngo u Lun a Mnenge u Dedoo

Bibilo ta icin ér: “De kaan wer: Ka nyi ayange a tsuaa la a hembe doon a ahegene? ga.” (Orpasenkwagh 7:10) Nahan yô, de zeren henen sha akaa a angev mbura mbua lu ga ve ma ne eren la ga. Umbur wer hanma msaanyol ken tar ne yô, ngu a kighir. Tamenkwagh heen yô, ka u lumun mlu wou shi nôngon a mi sha afatyô wou cii.

Kanyi ia wase u kua ikyar u ken gbenda nee? Lam nen sha averen a ne zough a mi la imôngo. Aluer guda va sha angev mbura kpuaa tseegh kpa, ember nen. Tsua nen akaa a ne fatyô u veren ashe a mi imôngo yô, shi tsua nen akaa imôngo a ne fatyô u eren yô.

Orgen mba yer iti na ér Shoji, vea kwase na Akiko ve dondo kwaghwan u a lu sha heen ne, nahan ve zua a iwasen kpishi. Shighe u i zua kwase na a icôron uange igen i kpen or iyol ker gbedôô shi yangen nan mnyam yô, gba u vea de tom ve u Mbakristu ugen u ve eren hanma shighe la. Yange lan ve ishimaa? Ka keng yange a lan ve ishima. Nahan kpa, Shoji wa hanma or u nan lu ken imba mlu la cii kwagh ér: “De henen sha akaa a i lu u̱ ú kera fatyô u eren ga la ga, gadia aa na u iyolkpen. Lu a mnenge u vough. Aluer nea lu a ishimaverenkeghen ér iyange igen ne hide ne eren akaa vough er tsuaa la nahan kpa, ver nen ishima sha uma wen er a lu hegen la. Mo yô, m hembe veren ishima sha kwase wam sha u wasen un.” Aluer nomou shin kwase wou ngu a ma icôron uange yô, we kpa, kwaghwan u injaa ne una fatyô u wasen we.

[Ngeren mba shin kpe]

PINE IYOL YOU . . .

Kanyi i hembe gban u mo man ikyarem se eren hegene?

▪ Se hemban lamen sha kwagh u angev mbura

▪ Se lamen sha kwagh u angev mbura kpishi ga

▪ Se kera de ser ishima i za se iyol kpishi ga

▪ Se hemba wan ayol a ase ikyo

▪ Se eren akaa a a doo se cii u eren la imôngo, á lu u nôngon a angev mbura tseegh ga

▪ Se hemban lun imôngo vea ior mbagenev

▪ Se tsua akaa a se we ishima u eren la imôngo

[Foto u sha peeji 18 la]

Ne fatyô u eren kwagh akuma akuma man sha inja sha u eren ma inumbe imôngo kpa?