Tese Ônov Ou

Yeremia Hire Ijime Ga

ASHIGHE agen iyol ka i kpe u, i lu u ape den kwagh u ú lu eren laa?— * Ior kpishi ka i lu ve nahan. Gumor Yeremia kpa kape lu un je la. Nahan kpa, a yina ishima sha ci u kwagh u mbagenev lu ôron shin lu eren la ga. De se ôr kwagh u Yeremia tsô se nenge er nôngo u yinan ishima, shin er lu or u Aôndo u sôngo sôngo nahan kpaa.

Cii man i mar Yeremia yô, Yehova, Aôndo u mimi la tsua un ér a lu profeti u tan ior nav icin er ve lu eren ishima i Aôndo ga yô. U fa kwagh u Yeremia yange va ôr a Yehova anyom kpishi ken hemen kpa?— A kaa a na ér, “M fa u ôron kwagh dedoo ga, gadia m ngu wanye je.”

U hen wer Yehova kaa a Yeremia ér nyi?— A lam a na kundu kundu, kpa a gema a ôr kwagh a na kukuku ga, ér: ‘De kaan wer: M ngu wanye, ga. Gadia hanmô u Me tindi u her a nan yô, ka hen a nan ú za ye, man hanma kwagh u Me kaa u yô, ka wen ú ôr ye. De cie ve ga.’ Sha ci u nyi? Yehova kaa ér, “M ngu a we sha u yiman we.”—Yeremia 1:4-8.

Nahan cii kpa, er se vande ôron nahan, iyol va kpe Yeremia. Kwagh lu nahan sha ci u i nahan un tar ér ngu civir Aôndo yum. A kaa ér, “m hingir kwagh u ahan iyange jimin cii.” Tsô a soo ér una de u civir Aôndo. A kaa ér: “Me kera ter Un ga, me kera ôr kwagh ken iti [i Yehova] kpaa ga.” Kpa yange dee?

Yeremia kaa ér: “Hingir mo ken ishima er usu u hian, u i cir u ken akuhe am yô, m wa ishima je, m vôr, hembam kera.” (Yeremia 20:7-9) Shin er ashighe agen yange i cier Yeremia iyol nahan kpa, er Yehova doo un ishima yô a hire ijime ga. De se nenge er Yeremia yange de u civir Yehova ga ve, Yehova kura un yô.

Yehova kaa a Yeremia ér a ta ior nav icin ér, aluer ve sôr igbenda ve i bo la ga yô, a va tim Yerusalem kera. Yeremia te ve icin nahan yô, asema vihi ve ker, ve kaa ér: “Or ne kuma ku.” Kpa Yeremia zamber a ve ér ve ‘wa imo i TER, Aôndo ikyo.’ Maa a kaa ér: ‘Kpa fa nen mimi je, aluer né  wuam yô, né va a awambe a orishôôgh sha ityough yenegh, gadia mimi je, TER tindim her a ven ér, m̱ ôr akaa ne cii sha ato a en.’ Nahan u fa kwagh u yange er hen shighe la kpa?—

Bibilo kaa ér: “Nahan atiator kua ior cii kaa a upristi man a uprofeti er: Or ne kuma ku ga, gadia a ôr se kwagh ken iti i TER, Aôndo wase.” Nahan er Yeremia de ér mciem ma yange un u civir Yehova ga yô, Yehova kura un. Hegen, de se nenge kwagh u yange er Uria, profeti u Yehova ugen u er kwagh kposo a Yeremia yô.

Bibilo kaa ér, ‘Uria ôr kwaghôron u profeti sha gar u Yerusalem vough er Yeremia nahan.’ Kpa zum u ishima vihi Tor Yehoyakim a Uria yô, u fa kwagh u Uria er kpa?— A cia, a de u eren ishima i Aôndo, a yevese a yem ken Igipiti. Tsô tor Yehoyakim tindi ior ken Igipiti ér ve za ker un ve hide a na. Mba za hidi a na yô, u fa kwagh u bo tor la er kpa?— Yange wua Uria sha sanker!—Yeremia 26:8-24.

U hen wer Yehova kura Yeremia, kpa Uria yô a kura un ga sha ci u nyi?— Yeremia lu a mciem er Uria nahan, kpa Yeremia de u civir Yehova, yevese yem kwagh na er Uria nahan ga. A hire ijime ga. Ka nyi se fatyô u henen sha ikyav i Yeremia laa?— Se hen ser, ashighe agen a taver se u eren kwagh u Aôndo a kaa yô, kpa doo u hanma shighe yô, se na un jighjigh shi se ungwa imo na kpaa.

[Ngeren u shin kpe]

Mbampin:

○ Kanyi tom Aôndo tsua sha ci u Yeremia?

○ Er nan ve Yeremia nôngo u yinan ishima?

○ Yehova kura Yeremia, kpa gema kura Uria ga sha ci u nyi?

○ Ikyav i Yeremia la tese u nyi?