Mpin U Mbaôron Takerada Ne . . .

Ka Yesu a Lu Ortyom u Tamen u i Yer Un Ér Mikael la Yee?

▪ U tan a ta aningir ga yô, ka Yesu a lu Mikael ye. Sha ajiir kpishi, ieren i lun a ati kpishi la i dumbur. Kape ken Bibilo kpa mbagenev ve lu a ati kpishi je la. Ikyav i tesen yô, iti i tertamen Yakob igen ér Iserael. (Genese 35:10) I na apostoli Peteru ati kposo kposo ataan. Ati shon yô ka Shimeon man Shimon man Peteru man Kefa kua Shimon Peteru. (Mateu 10:2; 16:16; Yohane 1:42; Aerenakaa 15:7, 14) Er nan se fe ser Mikael kpa ka iti i Yesu igene? Time ase sha kwagh u Ruamabera a er ne, er se tese shin heen nahan.

Bibilo ter Mikael, ortyom u ageegh la kuma kwa taan. Ken takerada u Daniel, i yar tom a í kwa tar. Daniel 10:13, 21, pase se ér, lu Mikael u a lu “môm ken mbatarev mba vesen” man “ortaregh wen” la yange va wase ortyom u i tindi un mape la ye. Heela tseegh ga, ken Daniel 12:1 kpa i pase se ér ken shighe u mkur yô, “Mikael, ortaregh u a nengen sha ônov mba nongo wou la, una mough á tile sha.”

Shi i ter kwagh u Mikael ken Mpase 12:7. Ivur ne pase se kwagh u ityav mbi “Mikael kua mbatyomov nav” nôngo vea Satan Diabolo man mbatyomov nav mbabov, nahan zenda ve sha Tartor kera la.

Aluer u ver shima yô, ken akaa a se ter sha heen ne cii, i ôr kwagh u Mikael ér ka ortyom u nôngon ityav sha ci u ior mba Aôndo shi kuran ve, je yô, tagher vanger a orihyom u Yehova u vesen, Satan kpaa.

Ken Yuda ivur 9, i yila Mikael ér “ortyom u Sha u tamen.” Inja i ishember i “u tamen” yô, ka “kwagh u hiihii” shin “kwagh u vesen;” shi i gbe je Bibilo ngi a yar tom a ishember i “ortyom u Sha u tamen” ne sha gbenda u tesen ér ka mbatyomov uhar i yer ve sha ititom i “ortyom u Sha u tamen” ne ga. Ivur Bibilo igen i í mase teren kwagh u “ortyom u Sha u tamen” her yô, ka 1 Mbatesalonika 4:16. Ken ivur ne, Paulu ôr kwagh u Yesu u i nder un shin ku la ér: “Ter [Yesu] iyol Na Una sen Sha sha ikyenge i kaan, sha imo i ortyom u tamen, sha mkaa u ikpamkor i Aôndo.” Nahan, i pase heen ér ka Yesu Kristu a lu “ortyom u Sha u tamen,” shin u vesen la ye.

Se fatyô u kuren ikyaa sha kwagh u se lu ôron van ne nena? Se kure ser ka Yesu Kristu a lu Mikael, ortyom u tamen la ye. Inja i iti i Mikael yô ér, “Ka An Nan Lu Er Aôndoo?” man i Yesu la di inja na yô ér, “Yehova Ka Myom.” Ati a ahar ne cii nga hemban ôron kwagh u tom u vesen u Yesu lu a mi u yôôn hemen u Aôndo la. Mbafilipi 2:9 kaa ér: “Aôndo A kende Un [Yesu u i ver un sha ian i vesen la] sha kpishi je ye, A ii Un iti i i hembe hanma iti igen cii.”

Gba hange hange u se fa ser uma u Yesu yange hii sha mmar u i mar un shin tar la ga. Cii man i mar Yesu yô, ortyom ugen va hen Maria va kaa a na ér una wa iyav sha icighan jijingi una mar wan, una ii un iti ér Yesu. (Luka 1:31) Shighe u Yesu lu eren tom na u pasen kwagh la, a zer ôron er yange un vande lun sha yô.—Yohane 3:13; 8:23, 58.

Nahan, cii man Yesu va shin tar yô, lu Mikael, ortyom u tamen. Yange nderen shin ku, hidi yemen sha yô, shi hidi lu eren tom na u Mikael, ortyom u vesen la, “sha ci u iengem i Aôndo Ter.”—Mbafilipi 2:11.