Kwagh u Yesu Tese Ior sha Kwagh u Tartor u Aôndo La

“A gba zenden nyôron ken agar a tamen man angarev mba kiriki, lu ôron kwaghaôndo, pasen Loho u Dedoo u tartor u Aôndo.”—LUKA 8:1.

KA I doo se u lamen sha akaa a lun se a inja, aa a lu se sha ishima yô. Ka er Yesu iyol na yange kaa nahan, ér “ka sha m-iv u ken ishima man zwa u er kwagh ye.” (Mateu 12:34) Aluer se time sha akaa a Yesu yange ôr kwagh sha mi shighe u pasen ior kwaghaôndo la yô, se kure ikyaa ser Tartor u Aôndo lu un sha ishima.

Kanyi i lu Tartor u Aôndoo? Tartor ka gomoti ua lu a tor u hemen yô. Nahan Tartor u Aôndo ka gomoti u Aôndo a ver yô. Yesu yange ôr ior akaa sha kwagh u Tartor u Aôndo kpishi, nahan Tartor la lu itinekwagh i loho na. Ivangeli i Mateu man Marku man Luka man Yohane ter kwagh u Tartor ne hemba kwa 110. Kpa Yesu tesen sha mkaan tseegh ga. Aeren a na kpa yange tese kwagh u Tartor u Aôndo la kpishi kua kwagh ua va er la kpaa.

Ka an nan lu Tor u Tartor u Aôndoo? Tor u Tartor u Aôndo la ka uumace ve hee un ishangen ve a tem sha ikyôn ga. Kpa, Tor ne ka Aôndo iyol na a tsough un ye. Yesu pase ken ityesen na ér, ka un Aôndo a tsough un u va lun Tor ken hemen ye.

Yesu fa er akaaôron a profeti a ken Bibilo yange tsengaôron er i lu u Mesiya u ityendezwa una hemen Tartor, u ua gba mayange ga la yô. (2 Samuel 7:12-14; Daniel 7:13, 14; Mateu 26:63, 64) Umbur wer Yesu iyol na pase ken igbar ér ka un je un lu Mesiya u i vande ôron kwagh na la ye. Nahan Yesu lu pasen wener ka un je un lu Tor u Aôndo a tsough la ye. (Yohane 4:25, 26) Sha nahan yô, Yesu ôr kwagh ter ishember i “Tartor Wam” la kwa imôngo.—Yohane 18:36.

Shi Yesu tese ér ior mbagenev mba, mba vea hemen ken Tartor la vea na imôngo yô. (Luka 22:28-30) A yila ve mba vea tema tor a na imôngo mban ér “anikyumuile u kpeghee,” sha ci u vea vese iyenge ga. A kaa a ve ér: “Doo Ter wen u nan ne tartor la.” (Luka 12:32) Takerada u ken Bibilo u masetyô la tese ér mba vea zua a ian i civirigh i hemen sha vea Kristu la vea lu iorov 144,000.—Mpase 5:9, 10; 14:1.

Ka han Tartor u Aôndo u lu? Yesu kaa a Pontiu Pilatu, Orromanu u lu tor la ér, “Tartor Wam ka u shin tar ne ga.” (Yohane 18:36) Á lu uumace vea hemen ior ken Tartor u Aôndo, u u lu sha ikyev i Kristu la ga. Yesu yila Tartor u Aôndo  kwa kimbir kimbir ér “tartor u Sha.” * (Mateu 4:17; 5:3, 10, 19, 20) Sha nahan yô, Tartor u Aôndo ka gomoti u sha.

Shighe u Yesu kure tom na u shin tar la lu a awashima u hiden yemen sha. Yange kaa ér una za ‘sôr ijiir’ sha, sha er gbenda ua bugh u mba vea tema tor a na imôngo mbara vea za kohol un yô.—Yohane 14:2, 3.

Tartor u Aôndo ua er nyi? Yesu tese mbaungwan un u eren msen hen Ter na ér: “Tartor Wou u̱ va, i̱ er ishima You shin tar kpaa vough er i eren i Sha nahan.” (Mateu 6:9, 10) Mba eren ishima i Aôndo sha. Tartor u Aôndo la ka gbenda u Aôndo una kure awashima na sha ci u tar yô. Tartor la ua va a mbamgem mba kpilighyol shin tar ne sha u kuren awashima la.

Tartor u Aôndo ua er nyi shin tara? Yesu tese ér Tartor u Aôndo ua kar a iferkwagh kera sha u timin mba ve shi sha ifer i eren la cii. (Mateu 25:31-34, 46) Nahan a lu mbee u tarvihin kua ifer jimin cii je la. Yesu tese ér tar ua iv a ior mba ve lu a “ishima i legh legh” man mba perapera man mba zungwen mhôônom man mba ve lu “asema wang” kua mba soon beem.—Mateu 5:5-9.

Mbananjighjigh mbara vea lu shin tar u u vihi cii nee? Mayange ga cii! Yesu tôndo zwa ér tar ua gema sha gbenda u kpilighyol sha ikyev i Tartor u Aôndo. Orgen u yange gba u a wua un vea Yesu imôngo yô kaa ér: “Yesu, umbur mo zum u Wea nyôr sha tartor Wou yô.” Yesu gema kaa a na ér: “Mimi je M kaan we nyian ne, ú lu a Mo imôngo ken Paradiso.” (Luka 23:42, 43, NW.) Sha mimi yô, Tartor u Aôndo ua gema tar cii ua hingir paradiso, er paradiso u lu ken sule u Eden la nahan.

Kanyi igen Tartor u Aôndo ua er sha ci u uumacee? Yesu er ityendezwa sha kwagh u Tartor u Aôndo ua er la tseegh ga. Yange tese ikyav i  kwagh u Tartor shon ua er la kpaa. Yesu bee ior kpishi angev sha ivande, nahan lu tesen ikyav i kwagh u una va er shighe u una hemen ken Tartor na la jim jim yô. Ivangeli i Aôndo a ne i nger la ôr kwagh u Yesu ér: “Yesu zende ken tar u Galilia cii, lu tesen ken ushinagoge vev, lu ôron Loho u Dedoo u tartor, lu been ior hanma injauange man shi hanma mtseenem kpaa.”—Mateu 4:23.

Yesu bee ior angev atô kposo kposo. Yange bee “orgen u i mar nan a ashe a pirin yô.” (Yohane 9:1-7, 32, 33) Yange naregh uwegh bende orimande ugen iyol, imande i̱ i̱ lu angev mbu ndôhôr ishima tsung la, nahan imande maa bee un. (Marku 1:40-42) Zum u i va un a “or u kondon ato, u eren ikyeghem” yô, Yesu tese ér una fatyô u eren ‘mbakondonato vea ungwa, mbakondonaker kpaa vea lam.’—Marku 7:31-37.

Tor u Aôndo a tsough la ngu a tahav mbu nderen mbakpenev je kpaa. Yesu yange nder mbakpenev sha ashighe kposo kposo kuma kwa tar. Yange nder orgen, u i mar un tswen, ngô na lu kwasecôghol yô, shi nder wankwase u lun anyom 12 shin ku, shi nder Lasaru, u lu ijende na i ishima ishima la shin ku.—Luka 7:11-15; 8:41-55; Yohane 11:38-44.

Yesu ngur pasen er mlu u mba vea lu sha ikyev i Tartor u Aôndo la una doo tsung yô, a tsengaôron sha ikyev i apostoli Yohane ér: “Nenge, tenti u Aôndo ngu hen ior, Una tema a ve, vea lu nongoior Na, Aôndo iyol Na Una lu a ve. Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.” (Mpase 1:1; 21:3, 4) Nenge er mliam man ican man ku ua kera lu shin tar ga ve a doo sha wono! Hen shighe la, a gema eren ishima i Aôndo shin tar vough er i eren i sha nahan, er se sen ken msen nahan.

Ka Hanma Shighe Tartor u Aôndo Ua Va? Yesu tese ér hemen u mtemtor na la ua hii sha shighe u yange yila ér ka shighe u “mve” na la. Yange tsengaôron kwagh u una lu ikyav i tesen shighe u mve na u sha hemen u mtemtor na la una hii la. A tsengaôron kwagh ne vighe vighe. Sha shighe la, mbamzeyol er ityav mbi nôngon man ijen man ityartenger man ubombauangev vea tser tar cii, shi mvende u vendan atindi kpaa una lu seer a seer. (Mateu 24:3, 7-12; Luka 21:10, 11) Akaa ne kua akaa agen kpishi a Yesu tsengaôron ér aa er la cii, hii duen ken igbar ken inyom i 1914, shighe u Ityav mbi Tar Cii, mbi sha 1 hii la. Sha nahan yô, Yesu tema Tor, ngu hemen hegen. Ica a kera gba ga tsô, se ar sha shighe u Tartor la ua va shi ua na a gema eren ishima i Aôndo shin tar la. *

Mve u Tartor u Aôndo la una bende a we nena? Kwagh la cii har sha gbenda u ú tsough u dondon loho u Yesu la.

[Ngeren mba shin kpe]