Loho u Yesu Kristu Bende a Ior Nena?

ORNGEREN TAKERADA u i yer un ér GREGG EASTERBROOK la kaa ér: “Sha mimi yô, ikyav i hemban cii i tesen ér orfankwagh u ken Kapernahum la yange lu kpôô kpôô yô, ka mlu u kwagh na a lu ior ken asema her zan zan la.” *

MKAANEM ma a tahav. Mkaanem ma i er ma sha inja ka ma kôr ior ken ishima, ma na ve ishimaverenkeghen shi ma gema uuma vev kpaa. I gbe je, or môm kpa nan ngu a ôr mkaanem ma kôron ior ken ishima tsung er Yesu Kristu nahan ga. Orgen u yange ungwa ityesen i Yesu i sha uwo, i í fe hegen kpuun la, nger ér: “Tsô er Yesu been akaaôron ne yô, kpiligh ikpelaior iyol a ityesen Na.”—Mateu 7:28.

Zan zan nyian kpa, ior sha tar cii hoghor a akaa kpishi a Yesu ôr yô. Nenge ase mkaanem nam magen kpuaa ma ma lu a injaa tsung yô.

‘Ne fatyô u eren Aôndo tom kua inyaregh kpaa ga.’—Mateu 6:24.

‘Akaa cii a i sar ne ka ior ve̱ er ne yô, ne kpaa er nen ve di nahan je, gadia ka atindiakaa kua uprofeti je la.’—Mateu 7:12.

‘Na nen Shisar akaa a a lu a Shisar yô, Aôndo kpaa na nen Un akaa a a lu a Aôndo yô.’—Mateu 22:21.

‘U nan a na kwagh hembe saan iyol a u ngohol a ngohol kwagh.’—Aerenakaa 20:35.

Nahan kpa, Yesu er kwagh hemba di u ôron akaa a ior vea umbur a gbem tsô la. Loho u yange pasen la ngu a tahav sha ci u ú tese mimi sha kwagh u Aôndo shi u tese ior kwagh u vea er ve vea zua a mkom u mimi ken uma yô, shi u pase wang ér ka Tartor u Aôndo ua va uumace a mpeveryol sha atsan a ve lu yan la cii ye. De se time nen sha loho na ne ken upeeji mba ve dondo ne, tsô se nenge er i hii ve kwagh u Yesu “a lu ior ken asema her zan zan” yô.

[Ngeren u shin kpe]