Tese Ônov Ou

Yesu Hen u Ungwan Kwagh

ASHIGHE agen ka i taver we u ungwan kwagha?— * Ka kwagh u kpilighyol ga, aluer taver we u eren nahan yô. Hanma or cii ashighe agen ka i taver nan u ungwan kwagh. U fa er Yesu je kpa yange gba u una hen u ungwan je he?—

U fa mba i gbe u agumaior cii aa ungwan imo ve kpa?— Ka mbamaren asev. Bibilo kaa ér: “Ungwan nen imo i mbamaren enev ken Ter.” (Mbaefese 6:1) Ka an nan lu ter u Yesuu?— Ter na ka Yehova, shi ka un kpa a lu Ter wase ye. (Mateu 6:9, 10) Nahan kpa, aluer u kaa wer ter u Yesu lu Yosev man ngô na lu Maria kpa, heela kpa u kaa shami. U fa er yange er ve v̱e hingir mbamaren nav kpa?—

Er Maria lu a vande yaven a or ga nahan kpa, ortyom Gaberiel ôr un er a er ve una hingir ngô yô. Yehova yange er ivande i kpilighyol ve Maria wa iyav mbura ye. Gaberiel kaa a Maria ér: “Agee a Uhembansha la kpaa aa kase u; ka sha ci u nahan man Un u á mar Un la á yilan Un er Icighanwan u Aôndo ye.”—Luka 1:30-35.

Aôndo yange tôô uma u wan na u sha la va wa ken iyav mbu Maria. Maa uma la vese ken iyav mbura er mbayev mbagenev kpa ka ve vese ken iyav mbu ungô vev nahan. Iwer ngi kar er itiankarinyiin nahan yô, i mar Yesu. Hen shighe ne, Yosev vôso Maria, nahan ior kpishi tôô ér Yosev ka ter u Yesu kpôô kpôô. Kpa sha mimi yô, Yosev lu di terkyoson u Yesu tsô. Sha nahan yô, a fatyô u kaan ér Yesu lu a uter uhar!

Shighe u Yesu lu anyom 12 tseegh la, a er kwagh u tesen ér Yehova, Ter na u sha la, doo un ishima kpishi. Hen shighe la, tsombor u Yesu er gôgô-zende, yem ken Yerusalem sha ci u iniongo i paseka, er ve vanden eren nahan. Paseka been, mba ngur hiden hen ya ve ken Nasareti yô, Yosev man Maria fa er Yesu lu vea ve ga ze. U fa kwagh yange na ve v̱e hungur un kpa?—

Hen shighe ne, Yosev man Maria ve lu a mbayev mbagenev kpaa. (Mateu 13:55, 56) Shi adooga ve lu hiden yemen vea anmgbianev vev mbagenev, er Yakobu man Yohane kua ter ve Sebedeu man ngô ve, Salome, u adooga lu anngô u Maria u kwase la nahan. Nahan, alaghga tsô Maria hen ér Yesu ngu vea anmgbianev vev mbagenev.—Mateu 27:56; Marku 15:40; Yohane 19:25.

Yosev man Maria mba kaven er Yesu a saa yô, ve hile ayem ve yem ken Yerusalem. Ve ker wan ve a ishimanyian. Ka ker iyange i sha utar yô, ve za zua a na ken tempel. Maria kaa a na ér: “Ka nyi U er a vese nahana? Nenge, teru man mo, se lu keren We a ishima i nyian je.” Kpa Yesu gema kaa ér: “Er nan man ne keren  Mo? Ne kera fa er i lu u Me lu ken akaa a Terem keng gaa?”—Luka 2:45-50.

U hen wer gbenda u Yesu lam a ngô na la lu sha mi gaa?— Mbamaren nav yange ve fa er doo un u civir Aôndo hen iyou Na yô. (Pasalmi 122:1) Sha nahan yô, lu sha mi u Yesu henen ér tempel u Aôndo una lu ijiir i hiihii i vea ker un her ga he?— Shighe kar yô, Maria zer henen sha kwagh u Yesu ôr la.

Yesu yange tese ieren i nyi hen Yosev man Maria?— Bibilo kaa ér: ‘Yesu yem a ve, A va ken Nasareti, A lu ungwan imo ve.’ (Luka 2:51, 52) Se fatyô u henen nyi sha ikyav i Yesu a ver nee?— Gba u se kpa se ungwan imo i mbamaren asev.

Nahan kpa, lu hanma shighe cii luun Yesu ican ga u ungwan kwagh ga, a lu u ungwan imo i Ter na u sha je kpaa.

Hen tugh mbu kpernan i wua Yesu la, a soo u fan aluer ka u Yehova una gema ishima Na sha kwagh u A tindi un ér una er la yô. (Luka 22:42) Shin er lu Yesu ican u eren kwagh shon nahan kpa, a ungwa imo i Aôndo. Bibilo kaa ér, “A hen ikyo i wan sha atsan a A ya la.” (Mbaheberu 5:8) U hen wer se kpa se fatyô u henen kwagh sha kwagh nee?—

[Ngeren u shin kpe]

MBAMPIN:

▪ Maria yange hingir ngô u Yesu nena, shi er nan ve Yesu hingir u lun a uter uhara?

▪ Er nan ve Yesu lu hiden vea mbamaren nav ga kpa ve fa ga?

▪ Lu han Yesu ver ishima ér mbamaren nav ve ker unu?

▪ U fatyô u henen nyi sha ikyav i Yesu a ver laa?

[Foto u sha peeji 31 la]

U hen wer doo u Yosev man Maria yange ma ve vande keren Yesu ken tempel sha ci u nyi?