Bibilo Gem Ior

KANYI yange i na ve orgen ken nongo u mba umen ityough meghaa mba i yer ve ér Rastafarians la pande ice na, shi de u kôron abuter ihyomo? Shi kanyi i wase gumor ugen u yange wa tswam, shi ngohol inyaregh sha ci u mba teen mcimbim ma bom u geman uma naa? Ungwa ase kwagh u iorov mba uhar mban ve er shin heen ne.

“M de ihyom i kôron”—HAFENI NGHAMA

ANYOM: 34

TAR NA: ZAMBIA

OR U YANGE LU YÔ: ORKUHWAN TSER, U̱ UMEN ITYOUGH MEGHAA

YIASE YAM: Yange i marem ken afo a mbayevese ityav ken tar u Zambia. Ngôm yevese undu tar u Namibia, shighe u utya, za nyôr mzough u i yilan ér South West African People’s Organization (SWAPO) la. Mzough ne lu nôngon ityav a gomoti u tar u South Africa, u lu hemen tar u Namibia hen shighe shon la.

Yange m vese ken afo a mbayevese ityav sha ajiir kposo kposo zan zan m kar kuman anyom 15. I lu tesen agumaior a ken afo a mzough u SWAPO ne ér ve sue mzough u keren tseeneke u tar ve ne. I tese se pati u eren kpoghuloo man u kôron abuter ihyom.

Zum u m lu anyom 11 la, m soo u hingir Orkristu ken côôci i ken afo, i̱ Mbakatoliko man nongo u dondon Martin Luther man mba zan adua u Anglikan cii zaan la. Kpa pasetô u m lam a na sha kwagh ne la venda a mo. Hii shighe la je, m kera na jighjigh mer Aôndo ngu ga. M nyer anyom 15 yô, mdoo u tser-kuhwan u i yer ér rege la doom ishima la, kua shi isharen i m lu a mi i wasen ioril sha atsan agen a i lu eren ve la na yô, m za nyôr nongo u mba umen ityough meghaa mba i yer ve ér Rastafarian la. Tsô m ume ityough meghaa, ice yam lu a akpena a viligh gôgônan shi m maan ikya shi inyam kpa m tswer shi m gema keren tseeneke sha ci u ioril. Kpa, m de uma u keren kasev la ga, shi ufiim mba tesen ipila i eren la kpa m de u nengen ga. Shi m za hemen u lamen a ior dang kpishi.

GBENDA U BIBILO GEMA UMA WAM LA: Ken inyom i 1995, er m lu anyom 20 la, m gba henen kwagh u me er a uma wam jim yô. M lu ôron ityakerada i í er kwagh u nongo u Rastafarian u m nyôr la, i m zua a mi la cii. Ityakerada ne igen ôr akaa ter Bibilo, kpa akaa a i pase ker la zam sha hwange ga. Nahan, m hii u ôron Bibilo iyol yam.

Shighe kar yô, huror wam ugen u se lu ken nongo u Rastafarian imôngo yô, va nam antakerada u henen Bibilo a mi u Mbashiada mba Yehova gber yô. Tsô m hii u henen antakerada la kua Bibilo iyol yam. Ka ze deghôô yô, m zua a Mbashiada mba Yehova, m za hemen u henen Bibilo a ve.

Yange m nôngo kwagh tsung, tsô m de ikya i  man kua msôrom ma man kpishi. (2 Mbakorinte 7:1) M sôr mluashe wam, m hundu akpena a icee a viligh gôgônan la shi m de u nengen ufoto mba jimbagh man ufiim mba tesen ipila i eren shi m de iliam i dang. (Mbaefese 5:3, 4) Kure kure tsô, m kera kôr abuter ihyom ga. (Aerenakaa 10:34, 35) Yange gba u me de u kuhwan tser u ua na me kôr akuraior agen ihyom la, shi me pav a ahuraior am a tse, a aa na me shi me nyôr iyol ken aeren am a tse la ve me gema uma wam sha imba gbenda ne ye.

M gem uma wam nahan cii yô, m ker Iyou i Tartor i Mbashiada mba Yehova, m za kaa a ve mer m soo u nyôron kwaghaôndo ve la. Nahan ve hen Bibilo a mo. M va soon mer me er batisema me hingir Orshiada u Yehova yô, doo tsombor wam a mo ga. Ngôm kaa a mo ér mo m tsua hanma adua ugen cii mo m zaan, kpa i de lu Mbashiada mba Yehova ga. Anmgbian u ngôm u lu ityagheror ken gomoti yô, lamen sha a mo dang hanma shighe, sha ci u m tsua mer me civir a Mbashiada mba Yehova yum.

Kpa, m hen kwagh sha gbenda u Yesu eren kwagh a ior la shi m dondo kwaghwan na la, nahan kwagh la wasem u nôngon a ahendan man imbwase i i lu kaan mo la. Er m tôô atesen a Mbashiada m kar sha kwagh u Bibilo i kaa yô, m kav wang er m zough a kwaghaôndo u mimi yô. U tesen ikyav yô, Mbashiada mba Yehova mba dondon kwaghwan u Bibilo u a kaa ér i za pase mbagenev kwaghaôndo la. (Mateu 28:19, 20; Aerenakaa 15:14) Shi mba nyer iyol ken pati u eren ga.—Pasalmi 146:3, 4; Yohane 15:17, 18.

IWASEN I M ZOUGH A MI LA: Er m hen u dondon kwaghwan u Bibilo yô, kwagh la wasem sha igbenda i injaa kpen kpen. Ikyav i tesen yô, m de ikya i man, nahan m kera vihin inyaregh udola dubu imôngo hanma uwer ga. Mnyam ma de u cier mo dang dang, shi hemba taver mo iyol shi m hembe henen kwagh sha inja hegen.

Uma wam hemba ngun a inja hegen, sha gbenda u yange m soo mer a̱ lu shighe u m lu gumor la. Man kwagh u hemban cii yô, m na jighjigh mer m kporom ikyua a Aôndo hegen.—Yakobu 4:8.

“M hen u kighir ishimanyoon yam”—MARTINO PEDRETTI

Anyom: 43

TAR NA: AUSTRALIA

OR U YANGE LU YÔ: OR U TEEN MCIMBIM MA GAREN ITYOUGH KER

YIASE YAM: Shighe u m lu iyev la, tsombor wam ngôôr moughon twev ga. M lu hen ugeri mba kiriki sha ashighe kposo kposo man geri u vesen kpaa, shi anshighe ugen la m lu hen agar agen ken toho, hen ijiir i mbamishen, i ior mba ve lu marnya u tar u Australia la. M umbur shighe u dedoo u m lu vea anmgbianev mba ngôm man ônov vev ne; se zaan sua shi se eren tato man anumbe, shi se gbaan ikyon imôngo.

 Terem lu or u tan iju, nahan hii u tesen mo num u nôngon iyev je. Num u nôngon hingir ikye yam. Shighe u m lu hian or la, m maan msôrom hen ayou a msôr didi. Mo vea azende am se bamen ior sha er se nôngo num a ve yô. Yange se ta num sha iorov 20 shin i hemba nahan je kpaa, sha ahô man agudô.

Yange m zuan a inyaregh sha u teen mcimbim ma bom man ikyav mbi mba eren álalo shin agirgimnger iin va naan mo la. Shi m ngohol inyaregh sha ci u mbagenev mbateen mcimbim ma bom, shi ior vea lu ve a anzô yô, m tôô an-namkyegh m za ta ve mciem iyol ve kimbi anzô shon. Awashima wam lu u hingir or u ngohol ingyatu wuan ior. Yange m ta cia mer, wea wua or gayô nana wua u.

ER BIBILO GEMA UMA WAM LA: Shighe u m lu iyev la, m ungwa kwagh u Mbashiada mba Yehova. M umbur shighe u m lu anyom ikyundu kar la, m pine ngôm mer una fa pe ve lu yô, a ôrom. Ayange nga kar ahar yô, Orshiada ugen u i yilan iti na ér Dixon yô, va kumam uwegh sha hunda. Se mba lamen shighe deghôô yô, a lôhôm mkombo u Mbashiada mba Yehova. M za mkombo la, man ngu zan ve her hemba anyom 20 hegen. Mbashiada mbara na mlumun sha mbampin av cii ken Bibilo.

Yange doom u henen er kwagh u ior a gbe Yehova ishima, kua mba ve fe Aôndo ga je kpaa yô. (2 Peteru 3:9) M hingir u fan mer ngu Ter u lun a dooshima, nahan aluer orgen môm nenge sha a mo ga kpa, un yô, una tam kera ga yô. Shi ishima gbam shimi zum u m fa mer aluer m sôr igbenda yam yô, una dem asorabo am la. Kwagh u i er ken Mbaefese 4:22-24 la yange wasem kpishi. Avur la taver mo ishima ér m ‘er tseor kera,’ m gema m ‘haa orhe iyol u i gbe un sha inja i Aôndo’ la.

Yange m gema uma wam fele ga. Sha iyange Hiitom zan zan Tomataan cii man mcimbim ma bom ga, kpa mea va luun vea azende am sha iyange i Sati man Lahadi yô, ve meem m ma ma. Nahan m nenge mer a gba u me pav a ve, ka nahan ve me wanger uma wam ye, tsô m wa iyol u yemen kpentar ugen. Azende am agen kaa ér aa za verem zende ne, mo kpa m lumun. Se mba ngur yemen yô, ve hii u man ikya je shi ve nam ér mo kpa m ma. Kpa m kaa a ve mer, m de imba uma la, maa se pav gbenda hen ijootar. Shighe kar yô, m va ungwa mer yange se pav gbenda ica gba ga maa ve za num bam ugen sha zwa gbuuka.

IWASEN I M ZOUGH A MI LA: Yange m paven ijende vea ahuraior am la yô, hemba lun mo toon toon u sôron uma wam. Ken inyom i 1989 la, i erem batisema, m hingir Orshiada u Yehova. Mba eren mo batisema yô, anmgbian wam u kwase man ngôm man terem cii kohol mo se hingir u civir Yehova.

M vôso kwase ka anyom 17 je ne, se mba a mbayev mba doon ashe utar. M hen u kighir ishimanyoon yam shighe u i bamem je kpaa. Shi m hen u soon ior ken ‘hanma nongo, man ikyurior man hanma zwa’ cii. (Mpase 7:9) M nenge mer mkaanem ma Yesu ma i nger shin heen ne kure ken uma wam. Ma kaa ér: “Aluer nea lu ken kwaghôron Wam zan zan yô, ne mba mbahenen Av mimi je; man né fa mimi, mimi kpaa una pase ne una tuhwa.”—Yohane 8:31, 32.

[Mkaanem ma sha peeji 27]

Yange gba u me de u kuhwan tser u ua na me kôr akuraior agen ihyom la

[Mkaanem ma sha peeji 28]

Mo vea azende am se bamen ior sha er se nôngo num a ve yô. Yange se ta num sha iorov 20 shin i hemba nahan je kpaa, sha ahô man agudô