Kporom Hen Aôndo

“Nengen ken Ishima” i Or

1 SAMUEL 16:1-12

MLUYOL u ior una fatyô u bumen se. Ka hanma shighe, mluashe u or u ken won la a tesen or u nan lu kimi, ken atô ishima i nan ga. Uumace mba hembe soon u kuren ikyaa sha kwagh u or sha mluashe u nan la. Kpa kwagh u doon yô, Yehova Aôndo nengen mluyol u or tseegh ga. Mkaanem ma i nger ken 1 Samuel 16:1-12 la tese kwagh ne wang.

Nenge ase kwagh u yange er ne. Yehova yange soo u nan ikyurior i Iserael tor u he. Aôndo kaa a profeti Samuel ér: “Me tindi u hen Yese or u Betelehem, gadia ka ken ônov nav M tsough tor Wam ye.” (Ivur 1) Yehova na iti i wan u Yese u tsua un tor la ga, kpa gba kaan tsô ér ka môm ken ônov mba Yese. Alaghga tsô shighe u Samuel mough u yemen ken Betelehem la, taver un kpishi lu henen shin ishima ér, ‘Me fa wan u Yese u Yehova a tsough la nena?’

Samuel za ar ken Betelehem yô, a lôhô Yese man ônov nav iwer i nagh ku yange za a mi la. Zum u waniunda u Yese, Eliabi va nyôr yô, fese nahan mluyol na la doo Samuel kpishi. Samuel hen ér, mluyol u Eliabi la na yô, a kuma u una lu tor kpee, tsô a kaa ken ishima na ér: “Mimi je or u TER A shighe un mkurem ngun sha ishigh Nagh ne.”—Ivur 6

Kpa mnenge u Yehova lu kposo sha kwagh ne. A kaa a Samuel ér: “De kenger mluyol na ga, shin ityaven na kpaa ga; gadia A kumam ga.” (Ivur 7) Ityaven i Eliabi man mdooashe na la gba Yehova kwagh ga. Ashe a Yehova aa á nengen hanma kwagh la nga nengen mluyol u or u ken won la tseegh ga, kpa nga a nenge a mdoom ma nan ma ken atô la.

Yehova pase Samuel ér: “Mnenge u TER ngu er mnenge u or nahan ga; gadia or nengen mluashe u ken won, kpa TER yô, nengen ken ishima.” (Ivur 7) Sha kpôô yô, ka ishima i or, or u kimi, ape inja i or shin mbamhen kua mbamlu mba nan ve lu jim jim la kwagh a gbe Yehova a mi ye. Un u a “karen asema” la venda Eliabi kua ônov mba Yese mbagenev ateratar mba ve va sha ishigh ki Samuel la cii.—Anzaakaa 17:3.

Wan u Yese u Samuel lu a nenge a na ga yô, mase shin môm, iti na ér Davidi; un lu “kuran ilev.” (Ivur 11) Tsô i tindi i za kua a Davidi ken toho i va nyôr a na sha ishigh ki Samuel. Tsô Yehova kaa a Samuel ér: “Mough, haa un mkurem gadia ka un je ne.” (Ivur 12) Mimi yô, Davidi lu gumor “a doo ashe [ikyôr], doo u kenger” kpaa. Nahan kpa, lu ishima na la i̱ na ve Aôndo lumun un ye.—1 Samuel 13:14.

Se mba ken tar u kwagh a hembe gban u sha mluyol u ior u doonashe yô, nahan se fatyô u zuan a msurshima sha u fan ser Yehova Aôndo yô, ka mluyol u ior kwagh a hembe gban un a mi ga. Aluer ú tav shin mbagenev nenge ér ú doo or shin ú doo kwase kpa kwagh gba un sha mi ga. Ka or u ú lu kimi, ka ishima you je la, kwagh a gbe Yehova a mi ye. Er u fe nahan yô, ka u ape lun a aeren a u dooashe sha ishigh ki Aôndo la ga he?