Kwagh U Se Hen Hen Yesu

Sha Kwagh u Mcivir u Mimi La

Aôndo lumun a hanma mcivir ciilii?

▪ Yange mhôônom kôron Yesu a ior mba kwaghaôndo u aiegh tsume a ve la. Yesu ta icin sha kwagh u ‘uprofeti mba aiev mba ve ve a akôv a iyôngo iyol, kpa ken atô ve yô, ve gem ve lu ugbaseela mba huav’ yô. (Mateu 7:15) U nenge er ior mbagenev ka ve yer iyol ken kwaghaôndo ve eren afer kpa?

Yesu yange er msen hen Aôndo kaa ér: “Ka kwaghôron wou je a lu mimi ye.” (Yohane 17:17) Nahan yô, Aôndo lumun a mcivir u a kaha kposo a mimi u Bibilo la ga. Sha nahan yô, Yesu ôr mkaanem ma Aôndo ma i nger shin heen ne sha kwagh u mbaimangerev mbagenev mba kwaghaôndo ér: “Ka gbilin tsô ve civir Mo [ye], sha ci u ityesen i ve tesen la ka atindi a ior tsô.”—Mateu 15:9.

Kwaghaôndo u mimi ngu je kpa?

▪ Zum u Yesu zua a kwase Samaria u kwaghaôndo u aiegh tsume a na yô, a kaa a na ér: ‘Ne mba civir kwagh u ne fe un ga yô, mba ve civir sha mimi yô, vea civir Ter ken jijingi kua ken mimi, gadia ka mba ve civir Un nahan ne je Ter A keren ye.’ (Yohane 4:22, 23) Mkaanem man tese wang ér se fatyô u zuan a mcivir u mimi.

Yesu kaa ér: “M gbe eren ma kwagh sha tahav Av iyol Yam ga, kpa M er akaa er Ter A tesem yô.” Nahan Yesu yange fa ér kwaghaôndo u un tesen kwagh na la ka u mimi. (Yohane 8:28) Shi a kaa ér: “Mo M ngu gbenda man mimi man uma kpaa. Ma or gbe van hen Terem ga, saa nana kar her a Mo.” (Yohane 14:6) Er mbacivir Aôndo sha mimi ve lu ken mzough sha gbenda u zan hen Ter yô, gba keng u vea lu ken mzough ken kwaghaôndo môm kpaa.

 U fa mbacivir Aôndo sha mimi nena?

▪ Orkristu ka or u nan dondon Yesu Kristu yô. Time ase sha igbenda inyiin i ior ka vea dondon ikyav i Yesu ve i fa ér mba mbadondon un mba mimi yô.

1. Yesu Kristu yange kaa a Yehova ken msen ér: “M pase ve iti You; Me shi Me pase ve i kpaa.” (Yohane 17:26) Mbakristu mba mimi mba pasen mbagenev iti i Aôndo er Yesu nahan.

2. Yesu pasen ior kwagh u Tartor u Aôndo shi a tindi mbahenen nav sha uya uya ér ve kpa ve za er nahan. A kaa ér: “Hanma gar shin angar u kiriki u nea nyôr yô, ker nen or u injaa keregh.” Shighe kar yô, shi va kaa ér: “Nahan yô, za nen, za gema nen akuraior cii a̱ hingir mbahenen.” (Mateu 10:7, 11; 28:19) U fatyô u fan Mbakristu mba mimi nyian a fese je, sha ci u mba zan hemen a tom shon her.

3. Yesu venda u nyôron iyol ken pati u eren. Nahan a ôr kwagh u mbahenen nav ér mba ‘ior i tar ne ga, er Mo kpaa M lu or u tar ne ga nahan.’ (Yohane 17:14) Gba u a fa Mbakristu mba mimi sha mnyer u ve nyer iyol ken pati u eren ga la.

4. Yesu yange lu a dooshima u tangen iyol ga sha mbagenev. A kaa ér: “Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.” (Yohane 13:35) Mbakristu mba mimi mba we ayol a ve ikyo shi mba nenge ityav ga.

Mcivir u mimi una fatyô u wasen we nena?

▪ Cii ve u civir Aôndo sha mimi yô, a gba u ú hii fan Yehova tsembelee. Mfe u Aôndo la una wase u u̱ dondon gbenda u uma u hemban doon cii shi una na yô, Aôndo una doo u ishima tsung. Yehova tôndo zwa u nan mba un doo ve ishima la uma u tsôron. Nahan, Yesu kaa ér: “Man uma u tsôron yô, ka u ve̱ fa U, We Aôndo u mimi tswen, man shi Un u U tindi la, ka Yesu Kristu.”—Yohane 17:3.

Wea soo u seer zuan a iwanger sha kwagh ne yô, ôr ityough 15 ki takerada u se tese shin heen ne, ka Mbashiada mba Yehova ve gber u ye.

[Foto u sha peeji 16]

“Kura nen ayol a en sha uprofeti mba aiev mba ve ve her a ven a akôv a iyôngo iyol, kpa ken atô ve yô, gema ka ugbaseela mba huav je.”—Mateu 7:15