Kporom Hen Aôndo

A Na Se Ian i Tsuan Kwagh u Se Soo Yô

2 UTOR 18:1-7

GBA u mbamaren vea ver ônov vev ikyav i dedoo. Aluer ikyav i mbamaren bende a wan ve sha gbenda u dedoo yô, alaghga wan la nana hingir u lun a aeren a dedoo shi tsuan akaa a nana er ken uma u nan la sha kwaghfan. Kwagh er vihi yô, mbamaren kpishi ver ônov vev ikyav i bo. Ônov mba i ver ve ikyav i bo la, vea saa ishe keng, a bunde gaa? Mimi ugen u doon kpishi una wase se u zuan a mlumun sha mpin ne; mimi shon yô ka un ne, Yehova Aôndo na hanma or iyua i tsuan kwagh u nan soo u eren yô. Nenge ase kwagh u Hesekia u í ôr ken 2 Utor 18:1-7 la.

Hesekia lu “wan u Ahashi tor u Yuda.” (Ivur 1) Ahashi yange urugh ior nav ve undu mcivir u wang, u Yehova la. Tor u eren aferakaa ne lu or u civir Baal, aôndo u i naan un nagh sha uumace la. Yange kôr anmgbian u Hesekia u nomso môm shin hemba nahan, na nagh a mi. Ahashi wuhe ihinda i tempel shi “er atse hen hanma zongough ken Yerusalem” cii. “A bam TER.” (2 Kroniku 28:3, 24, 25) Sha kpôô yô, ter u Hesekia lu iferor kpen kpen. Lu kwagh u Hesekia una fatyô u palegh aeren a bo a Ter na la gaa?

Hesekia yange hingir a hingir tor sha ityough ki Ahashi nahan maa á er kwagh u yange tese ér mayange je una de ér ikyav i bo i ter na la i̱ tsume a na ga yô. Hesekia za hemen u “eren kwagh u dedoo sha ishigh ki TER.” (Ivur 3) Hesekia suur sha Yehova, nahan “ma tor u Yuda u kuman sha a na” lu ga. (Ivur 5) Ken inyom i hiihii i mtemtor na la, tor u lu gumor ne hii u nôngon kwagh sha ci u mcivir u mimi, nahan a vihi ajiir a taven sha a i civir ieev mbi atôatyev her la. A hide a bugh tempel, shi a hide a ver mcivir u wang la. (Ivur 4; 2 Kroniku 29:1-3, 27-31) Hesekia za hemen u ‘varen a Yehova, nahan Yehova lu a na.’—Ivur 6, 7.

Lu nyi i wase Hesekia ve dondo ikyav i bo i ter na la ga? Alaghga tsô ngô na, Abiya, u se fe kwagh na cuku tseegh la tese wan na u nomso ne aeren a dedoo shinii? Ikyav i dedoo i Yesaia, u yange hii tom na u profeti cii ve i mar Hesekia la, bende a gumor u lu wan u tor nee? * Bibilo pase se ga. A lu nyi je yange i̱ wase un kpa, se fa tsô ser: Hesekia tsua u eren akaa ken uma na a yange lu kposo a akaa a ter na er la yô.

Hanma or u alaghga mbamaren mba nan yange ve ver nan ikyav i bo shighe u nan lu iyev la cii yô, ikyav i Hesekia ne ia fatyô u taver nan ishima. Kwagh u a er a kar yô se fatyô u geman un ga; se fatyô u karen a akaa a vihin aa a vande eren se la kera ga. Kpa u ngu wer, er akaa shon a vande eren se yô maa se kera za ikyura ga ze. Se fatyô u tsuan akaa a se er hegen ve a saan se iyol ken hemen yô. Se fatyô u tsuan ser se soo Yehova, Aôndo u mimi la, shi se civir un er Hesekia nahan. Aluer se tsua u eren nahan yô, á saan se iyol hegen shi se va zua a uma u tsôron ken tar u he u Aôndo la. (2 Peteru 3:13; Mpase 21:3, 4) Doo u se wuese Aôndo u dooshima u a er kwagh a hanma wase sha icivir, a ne hanma wase iyua i hemban doon i tsuan kwagh u se soo u eren la!

[Ngeren u shin kpe]