Er Nan Ve Ior Ve Eren Akaabo?

KWAGH ngu môm u ior kpishi ve lumun a mi yô. Kwagh shon yô ka un ne: Se uumace cica cii se yina, nahan se mba tsum shi se mba eren akaa a ka se va hingir u vaan afanyô ken hemen yô. Er kwagh ne i lu mimi nahan cii kpa, ka ityôkyaa i i ne ve akaabo a lu eren kpishi, a vesen man a kiriki, a hanma iyange yô se nôngon u nengen a mi sha ashe ase shi se ongo sha abaver kpaa ne shinii?

Er uumace ve yen nahan kpa, ior kpishi lumun ér akaa nga a i doo u mayange je or nana er ga yô, shi uumace vea fatyô u palegh aeren a bo. Shi ior mbagenev kpishi vea lumun ér u ôron kwagh u a lu u mimi ga sha lan la kaha kposo a u eren aie sha apera sha u vihin or iti, man u vihin or iyol abu la ka kwagh môm a u keren nan a ku zan zan wuan nan kera ga. Nahan kpa, ashighe kpishi, ka i lu ior mba wan ndor a vese mba i lu inja er mba ior mba dedoo la je ve er ma kwaghbo u vihin tsung ye. Er nan ve i lu nahana? Er nan ve ior ve eren aferakaa?

 Bibilo ta iwanger sha itinekwagh ne. I̱ pase se atôakyaa a mimi a wasen se u fan er i hii ve ior ve eren akaa a ve fe ér ka a bo la yô. Tôv ase sha akaa a Bibilo i er ne.

▪ ‘Mkighir ngu a gema orfankwagh nan hingir ibumeor.’—ORPASENKWAGH 7:7, NW.

Bibilo pase ér ashighe agen mlu u ior ngu a mgbegha ve u eren kwagh u ma ve er ga yô. Mbagenev je yô, mba eren aferakaa sha u vea nôngo a bee a ican i ve lu yan la kua akaa agen a i eren a ve shami ga la. Takerada u i yer ér Urban Terrorism la kaa ér “ashighe kpishi, kwagh u vesen u ka a mgbegha orwantswam nan wua ior yô, ka ishima i ka i vihi nan sha mimi a ugomoti mba ageegh mba ve eren kwagh sha asema ve, kua iniongo man ityar i lun a inyaregh kpishi la.”

▪ ‘Mishe u hanma inja i kwaghbo cii yô, ka inyaregh ki saren.’—1 TIMOTEU 6:10.

Ior dugh ishenge ér, Inyaregh ki vihin or, inja na yô, ior mba dedoo je kpa ka a na ve inyaregh kpishi yô, ve hingir u peren tindi shin eren kwagh u shami ga. Ior mba lun inja legh legh, mba ve eren kwagh a ior kundu kundu hanma shighe la je kpa, ka a gba u vea zua a inyaregh shin ka a gba u inyaregh ki a saa ve yô, ve hingir anomaior a taver inja hen shighe la. Hen ase ken ishima tsô u nenge er ior kpishi ve eren aferakaa sha ci u hua yô, er gbendanumun man anyighe man iv mbu iin ior kua iwoo-or nahan.

▪ ‘Ka er i kur ijirôron i sha tom u ifer fefa ga yô, man ishima i ônov mba iorov i taver sha u eren ifer nahan ye.’—ORPASENKWAGH 8:11.

Ruamabera tese ér uumace mba a ishima i eren kwagh, henen ér vea yem iyol ishô aluer mbahemen tar fa kwagh shami ga yô. Ka nahan ve ka se nenge ior ve yevese a mato sha gbenda kpishi, shi mbagenev ve iin ikyaren shin ve iin inyaregh ki tar ve shi ve eren akaabo agen a vihin kpishi kpaa ye. Or ka nana lu u nana kighir ior ér ve kura tindi ga, shin ior ka vea fa ér vea per tindi kpa a kôr ve ga yô, ka vea lu ior mba ve vanden kuran tindi je kpa, ishima i hemba taver ve u eren kwagh u kera yô, ma ve er ga yô. Magazin ugen u i yer ér Arguments and Facts la kaa ér, “er aferaior kpishi a yemen iyol ishô sha akaabo a ve yô, ka inja er kwagh ne ngu mgbeghan ior u eren aferakaa a hemban vihin cii nahan.”

▪ ‘Hanma or ka i mee nan zum u asaren a nan iyol i nan ka a urugh nan a hôn nan la. Zum u isharen ka i jile iyol kera yô, i gema i mar isholibo.’—YAKOBU 1:14, 15.

Uumace cii mba henen akaabo ken ishima ashighe agen. Hanma iyange yô, ka se ungwa akaaôron shi se tagher a ameen kpishi a mgbeghan se sha u se er kwagh u a lu u shami ga yô. Sha ayange a i lu ngeren Bibilo la, i kaa a Mbakristu ér: “Ma imeen ngi a tser ne ga, saa i hemban or ga la.” (1 Mbakorinte 10:13) Nahan je kpa, ka kwagh u or nan tsough u eren shighe u nan tagher a imeen la una yange nan u eren isholibo shin una yange nan ga ye, inja na yô aluer nan dugh mhen u bo la ken ishima i nan kera fese yô nana er isholibo ga, kpa aluer nan  ngu henen sha mi zan zan a vese ken ishima i nan yô nana er isholibo la. Avur a ken Yakobu, a se ter sha heen ne ta se icin ér aluer or de asaren a bo “jile iyol” ken a nan yô, nana er kwaghbo kpee je.

▪ ‘Zende a mbafankwagh imôngo, nahan we kpaa ú hingir orfankwagh, kpa ijende i abumeaior yô, ia zua a ican.’—ANZAAKAA 13:20.

Azende a ase aa fatyô u benden a vese kpishi je, aa bende a vese sha gbenda u dedoo shin u bo. Ashighe kpishi, ior ka ve er akaa a ve we ishima u eren ga yô sha ci u mkighir u mbakov ve shin azende ve a bo. Ken Bibilo yô, ishember i “abumeaior” la ngi ôron kwagh u mba mfe a ban ve la ga, kpa inja i ishember la yô ka mba ve vende kwaghwan u dedoo u ken Mkaanem ma Aôndo la. Sea lu agumaior shin sea lu mbaganden kpa, aluer se tsua ahuraior a ase sha kwaghfan, er Bibilo i tese nahan ga yô, se “zua a ican” kpee je.

Avur a Bibilo ne kua agen kpaa, ôr kwagh kpuaa sha u pasen se er hii ve ior, kua mba alaghga i nengen ve ér mba a inja i dedoo la je kpaa, ve eren akaabo kua akaa a vihin tsung je kpaa yô. Shin er i lu se a iwasen u fan akaa aa á mgbeghan ior ve eren akaabo a vihin kpishi nahan cii kpa, ishimaveren ngi ér kwagh a va gema ken hemen sha kwagh ne jee? Een, gadia Bibilo pase se atôakyaa a ior ve eren aferakaa tseegh ga, kpa shi i tôndo zwa ér aferakaa la aa kar kera. I̱ tôndo zwa a vese ér nyi? Akaabo a ior ve eren shin tar ne cica cii la aa bee mimi kpa? Ngeren u dondon ne na mlumun sha mbampin mban.