Kwagh U Se Hen Hen Yesu la

Er U Zua a Msaanyol Yô

Kanyi i Lu Gbenda u Vesen u Zuan a Msaanyoloo?

▪ Yesu ter ishember i msaanyol la ken mkaanem ma yange hii ôron ken ityesen na i sha uwo i í ze gwa yum la. A kaa ér: “Saan mba ve lu mbaibanave ken jijingi [shin “mba ve fe mgbe ve u ken jijingi,” NW] la iyol.” (Mateu 5:3) Yange ôr kwagh ne nahan ver ishigh ér nyi? Kanyi i lu ibanave i ken jijingi?

Saa se ôôn shi se maan mngerem shi se yaan kwagh vough er uzendenya kpa ve eren nahan ve se lu uma ye. Kpa aluer se soo ser i saan se iyol yô, kwagh ngu u i gbe u se er, u uzendenya ve eren ga yô—gba u se fa ityôkyaa i se lu uma yô. Ka Un u a gbe uma la tseegh una fatyô u kuren mgbe ne ye. Ka nahan ve Yesu yange kaa ér: “Ka sha bredi tseegh or á lu uma ga, kpa ka sha hanma kwaghôron u a dugh sha zwa u Aôndo” ye. (Mateu 4:4) Saan mba ve fe mgbe ve u ken jijingi la iyol, gadia ka ve kôrcio u kporom ikyua a Yehova, “Aôndo u sar sar,” nahan Yehova ngu a na ve kwagh u injaa u una wase ve u zuan a msaanyol yô, ka ishimaverenkeghen je la.—1 Timoteu 1:11.

Yesu yange na ior ishimaverenkeghen nena?

▪ Yesu kaa ér, “saan mba ve lu a ishima i legh legh la iyol, gadia tar ua lu dyako ve je.” (Mateu 5:5) Yesu na uumace ishimaverenkeghen sha u been ior angev shi nderen mbakpenev shighe u lu shin tar la. Shi yange va a loho u nan ior ishimaveren kpaa. Yesu pase ér: “Tar ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.” (Yohane 3:16) Ior mba ve ongo imo i Aôndo la vea zua a uma tsôron shin tar ne. Ú lu imôngo vea mba asema legh legh, a iyolbeen shio nahan a doo u ga he? Ka nahan ve Mkaanem ma Aôndo ma kaa a vese ér: “Ember nen sha ishimaverenkeghen” ye. (Mbaromanu 12:12) Yesu shi yange pase er se zua a msaanyol nyian yô.

 Ka gbenda u nan ior msaanyol u nyi Yesu yange tese ioroo?

▪ Yesu due a kwaghwan u wasen kpishi sha kwagh u mlu wase vea mbagenev man ivaa man iyol i hiden a mi ijime man er i doo u se lu a mnenge u vough sha kwagh u akaa a iyolough yô. (Mateu 5:21-32; 6:1-5, 19-34) Aluer u dondo kwaghwan u Yesu la yô, u zua a msaanyol.

Iyua i eren i ve a msaanyol. (Aerenakaa 20:35) Ikyav i tesen yô, Yesu kaa ér: ‘Zum u wea er iniongo yô, lôhô mbaatsanev man mbaawanev man mbakeer man mbaapirashe. Nahan we kpaa á saan we iyol sha ci u ve mba a kwagh u vea kimbi u ga.’ (Luka 14:13, 14) Ka sea eren a mbagenev sha inja sha u i saan ve iyol yô, se kpa i saan se iyol, kpa ka sea keren msaanyol wase tseegh yô i taver se u zuan a msaanyol.

Kanyi i lu gbenda u or nana hemba zuan a msaanyol ciilii?

▪ Aluer u ngu eren akaa sha ci u mbagenev yô a saan we iyol, kpa a hemba saan we iyol cii aluer u ngu eren akaa sha ci u Aôndo yô. Msaanyol u se zua a mi la una hemba msaanyol u mbamaren, mba ônov vev ve doo ve ishima ka ve zua a mi la je kpaa. Se fatyô u nengen a kwagh ne wang ken kwagh ugen u yange er shighe u Yesu lu tesen ior yô. “Kwase ugen ken ikpelaior genger imo, kaa a [Yesu] er: Saan iyav mbu mbu mar U la iyol, man atumba a U me a la. Kpa A kaa er: Kpa jim yô, i saan mba ve ongo kwaghôron u Aôndo man ve eren sha mi kpaa la, iyol.”—Luka 11:27, 28.

Yesu iyol na kpa yange zua a msaanyol sha u eren ishima i Ter na u sha la. Ishima i Aôndo yô, ka u ior ve ungwa kwagh u ishimaverenkeghen i sha kwagh u uma u tsôron la. Sha shighe ugen la, Yesu pase kwase ugen u ishimaverenkeghen ne gba un ishima la kwagh u ishimaverenkeghen shon, been yô a kaa ér: “Kwaghyan Wam yô, ka u Me er ishima i u A tindim la.” (Yohane 4:13, 14, 34) We kpa u fatyô u zuan a msaanyol sha u eren kwagh u a lu sha ishima i Aôndo yô, kwagh shon yô ka u pasen mbagenev mimi u a lu ken Bibilo la.

Wea soo u zuan a mkav seer yô, ôr ityough 1 ki takerada u Bibilo Tese Ér Nyi Jimi? ka Mbashiada mba Yehova ve gber u ye.

[Foto u sha peeji 16]

Se mba zough a msaanyol u mimi sha u kuren mgbe wase u i gbe u se fa ityôkyaa i se lu uma la