Mpin U Mbaôron Takerada Ne . . .

Ior Cii mba a Ian Kwaghmôm i Fan Aôndoo?

▪ Zum u i pine Yesu tindi u a hembe lun u vesen yô, a kaa ér: “Ter Aôndo wou A̱ doo u ishima a ishima you cii man a uma wou cii man a mfe wou cii.” (Mateu 22:37) Nahan kpa, cii man Aôndo a̱ doo ior ishima yô, gba u vea vande zuan a mfe u vough sha kwagh na. (Yohane 17:3) Hanma or yô, ian ia due nan er mbagenev nahan vough i nana zua a mfe ne kpa?

Ka Bibilo i lu imbor i vesen i mfe u Aôndo ne ye. (2 Timoteu 3:16) Ior kpishi mba sha ajiir a Bibilo i ban ga yô. Alaghga shi á lôhô ve mba shon acin imôngo ér ve̱ va hen Bibilo sha er vea zua a mfe u Aôndo ne yô. (Mateu 28:19) Mbagenev yô, mba a mbamaren mba fan kwagh mba ve lu Mbakristu yô, nahan mba yesen ve ayange ayange sha gbenda u vea fatyô u henen kwagh u Aôndo yô.—Duteronomi 6:6, 7; Mbaefese 6:4.

Kpa mbagenev yô, mba sha ajiir aa i lu ve ican u henen kwagh u Aôndo yô. Mbagenev due hen icombor i mbamaren ve tesen ônov vev dooshima ga yô. (2 Timoteu 3:1-5) Mba i yese ve ken icombor ingin nahan yô, alaghga a taver ve u nengen Aôndo ér ka Ter wase u sha, u lun a dooshima. Ior mbagenev kpishi za makeranta ga, nahan mba fetyô u ôron Bibilo tsembelee ga. Mbagenev di, i tese ve atesen a kwaghaôndo u aiegh shin mba hen icombor shin mba sha ajiir gayô ken ityar i í lumun ér i̱ tese ior mimi u ken Bibilo la ga yô. (2 Mbakorinte 4:4) Mlu u amba ne na yô ka u vea fatyô u zuan a ian i henen kwagh u Aôndo shi soon kwagh na ga shinii?

Yesu yange pase ér á taver ior mbagenev kpishi u soon Aôndo shi ungwan imo na sha ci u mbamtaver mba vea tagher ishigh a mi la. (Mateu 19:23, 24) Nahan kpa, Yesu yange umbur mbahenen nav ér aluer ior nenge ma mzeyol ér a taver kpishi je ka u a fatyô u sôron un ga je “kpa Aôndo yô, [fe] akaa cii ityô.”—Mateu 19:25, 26.

Hen ase sha atôakaa a mimi ne: Sha tahav mbu Yehova Aôndo yô, Mkaanem nam, Bibilo, hingir takerada u i hembe samber a mi sha tar jimin cii yô. Bibilo tsenga ôron ér á pase loho u dedoo u Aôndo shi á pase awashima u Aôndo a lu a mi sha ci u tar ne la, “á tser tar” cii. (Mateu 24:14) Nyian ne, Mbashiada mba Yehova mba pasen loho u dedoo ne ken ityar kposo kposo je hemba ityar 230 shi mba gberen ityakerada i pasen Bibilo ken ijô kuma er 500 nahan. Mba ve lu a Bibilo ga je kpa vea fatyô u henen kwagh u Aôndo u mimi kpishi je sha u kenger akaa a Aôndo a gbe a la.—Mbaromanu 1:20.

Heela tseegh ga, Mkaanem ma Aôndo kaa ér: “TER tev asema cii, man A kav hanma mhen cii. Aluer ú ker Un yô, ú zua a Na.” (1 Kroniku 28:9) Nahan yô, Yehova tôndo zwa ér hanmaor naná zua a ian i fan un er mbagenev nahan vough ga, nahan cii kpa, a gema a bugh gbenda sha er hanmaor u lun a ishima i mimi yô nana fa un yô. Shi mba yange ve kôr cio u henen kwagh na ga tsô ve kpe la kpa vea zua a mnder u uma ken tar u he u perapera la, nahan vea lu a ian i henen kwagh na.—Aerenakaa 24:15.