Tese Ônov ou

Ityôkyaa i Yesu Timbir Yô

YANGE i va ôr Yesu ér ijende na i ishima ishima, Lasaru, ngu uange kpoghuloo. Lu orgen u Maria man Marta, anmgbianev mba Lasaru mba kasev, tindi un yô va Yesu a loho ne ye. Ortyom ne mough ken gar u Betani, ape Lasaru man anngôôv nav mba kasev lu la. Kasev mban na jighjigh ér Yesu una fatyô u been anngô ve angev, shin er ve lu ica ken gar ugen, u lu Ifi u Yordan yande la nahan kpaa. Ve fa er Yesu yange vande been ior mba ve lu ica a na angev yô.—Mateu 8:5-13; Yohane 11:1-3.

Or u ve tindi la va hen Yesu va ôr un loho u bo la je kpa, Yesu er kwagh sha mi ga. Bibilo kaa ér: “A shi A tsa her ape A lu la ayange ahar.” (Yohane 11:6) U fa er i hii ve Yesu yange kar a kar za wase Lasaru ga kpa?— * De se lam sha kwagh ne.

Yesu yange fa er angev mbura mbu woo Lasaru yô. Nahan, a kaa a mbaapostoli nav ér: “Shi se yem nen ken Yudia.” Kpa ve venda a Yesu, ve kaa ér: “Ayange a Mbayuda ve nenge u tan We awen la, nga a ngee ga, man Ú shi Ú za ker yee?” Yesu gema pase ve ér: “Huror wase Lasaru ngu yaven, kpa Me za me za nder un.”

Nahan mbaapostoli kaa a na ér: “Tere, aluer una lu yaven yô, una war.” Mba er nahan yô, Yesu pase ve wener: “Lasaru kpe.” Tsô a ôr kwagh a ve u alaghga yange una kpiligh ve iyol yô, ér: “M gema M ember sha ci wen er M lu her ga yô, . . . se za nen her a na.”

Toma gema ôr kwagh sha ishimataver kaa ér: ‘Sé za, se za kpe nen a Yesu imôngo.’ Toma yange fa wener, kwa ne kpa mbaihyomov mba Yesu shi vea soo u wuan un, shi mbaapostoli kpa alaghga a wua ve. Nahan kpa, ve yem a Yesu imôngo, ve cica cii. Ayange nga kar ahar nahan yô, ve za nôôr hen Betani, gar u Lasaru lu her la. Gar ne lu ikyua a Yerusalem, kuma er umai uhar nahan.—Yohane 11:7-18.

U fa er i hii ve Yesu yange za fele ga ve gema lu ember a ember kpa?— Yesu yange vande nderen ior mbagenev shin ku, kpa ior mba nder ve la kpe ica gba ga maa Yesu nder ve ye. (Luka 7:11-17, 22; 8:49-56) Kpa Lasaru yô, kpe ikyom na lu shin uwar ayange kar imôngo. Nahan lu kwagh u or môm nana kaa ér a kpe mimi ga ze!

Marta, anngô u Lasaru u kwase ongo ér Yesu zurum a Betani yô, a due ayem a za kegh un gbenda. A kaa a Yesu ér: “Tere, Wea lu heen yô, anngôm ma a kpe ga.” Tsô Yesu sur un ishima kaa ér: “Anngôu una nder.” Marta hide ayem za ôr anngô na Maria myer ér: “Ortesen ngu heen man ngu yilan we.”

Nahan Maria mough fese, za ape Yesu  lu la. Ikpelaior i i va ku yaren la hen ér, ngu zan u za nengen uwar, tsô ve dondo un ityô. Yesu nenge a Maria man ikpelaior i i lu a na la, er ve lu vaan yô, nahan un kpa gba ‘vaan.’ Tsô ve kar, ve za nôôr hen uwar la, i cir iwen i vesen sha zwa u u. Nahan Yesu kaa ér: “Tôô nen iwen ne kera.” Kpa Marta gema huna, kaa ér: ‘Tere, una huma hegen, gadia ayange a kuugh na nyian ka anyiin je.’

Ikpelaior la ungwa imo i Yesu, nahan ve tôô iwen shon kera. Tsô Yesu er msen, tsenga sughun Aôndo sha tahav mbu fa ér Aôndo una na un, nahan una nder Lasaru shin ku la. Yesu maa yila genger genger ér: “Lasaru, due ken won!” Lasaru maa due a “ikyangenev” iyol. Nahan Yesu kaa a ve ér: “Sagh nen un, a̱ yem.”—Yohane 11:19-44.

U nenge hegen er i hii ve Yesu yange timbir kpa?— Yange fa wener aluer un timbir kpuaa yô, una hemba eren shiada sha kwagh u Ter na, Yehova tsembelee. Man er yange va sha shighe u dedoo sha u va nderen Lasaru yô, ior kpishi hingir mba nan Aôndo jighjigh. (Yohane 11:45) U fa kwagh u ikyav i Yesu ne i tese se kpa?—

We kpa u fatyô u tsuan shighe u dedoo u ú er shiada sha akaa a kpilighyol a Aôndo a er shi una va er ken hemen la kpaa. U fatyô u ôron mbayev mba ne ze makeranta imôngo la shin atica ou akaa ne. Shighe u i nyer kelase je kpa, mbayev mbagenev zua a ian i dedoo, nahan ve ôr tica ve man mbayev mba ken kelase ve kwagh u akaa a injaa a Tartor u Aôndo ua er sha ci u uumace la. Sha kpôô yô, we u fatyô u nderen mbakpenev ga, kpa u fatyô u wasen mbagenev sha u ve fa Aôndo u a lu a tahav mbu nderen mbakpenev la, Aôndo shon u una va nder ior asev mba ve saa ku la.

[Ngeren u shin kpe]

MBAMPIN:

▪ Er nan ve Yesu yange kar fese za wase Lasaru ga?

▪ Er nan ve Toma kaa ér: ‘Sé za, se za kpe nen a Yesu imôngo’?

▪ Yesu yange zua a tahav mbu nderen Lasaru nena?

▪ Kanyi nahan u fatyô u eren sha u tesen wer u hen kwagh ken ikyav i Yesu laa?